O 20 de decembro de 2019 publicouse no Diario Oficial de Galicia núm. 242 a Resolución do 18 de decembro de 2019 pola que se establecen as bases reguladoras, en réxime de concorrencia competitiva, para a concesión de subvencións de creación audiovisual para o desenvolvemento e a promoción do talento audiovisual galego, e se convocan para o ano 2020.
O día 14 de marzo, en virtude do Real decreto 463/2020, do 14 de marzo, declárase o estado de alarma para a xestión da situación da crise sanitaria ocasionada por COVID-19, crise que se fixo extensible a todos os sectores económicos e sociais.
A Axencia das Industrias Culturais, sendo sensible ao impacto producido pola pandemia nas empresas audiovisuais, a través da Consellería de Cultura e Turismo, elevou ao Consello da Xunta de Galicia para a súa valoración as propostas relativas a aqueles expedientes de subvencións para os cales se propoñía a súa continuidade, así como de modificacións dos que estaban en execución por estaren vinculados con carácter maioritario ao funcionamento de servizos públicos esenciais e á protección do interese xeral. Este, por Acordo do 24 de abril de 2020, determinou a continuación da tramitación de determinados expedientes e procedementos en materia de subvencións, no eido da Administración xeral e das entidades instrumentais do sector público autonómico.
O día 30 de abril de 2020, por acordo do Consello da Xunta de Galicia, apróbase o Plan de reactivación dos sectores cultural e turístico fronte aos efectos derivados da COVID-19, e adóptase un paquete de medidas dirixidas ao sector cultural co obxectivo de paliar esta crise e de reactivar o sector cultural e turístico que se fixo público o día 5 de maio de 2020.
Entre as medidas que recolle o plan atópanse as de apoio ao sector audiovisual, o que supón novos investimentos, reconfigurar o orzamento público e desenvolver medidas especificas para darlles resposta ás necesidades actuais dos sectores cultural e turístico galego, a través da modificación extraordinaria das convocatorias de axudas ao audiovisual. En canto á convocatoria de axudas ao talento audiovisual galego, acórdase a ampliación do número de curtas e guións apoiados na convocatoria 2020, mediante a modificación das bases.
Así mesmo, no ámbito estatal, o día 6 de maio de 2020, publícase o Real decreto lei 17/2020, do 5 de maio, polo que se aproban medidas de apoio ao sector cultural e de carácter tributario para facer fronte ao impacto económico e social da COVID-19, e se adaptan ás xa existentes, para protección tanto de traballadores como para as empresas, especialmente os autónomos e pemes do sector cultural e, dentro deste, do audiovisual.
Por estes motivos, a Axencia Galega das Industrias Culturais considera necesaria a modificación da convocatoria para ano 2020 das subvencións de creación audiovisual para o desenvolvemento e a promoción do talento audiovisual galego.
Na súa virtude, e de conformidade coas facultades que teño conferidas,
RESOLVO:
Modificar a Resolución do 18 de decembro de 2019 pola que se establecen as bases reguladoras, en réxime de concorrencia competitiva, para a concesión de subvencións de creación audiovisual para o desenvolvemento e a promoción do talento audiovisual galego, e se convocan para o ano 2020 no sentido seguinte:
Primeiro. A base sexta, puntos 2 e 4, quedan redactadas como segue:
«2. Para a concesión das subvencións destínase un crédito global de 178.000 euros, correspondente ás aplicacións seguintes dos orzamentos da Axencia Galega das Industrias Culturais, que irán repartidas, 48.000 con cargo á aplicación orzamentaria 2020.11.A1.432B.470.0, 40.000 euros con cargo á aplicación orzamentaria 2020.11.A1.432B.480.0 e 90.000 euros da aplicación orzamentaria 11.A1.432B.770.0, distribuídos en dúas anualidades: 15.000 euros da anualidade 2020 e 75.000 euros da anualidade 2021».
«4. O crédito distribuirase do seguinte xeito entre as distintas modalidades:
– 8 proxectos da modalidade A (5.000 euros).
– 8 proxectos da modalidade B (6.000 euros).
– 3 proxectos da modalidade C (30.000 euros)».
Santiago de Compostela, 25 de xuño de 2020
Román Rodríguez González
Conselleiro de Cultura e Turismo