Expediente: IN407A 2015/167-1.

Promotora: UFD Distribución Electricidad, S.A.

Instalación: anexo 1 da modificación 1 do proxecto para o recuamento da LMT VIM-802, no lugar de San Tirso.

Concello: Zas.

Feitos:

1. O 23 de marzo do 2017, UFD Distribución Electricidad, S.A. solicitou a autorización administrativa previa, a autorización administrativa de construción e a declaración de utilidade pública da instalación de distribución eléctrica: modificación 1 do proxecto de recuamento da LMT VIM-802 no lugar de San Tirso. Con data do 13 de febreiro do 2019, esta xefatura territorial concedeulle a dita autorización para o proxecto.

Con posterioridade, o 23 de abril do 2020, a empresa promotora solicitou a autorización administrativa previa, a autorización administrativa de construción e a declaración de utilidade pública da instalación de distribución eléctrica: anexo 1 da modificación 1 do proxecto para o recuamento da LMT VIM-802, no lugar de San Tirso.

2. O proxecto someteuse ao trámite de información pública mediante resolución publicada nos seguintes medios:

– Acordo de información pública: 4 de maio de 2020.

– DOG: 26 de maio de 2020.

– BOP: 12 de maio de 2020.

– Xornal La Voz de Galicia: 20 de maio de 2020.

– Taboleiro de anuncios do concello: segundo certificado municipal da secretaria municipal do Concello de Zas do 21 de xullo de 2020.

3. Durante o período en que se someteu o proxecto ao trámite de información pública non se presentou ningunha alegación, reclamación ou suxestión relacionada coa documentación obxecto de publicación.

4. Solicitouse o preceptivo informe ás distintas administracións, organismos ou, de ser o caso, empresas de servizo público ou de servizos de interese xeral afectadas, isto é, o Servizo de Xestión Cultural-Xefatura Territorial da Consellería de Cultura e Turismo da Coruña e o Concello de Zas. A empresa promotora manifestou a súa conformidade co condicionado establecido polo organismo afectado de Patrimonio Cultural. A día de hoxe, non consta no expediente resposta do organismo afectado, a saber, o Concello, á solicitude nin á reiteración do condicionado solicitado.

5. Os servizos técnicos da Xefatura Territorial emitiron informe favorable sobre a solicitude de autorización.

Consideracións legais e técnicas:

1. Lexislación de aplicación:

– Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).

– Lei 40/2015, do 1 de outubro, de réxime xurídico do sector público (BOE núm. 236, do 2 de outubro).

– Lei 24/2013, do 26 de decembro, do sector eléctrico (BOE núm. 310, do 27 de decembro).

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica (BOE núm. 310, do 27 de decembro).

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguranza en instalación eléctricas de alta tensión e as súas instrucións técnicas complementarias ITC-LAT 01 a 09 (BOE núm. 68, do 19 de marzo).

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguranza en instalacións eléctricas de alta tensión e as súas instrucións técnicas complementarias ITC-RAT 01 a 23 (BOE núm. 139, do 9 de xuño).

– Real decreto 842/2002, do 2 de agosto, polo que se aproba o Regulamento electrotécnico para baixa tensión (BOE núm. 224, do 18 de setembro).

– Real decreto 2563/1982, do 24 de xullo, sobre traspaso de funcións e servizos da Administración do Estado á Comunidade Autónoma de Galicia en materia de industria, enerxía e minas (BOE núm. 246, do 14 de outubro2).

– Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).

– Decreto 146/2016, do 13 de novembro, polo que se establece a estrutura orgánica da Xunta de Galicia (DOG núm. 217, do 14 de novembro).

– Decreto 135/2017, do 28 de decembro, polo que se establece a estrutura orgánica da Consellería de Economía, Emprego e Industria (DOG núm. 18, do 25 de decembro).

– Lei do 16 de decembro de 1954, sobre expropiación forzosa (BOE núm. 351, do 17 de decembro).

– Decreto do 26 de abril de 1957, polo que se aproba o regulamento da Lei de expropiación forzosa (BOE núm. 160, do 20 de xuño).

2. Características técnicas:

– Retensamento do treito de liña eléctrica de media tensión aérea VIM-802, entre os apoios número 64-20-24 e número 64-20-25 (actuación número: 1) a 20 kV cunha lonxitude de 0,072 km, con orixe no apoio número 64-20-24 existente da LMT VIM-802, no treito entre a derivada ao CT Orbellido II (expediente 50.294) e a derivada ao CT Couto (expediente 50.804), condutor tipo LA-30 mm² (existente) e remate no apoio número 64-20-25 para intercalar na LMT VIM-802, no treito entre a derivada ao CT Orbellido e a derivada ao CT Couto.

– Treito de liña eléctrica de media tensión aérea VIM-802 entre os apoios número 64-20-26-1 e número 64-20-26 (actuación número: 2) a 20 kV cunha lonxitude de 0,041 km, con orixe no apoio número 64-20-26-1 que substitúe o existente da LMT VIM-802 no treito da derivada ao CT Couto, condutor tipo LA-30 mm² e remate no número 64-20-26 proxectado que substitúe o existente da LMT VIM-802, apoio onde na actualidade se realiza o recuamento da derivada ao CT Couto.

– Liña de media tensión soterrada a 20 kV cunha lonxitude de 0,242 km, con orixe no paso aéreo a soterrado que se vai realizar no apoio número 64-20-25 proxectado para intercalar na LMT VIM-802, no treito entre a derivada ao CT Orbellido II e a derivada ao CT Couto, en condutor RHZ1-2OL-12/20 kV-1×240 Al e remate no paso de soterrado a aéreo que se vai realizar no apoio número 64-20-26-1 proxectado que substitúe o existente da LMT VIM-802, no treito da derivada ao CT Couto.

3. Na visita de campo realizada para examinar o lugar da instalación non se apreciou, nos predios sometidos a expropiación, ningunha das limitacións á constitución da servidume sinaladas no artigo 58.a) da Lei 24/2013, do 26 de decembro, do sector eléctrico.

4. No expediente consta un informe favorable dos servizos técnicos desta xefatura territorial.

Consonte todo o indicado,

RESOLVO:

1. Conceder a autorización administrativa previa, a autorización administrativa de construción e a declaración de utilidade pública, en concreto, da dita instalación de distribución eléctrica.

2. A instalación executarase no prazo dun ano, contado a partir da data de ocupación dos terreos.

A declaración de utilidade pública leva implícita a necesidade de ocupación dos bens e de adquisición dos dereitos afectados e implicará a urxente ocupación, para os efectos do artigo 52 da Lei de expropiación forzosa.

3. Para a posta en funcionamento da instalación autorizada, deberá achegar ante esta xefatura territorial unha solicitude á cal xuntará a seguinte documentación:

– As declaracións de conformidade relativas ao material ou equipamento e as certificacións ou homologacións, se procede.

– Un certificado do/da director/a da montaxe en que se garantirá o cumprimento das especificacións do proxecto e prescricións complementarias, se as houber, así como das regulamentacións e normas oportunas para a montaxe da instalación e posta a punto.

4. Esta autorización outórgase sen prexuízo doutras que sexan de aplicación segundo a lexislación vixente, en especial as relativas á ordenación do territorio e ao ambiente.

Contra esta resolución, que non é definitiva en vía administrativa, poderá interporse recurso de alzada ante o conselleiro de Economía, Emprego e Industria, no prazo dun (1) mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que xulguen pertinente.

Mediante este documento notifícase á empresa promotora esta resolución, segundo o exixido no artigo 40.1 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).

A Coruña, 20 de agosto do 2020

Isidoro Martínez Arca
Xefe territorial da Coruña