Con data do 25 de novembro de 2019, publicouse no Diario Oficial de Galicia a Orde do 12 de novembro de 2019 pola que se establecen as bases reguladoras e se procede á convocatoria para a concesión de mención de excelencia a titulacións universitarias oficiais de máster, impartidas polas universidades do Sistema universitario de Galicia no curso académico 2019/20.
Con data do 24 de decembro de 2019 publicouse no Diario Oficial de Galicia a Orde do 12 de decembro de 2019 pola que se amplía o prazo de presentación de solicitudes da Orde do 12 de novembro de 2019. De acordo co establecido na artigo 1 da orde amplíase ata o día 15 de febreiro de 2020, incluído, o prazo de presentación de solicitudes previsto no punto 2 do artigo 4 da Orde do 12 de novembro de 2019 pola que se establecen as bases reguladoras.
Rematado o prazo para a entrega da documentación complementaria necesaria para a tramitación do procedemento establecido no artigo 5 da Orde de 12 de decembro de 2019 foron analizadas as solicitudes pola comisión avaliadora prevista no artigo 8 da orde da convocatoria.
Tendo en conta o anteriormente exposto e atendendo á proposta de resolución da Secretaría Xeral de Universidades, esta consellería
RESOLVE:
Primeiro. Concederlles a mención de Máster Universitario Excelente da Xunta de Galicia ás titulacións universitarias oficiais de máster, impartidas polas universidades do Sistema universitario de Galicia no curso académico 2019/20, que se relacionan no anexo da presente orde.
Segundo. As universidades responsables dos títulos comprométense a manter os requisitos que deron lugar á obtención da puntuación mínima para acadar a mención de Máster Universitario Excelente da Xunta de Galicia.
Así mesmo, os responsables dos títulos comprométense a incluír as medidas e modificacións necesarias, segundo o procedemento establecido para a modificación de títulos universitarios, derivadas do compromiso de inclusión dun módulo vinculado directamente cunha formación en emprendemento e autoemprego, establecida no artigo 9, epígrafe f).
Terceiro. Contra esta resolución, que esgota a vía administrativa, as universidades poderán interpoñer recurso potestativo de reposición ante a conselleira de Educación, Universidade e Formación Profesional no prazo dun mes contado a partir do día seguinte ao da publicación da resolución no DOG, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou directamente o recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 2 de xullo de 2020
Carmen Pomar Tojo
Conselleira de Educación, Universidade e Formación Profesional
ANEXO
Titulación |
Facultade/escola |
Universidade |
MU en Bioloxía Molecular, Celular e Xenética |
Facultade de Ciencias |
Universidade da Coruña |
MU en Enxeñaría Ambiental |
Escola Técnica Superior de Enxeñaría |
Universidade de Santiago de Compostela |
MU en Enxeñaría Informática |
Facultade de Informática |
Universidade da Coruña |