BDNS (Identif.): 510655.
De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo se pode consultar na Base de datos nacional de subvencións (BDNS):
(http://www.pap.minhap.gob.es/bdnstrans/index).
Primeiro. Persoas beneficiarias
As persoas que teñan a condición de seren naturais de Galicia, seren fillos/fillas de galegos ou acreditaren, mediante empadroamento, residencia en Galicia polo menos desde os dous anos anteriores á publicación da convocatoria, e nivel B2 nalgunha das linguas oficiais da Comunidade Autónoma de Galicia.
Segundo. Obxecto
Convocar unha bolsa de formación, para persoas cun título universitario, para a realización de prácticas en materia de políticas e programas europeos no ámbito da innovación e a investigación con destino na oficina da Fundación Galicia Europa (FGE) en Bruxelas.
Terceiro. Bases reguladoras
As bases reguladoras do procedemento están recollidas no anexo I da Orde do 17 de decembro de 2018 pola que se autoriza a Fundación Galicia Europa para conceder subvencións e se aproban as bases reguladoras para a concesión de bolsas de formación, dirixidas a persoas cun título universitario, para a realización de prácticas en materia de políticas e programas europeos no ámbito da innovación e a investigación (código de procedemento PR770M).
Cuarto. Importe
O importe total da bolsa distribuirase do seguinte xeito:
– Retribución bruta (pagamento ao bolseiro): 16.200,00 €.
– Axuda de desprazamento para gastos de viaxe (pagamento ao bolseiro): 1.100 €.
– Seguridade Social: 600,00 €.
Quinto. Prazo de presentación de solicitudes
O prazo de presentación de solicitudes e da documentación complementaria será dun mes contado a partir do día seguinte ao da publicación do anuncio da correspondente convocatoria no Diario Oficial de Galicia.
Santiago de Compostela, 9 de xuño de 2020
O presidente de Fundación Galicia Europa
P.A. (artigo 15 dos Estatutos da Fundación Galicia Europa)
Alfonso Rueda Valenzuela
Vicepresidente da Fundación Galicia Europa
