Por Resolución da Dirección Xeral de Recursos Humanos do Servizo Galego de Saúde, do 22 de xuño de 2020 (Diario Oficial de Galicia núm. 128, do 30 de xuño) publicouse a relación de aspirantes definitivamente seleccionados/as no concurso-oposición para o ingreso na categoría de grupo auxiliar da función administrativa, e iniciouse o prazo para a elección de destino.
A base novena da Resolución do 1 de marzo de 2018 (Diario Oficial de Galicia núm. 51, do 13 de marzo), de convocatoria do proceso dispón que o/a aspirante que, no prazo e conforme o procedemento que se estableza non seleccionase todos os destinos que se oferten pola orde de prelación que considere, e non resultase adxudicatario/a de ningún polos que optase, non poderá ser nomeado/a, e quedarán sen efecto todas as súas actuacións. Neste suposto, a autoridade convocante procederá ao chamamento de novos/as aspirantes, no número que se corresponda coas prazas ofertadas e non elixidas, coa finalidade de que manifesten a súa opción por elas, logo de acreditación do cumprimento dos requisitos exixidos. Esta opción realizarase pola orde de prelación que resulte da lista definitiva.
Finalizado o prazo para a elección de destino previsto na Resolución do 22 de xuño de 2020, este centro directivo, de conformidade coa antedita base
RESOLVE:
Primeiro. En cumprimento da base 9.8 da Resolución da Dirección Xeral de Recursos Humanos do 1 de marzo de 2018 (Diario Oficial de Galicia núm. 51, do 13 de marzo), pola que se convoca concurso oposición para o ingreso na categoría de grupo auxiliar da función administrativa, excluír deste proceso selectivo as aspirantes Mª Nieves García Martínez con DNI ***2348** e Mª José Pulido Araújo, con DNI ***7920** por non ter seleccionado no prazo e conforme o procedemento establecido ningún dos destinos ofertados.
Segundo. Declarar como aspirantes seleccionadas, na categoría de grupo auxiliar da función administrativa, quenda de acceso libre a Ana Mª González Gómez, con DNI ***6725** e Mª Manuela Maneiro Alvite, con DNI ***8061**, requiríndoselles para que no prazo indicado na base 9.1 da Resolución do 1 de marzo de 2018, de convocatoria do proceso presenten en rexistro administrativo ou a través de calquera dos procedementos previstos no artigo 16 da Lei 39/2015, do 1 de outubro, dirixida á Dirección Xeral de Recursos Humanos, a seguinte documentación:
a) Declaración baixo a súa responsabilidade de non ter sido separadas do servizo, mediante expediente disciplinario, de calquera servizo de saúde ou Administración pública nos seis anos anteriores á convocatoria, nin estar inhabilitadas con carácter firme para o exercicio de funcións públicas nin, de ser o caso, para a correspondente profesión.
b) Certificado médico oficial en que se acredite a capacidade funcional necesaria para o desempeño das funcións propias da categoría.
c) Por exixencia do artigo 13 da Lei orgánica 1/1996, do 15 de xaneiro, de protección xurídica do menor, segundo a redacción efectuada pola Lei 26/2015, do 28 de xullo, certificación do Rexistro Central de Delincuentes Sexuais dependente do Ministerio de Xustiza de non ter sido condenadas por sentenza firme por algún delito contra a liberdade e indemnidade sexual ou, na súa falta, autorización escrita ao Servizo Galego de Saúde para consultar os datos contidos no citado rexistro e solicitar no seu nome a oportuna certificación.
Esta autorizacion deberá prestarse no modelo que para o efecto consta na páxina web do Servizo Galego de Saúde, na epígrafe relativa a emprego público (www.sergas.es/emprego público).
d) Declaración xurada ou promesa de non ter a condición de persoal estatutario fixo da mesma categoría a que se opta.
Se, dentro do prazo fixado pola base 9.1 da resolución de convocatoria, non presentasen a documentación ou do exame dela se deducise que carecen dalgún dos requisitos para participar no proceso selectivo, non poderán ser nomeadas persoal estatutario fixo e quedarán anuladas as súas actuacións, sen prexuízo da responsabilidade en que incorresen por falsidade na solicitude inicial.
Terceiro. Declarar como destinos pendentes de adxudicación, logo de finalizado o prazo previsto na Resolución do 22 de xuño de 2020, os seguintes: Centro directivo A.S de Lugo, A Mariña e Monforte de Lemos. Centro: Hospital Público da Mariña. Concello: Burela. Número de prazas: 2.
Cuarto. Contra a presente resolución, que pon fin á vía administrativa, poderase interpoñer recurso potestativo de reposición ante este órgano directivo, no prazo dun mes a partir do día seguinte á súa publicación, de conformidade co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou poderase impugnar directamente na xurisdición contencioso-administrativa nos termos da Lei 29/1998, do 13 de xullo.
Santiago de Compostela, 21 de xullo de 2020
Margarita Prado Vaamonde
Directora xeral de Recursos Humanos
