O artigo 37 do Regulamento para o réxime interior da Cámara Oficial Mineira de Galicia, aprobado por Resolución da Dirección Xeral de Enerxía e Minas do 5 de abril de 2018, sinala que lle corresponde ao presidente da cámara a convocatoria de eleccións para a renovación da Xunta Directiva desta, logo da comunicación ao órgano tutelar.
Tras a comunicación ao órgano tutelar e dentro dos prazos establecidos no citado artigo 37 do regulamento, con data do 16.1.2020, o presidente da cámara acordou a apertura do proceso electoral.
Para garantir a transparencia e a obxectividade deste proceso electoral, conforme o artigo 39 do regulamento, constituíuse a Xunta Electoral o 29.1.2020, con sede no domicilio social da Cámara Oficial Mineira de Galicia.
Unha vez aberto o proceso electoral e transcorridos os prazos previstos para a exposición pública dos censos electorais e de reclamacións, e aprobada pola Asemblea do 23.4.2020 a estrutura e composición da Xunta Directiva para o próximo período electoral, corresponde ao presidente da cámara a convocatoria das eleccións para a renovación da Xunta Directiva.
ACORDO:
Un. Obxecto
Convocar eleccións para a renovación da Xunta Directiva da Cámara Oficial Mineira de Galicia.
Dous. Prazo e presentación das persoas electoras
As candidaturas elixibles por sufraxio do electorado presentarán un escrito ante a Secretaría da cámara durante os dez días seguintes á data de publicación desta convocatoria no Diario Oficial de Galicia. O prazo rematará ás 24 horas do décimo día, contado desde a devandita data.
Tres. Requisitos e proclamación dos candidatos
1. Os candidatos a formaren parte da Xunta Directiva da cámara, ademais de cumpriren os requisitos necesarios para seren electores, deberán cumprir os requisitos previstos no artigo 36 do Regulamento para o réxime interior da Cámara Oficial Mineira de Galicia, aprobado mediante Resolución da Dirección Xeral de Enerxía e Minas do 5 de abril de 2018.
2. Unha vez finalizado o prazo de presentación de candidaturas conforme o artigo 36 do regulamento, a Xunta Electoral, despois de comprobar o cumprimento dos requisitos exixidos para a presentación de candidaturas, procederá á proclamación dos candidatos no prazo de cinco días contados desde a data en que finalizou a súa presentación.
Catro. Data e horario das eleccións por sufraxio do electorado
As eleccións dos vogais de Xunta Directiva dos distintos grupos e categorías terán lugar o 30.6.2020 na sede da cámara, entre as 9.00 e as 19.30 horas.
Cinco. Proclamacións de electos sen elección
Segundo o artigo 40.3 do regulamento, cando o número de candidatos proclamados por un grupo ou categoría resulte igual ao dos membros que se van elixir, a súa proclamación equivalerá á elección e esta, polo tanto, non se efectuará.
No caso de que o número de candidatos for inferior ao dos membros para elixir, a Xunta Electoral dará por elixidos os proclamados e no prazo de oito días elixirá, mediante sorteo entre os socios electores e elixibles do grupo ou categoría correspondente, os necesarios para cubrir as vacantes.
A Secretaría da cámara convocará os membros electos nun prazo non superior a un mes desde a súa elección, para tomaren posesión e constituír a nova xunta directiva.
Seis. Colexio electoral
O colexio electoral único instalarase no domicilio social da Cámara Oficial Mineira de Galicia: rúa Juan Flórez 33-35, entrechán esquerdo, 15004 A Coruña.
Sete. Mesa electoral
A mesa electoral estará formada por un presidente e dous vogais designados pola Xunta Electoral de entre os socios electores e elixibles que non sexan candidatos, segundo o artigo 44 do regulamento.
Oito. Voto por correo
As persoas electoras que prevexan que na data das eleccións non poderán comparecer nos colexios electorais poderán exercer o seu dereito ao voto emitíndoo por correo postal certificado e urxente ou electrónico ao enderezo cmg@camaraminera.org, logo da solicitude persoal á cámara, dentro dos dez días seguintes ao da publicación desta convocatoria, segundo o modelo normalizado que figura na web da Cámara Oficial Mineira de Galicia (https://camaraminera.org/) conforme o artigo 41 do regulamento.
Nove. Papeletas e sobres
As papeletas e sobres para o voto presencial ou por correo seguirán os modelos normalizados que figuran na web da Cámara Oficial Mineira de Galicia (https://camaraminera.org/) conforme o artigo 41 do regulamento. Nas papeletas indicaranse, no caso de persoas físicas, os apelidos e o nome e, no caso de persoas xurídicas, a denominación social das persoas candidatas ordenadas alfabeticamente, de forma que a persoa electora marcará cunha cruz o recadro da papeleta normalizada correspondente aos candidatos ou á lista da súa elección. As papeletas configuradas e impresas despois da proclamación de candidatos manterán a súa validez durante todo o proceso electoral.
Dez. Modelos normalizados
Co fin de garantir o exercicio adecuado do voto estarán á disposición dos socios electores e elixibles os modelos normalizados na web da Cámara Oficial Mineira de Galicia (https://camaraminera.org/).
A Coruña, 11 de maio de 2020
Juan de Dios Martín Aparicio
Presidente da Cámara Oficial Mineira de Galicia