O 18 de febreiro de 2020 publicouse no Diario Oficial de Galicia a Resolución do 31 de decembro de 2019 pola que se establecen as bases reguladoras para a concesión, en réxime de concorrencia competitiva, das axudas para o fortalecemento dos centros de xeración de coñecementos aliñadas cos retos estratéxicos e prioridades identificadas na RIS3 para Galicia, cofinanciadas polo Fondo Europeo de Desenvolvemento Rexional (Feder) no marco do programa operativo Feder Galicia 2014-2020, e se convocan para o ano 2020.

O artigo 25.2 da Resolución do 31 de decembro de 2019 establecía os seguintes prazos de xustificación:

«2. Os prazos de xustificación das axudas son os seguintes:

a) Períodos de emisión de facturas (realización de gastos) e realización de pagamentos executados:

Primeira anualidade	Desde a data de presentación da solicitude ata o 30 de setembro de 2020
Segunda anualidade	Desde o 1 de outubro de 2020 ata o 30 de setembro de 2021

b) Prazos de presentación de documentación:

Primeira anualidade	Ata o 9 de outubro de 2020
Segunda anualidade	Ata o 8 de outubro de 2021

O 17 de setembro de 2020 publicouse no Diario Oficial de Galicia a Resolución do 9 de setembro de 2020 pola que se adxudican as axudas da Resolución do 31 de decembro de 2019 para o fortalecemento dos centros de xeración de coñecemento. Tendo en conta a data da resolución de concesión destas axudas, os prazos de xustificación e execución dos gastos/pagamentos da anualidade 2020 establecidos no citado artigo 25.2 da convocatoria quedan moi reducidos, polo que se considera necesario ampliar estes prazos para viabilizar os procesos de execución e xustificación das axudas concedidas para o ano 2020.

En consecuencia, no exercicio das facultades que lle confire o artigo 17.3 do Decreto 50/2012, do 12 de xaneiro, polo que se crea a Axencia Galega de Innovación,

RESOLVO:

Artigo único. Modificación do artigo 25.2 da Resolución do 31 de decembro de 2019 pola que se establecen as bases reguladoras para a concesión, en réxime de concorrencia competitiva, das axudas para o fortalecemento dos centros de xeración de coñecemento aliñadas cos retos estratéxicos e prioridades identificadas na RIS3 para Galicia, cofinanciadas polo Fondo Europeo de Desenvolvemento Rexional (Feder) no marco do programa operativo Feder Galicia 2014-2020, e se procede á súa convocatoria para o ano 2020

O artigo 25.2 da citada resolución queda redactado do seguinte xeito:

«2. Os prazos de xustificación das axudas son os seguintes:

a) Períodos de emisión de facturas (realización de gastos) e realización de pagamentos executados:

Primeira anualidade	Desde a data de presentación da solicitude ata o 16 de decembro de 2020
Segunda anualidade	Desde o 17 de decembro de 2020 ata o 30 de setembro de 2021

b) Prazos de presentación de documentación:

Primeira anualidade	Ata o 22 de decembro de 2020
Segunda anualidade	Ata o 8 de outubro de 2021

Disposición derradeira única. Entrada en vigor

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 22 de setembro de 2020

Patricia Argerey Vilar
Directora da Axencia Galega de Innovación