BDNS (Identif.): 519667.
De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo se pode consultar na Base de datos nacional de subvencións (BDNS) (http://www.pap.minhap.gob.es/bdnstrans/index).
Primeiro. Modificación de beneficiarios
Modifícase o punto 1 do artigo 1 de Beneficiarios, que queda redactado do seguinte xeito:
1. Poderán ser beneficiarios dos préstamos regulados nestas bases aquelas pequenas, medianas ou microempresas conforme a definición establecida pola Comisión Europea no anexo I do Regulamento (UE) 651/2014 (DOUE L 187, do 26 de xuño), da Comisión, do 17 de xuño de 2014, polo que se declaran determinadas categorías de axuda compatibles co mercado interior en aplicación dos artigos 107 e 108 do Tratado UE (en diante, Regulamento (UE) 651/2014), que cumpran os seguintes requisitos:
a) Realizar unha iniciativa empresarial nun centro de traballo, obxecto do proxecto de investimento, localizado na Comunidade Autónoma de Galicia, salvo nas modalidades de préstamos que no anexo I eximan expresamente deste requisito.
b) Cumprir as condicións establecidas especificamente para a correspondente modalidade de préstamo, conforme os requisitos que se detallan no anexo I.
c) Achegar para o proxecto de investimento unha contribución financeira mínima do 25 % do proxecto, exenta de calquera tipo de apoio público.
En préstamos destinados ao financiamento de capital de explotación non será de aplicación este requisito nin tampouco necesaria a execución dun proxecto de investimento. As referencias realizadas nestas bases ao «proxecto de investimento» e a «conceptos de investimento» entenderanse realizadas ao «proxecto financiable» e a «conceptos financiables».
Segundo. Modificación do importe
Establécese a liña de préstamos directos do Igape Préstamos IFI extraordinarios COVID-19, polo importe máximo de 10.000.000 €, con cargo á partida orzamentaria 09.A1-741A-8310 e cos seguintes importes e distribución plurianual: 2.000.000 € para o ano 2020 e 8.000.000 € para o ano 2021.
Santiago de Compostela, 13 de novembro de 2020
A xerencia do Instituto Galego de Promoción Económica
P.S. (Resolución do 25.9.2020)
Norberto Penedo Rey
Director da Área de Competitividade
