Con base no artigo 37.3 da Lei 6/2019, do 23 de decembro, de orzamentos xerais da Comunidade Autónoma de Galicia para o ano 2020, autorízase a persoa titular da Consellería de Facenda e Administración Pública para formalizar operacións de endebedamento mediante a emisión de débeda pública, a concertación de créditos ou calquera outro instrumento financeiro dispoñible no mercado.

Así mesmo, no artigo 33 do texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, establécese que as emisións de débeda pública ou operacións de crédito que realice a Comunidade terán que ser autorizadas, en todo caso, polo conselleiro de Economía e Facenda dentro dos límites sinalados pola lei, á cal lle corresponderá, así mesmo, autorizar as súas características técnicas e o seu tipo de xuro, se estes non fosen determinados pola súa lei de creación. A dita facultade correspóndelle na actualidade ao conselleiro de Facenda e Administración Pública en virtude do Decreto 110/2020, do 6 de setembro, polo que se establece a estrutura orgánica da Xunta de Galicia; do Decreto 130/2020, do 17 de setembro, polo que se fixa a estrutura orgánica das vicepresidencias e das consellerías da Xunta de Galicia, e do Decreto 30/2017, do 30 de marzo, polo que se establece a estrutura orgánica da Consellería de Facenda e Administración Pública.

Mediante o Acordo do Consello de Ministros, do 28 de xullo de 2020, outorgouse a autorización establecida no artigo 14.3 da Lei orgánica 8/1980, do 22 de setembro, de financiamento das comunidades autónomas. Así mesmo, o 20 de outubro de 2020, mediante resolución do director xeral do Tesouro e Política Financeira concedéuselle autorización específica da Secretaría Xeral do Tesouro e Financiamento Internacional, para cumprir o establecido na Resolución do 4 de xullo de 2017, de prudencia financeira.

Por todo isto,

DISPOÑO:

Artigo único

Autorízase unha emisión de débeda da Comunidade Autónoma de Galicia (a emisora) por un importe nominal de 150 millóns de euros. Esta emisión realízase baixo a forma de obrigacións sénior, non garantidas e non subordinadas da Xunta de Galicia (as «Obrigacións»), representadas mediante anotacións en conta, ao abeiro do artigo 59 e seguintes do Real decreto lexislativo 4/2015, do 23 de outubro, polo que se aproba o texto refundido da Lei do mercado de valores.

A emisión de débeda pública que se autoriza terá as características que se detallan a continuación:

Importe nominal da emisión: cento cincuenta (150) millóns de euros.

Modalidade: obrigacións.

Procedemento de emisión: colocación privada, non asegurada.

Divisa: euro.

Data de emisión e desembolso: 27 de outubro de 2020.

Data de vencemento: 31 de outubro de 2025.

Prezo de emisión por obrigación: 100,831% do importe nominal de cada obrigación.

Importe nominal de cada obrigación: mil (1.000) euros.

Desembolso: o desembolso da emisión das obrigacións será realizado a través da entidade colocadora da emisión na data de emisión e desembolso.

Cupón: tipo de xuro nominal fixo do 0,00 %, base Act/Act ICMA, non axustado.

Convención de día hábil: cando unha data de pagamento teña a consideración de día inhábil no sistema TARGET 2 de pagamentos europeo, ou aquel que poida substituílo no futuro, o pagamento dos cupóns e o reembolso pola amortización das obrigacións efectuarase no día hábil seguinte segundo o calendario do dito sistema, agás que isto implique trasladalo ao mes seguinte, caso en que se producirá o inmediato día hábil anterior. O tedor dos valores non terá dereito a percibir xuros como consecuencia dese posible axuste.

Nos casos en que, segundo a lexislación vixente, sexa aplicable a devolución da retención efectuada nos cupóns desta emisión, será o Banco de España quen xestione o correspondente procedemento, segundo se establece na Orde da Consellería de Economía e Facenda, do 16 de xuño de 2004, publicada no Diario Oficial de Galicia o día 18 de xuño de 2004.

Representación das obrigacións: as obrigacións están representadas mediante anotacións en conta rexistradas a través do Sistema de Rexistro, Compensación e Liquidación do Mercado de Renda Fixa AIAF, xestionado pola Sociedad de Gestión de los Sistemas de Registro, Compensación y Liquidación de Valores, S.A. (Iberclear).

Negociación dos valores: Mercado de Renda Fixa AIAF.

Fiscalidade: de conformidade co previsto no artigo 14.5 da Lei orgánica 8/1980, do 22 de setembro, de financiamento das comunidades autónomas, esta emisión goza dos mesmos beneficios e condicións que a débeda pública do Estado.

Amortización das obrigacións: as obrigacións serán amortizadas na súa totalidade á par, na data de vencemento, o 31 de outubro de 2025.

Pagamento de amortización: o pagamento da amortización da débeda será realizado polo Banco de España consonte o establecido no Convenio marco do 7 de novembro de 2005, sobre prestación do servizo de tesouraría e do servizo financeiro da débeda pública.

Lei aplicable: as obrigacións e todas as cuestións que deriven ou garden relación coas obrigacións rexeranse e interpretaranse de conformidade coas leis españolas.

Xurisdición: os xuíces e tribunais da cidade de Santiago de Compostela teñen xurisdición exclusiva para resolver calquera disputa que xurda ou estea relacionada coas obrigacións.

Disposición derradeira

Esta orde terá efectos desde o mesmo día da súa publicación no Diario Oficial de Galicia.

Santiago de Compostela, 26 de outubro de 2020

Valeriano Martínez García
Conselleiro de Facenda e Administración Pública