A Consellería de Política Social está a tramitar o Proxecto de orde pola que se regula a presentación e a comunicación de queixas e reclamacións en materia de servizos sociais.
Na súa virtude, de conformidade co disposto no artigo 42 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e co fin de garantir unha maior participación da cidadanía neste trámite administrativo,
RESOLVO:
Primeiro. Someter a información pública, durante un prazo de quince (15) días hábiles contados desde o día seguinte ao da publicación deste anuncio no Diario Oficial de Galicia, o Proxecto de orde pola que se regula a presentación e a comunicación de queixas e reclamacións en materia de servizos sociais.
Segundo. O texto do proxecto de orde poderá consultarse no portal de transparencia da Xunta de Galicia:
http://transparencia.xunta.gal/tema/informacion-de-relevancia-xuridica/normativa-en-tramitacion/en-prazo-de-envio-desuxestions
Terceiro. As persoas físicas e xurídicas interesadas e a cidadanía en xeral poderán presentar as proposicións, as suxestións ou as recomendacións que consideren oportunas a este proxecto de orde na seguinte ligazón do portal de transparencia da Xunta de Galicia: http://transparencia.xunta.gal/tema/informacion-de-relevancia-xuridica/normativa-en-tramitacion/en-prazo-de-envio-desuxestions, ou coa súa presentación a través do procedemento PR004A-Presentación electrónica de solicitudes, escritos e comunicacións que non conten cun sistema electrónico específico nin cun modelo electrónico normalizado, na sede electrónica da Xunta de Galicia (https://sede.xunta.gal/tramites-e-servizos/solicitude-xenerica).
Así mesmo, as persoas físicas non obrigadas ao emprego dos medios electrónicos poderán presentar as súas proposicións, as suxestións ou as recomendacións a través de escrito en calquera dos lugares previstos no artigo 16.4 da Lei 39/2015, do 1 de outubro, do procedemento administrativo común das administracións públicas, dirixido á Secretaría Xeral Técnica da Consellería de Política Social, Edificio Administrativo San Caetano, s/n, 15781 Santiago de Compostela.
Santiago de Compostela, 28 de setembro de 2020
María Francisca Gómez Santos
Secretaria xeral técnica da Consellería de Política Social