O 2 de xullo de 2020, no DOG número 130, publicouse a Resolución do 30 de xuño de 2020 pola que se determinan as condicións de adhesión das empresas turísticas ao programa Bono turístico #QuedamosenGalicia e se abre o prazo para a presentación das solicitudes de participación (código de procedemento TU985A).

Ao abeiro do punto terceiro da citada resolución, os servizos, actividades ou produtos turísticos poden prestarse desde o día da entrega pola entidade colaboradora da tarxeta prepago aos beneficiarios e ata o 13 de decembro de 2020, día en que este programa quedará extinguido, e conforme o punto quinto o prazo de presentación das solicitudes de adhesión das empresas turísticas estará aberto desde o día seguinte ao da publicación da resolución no DOG ata a finalización do programa, o 13 de decembro de 2020.

Pola súa banda, o 27 de xullo de 2020, no DOG número 149, publicouse a Resolución do 22 de xullo de 2020 pola que se establece o procedemento de concesión da tarxeta Bono turístico #QuedamosenGalicia (código de procedemento TU985B), na cal en concordancia co anterior se establece que a tarxeta se poderá utilizar ata o 13 de decembro de 2020, data en que o programa quedará extinguido.

Así mesmo, o punto terceiro da resolución dispón que o prazo de presentación de solicitudes estará aberto a partir do día seguinte ao da publicación da mencionada resolución e ata o día 30 de novembro de 2020 (incluído).

O citado programa forma parte das medidas recollidas no Plan de reactivación dos sectores cultural e turístico fronte aos efectos derivados da COVID-19, que se elabora coa finalidade de impulsar a recuperación económica e a reactivación dos sectores culturais e turístico, fomentando o emprego e inxectando liquidez no tecido empresarial.

O procedemento de concesión do bono turístico é de outorgamento de subvencións en concorrencia non competitiva, ao abeiro do disposto no artigo 19.2 da Lei 9/2007, do 13 de xuño, de subvencións de Galicia, atendendo á orde de presentación de solicitudes ata o esgotamento do crédito previsto na Resolución do 22 de xullo de 2020.

Dadas as medidas que se están a adoitar no territorio da Comunidade Autónoma de Galicia para facer fronte á crise sanitaria derivada do COVID-19, que están a supor limitacións á mobilidade da poboación, así como o peche de establecementos, resulta preciso ampliar os prazos establecidos nas resolucións antes indicadas para o uso das tarxetas e para presentar solicitudes, de xeito que se logre o obxectivo perseguido co programa e as persoas beneficiarias que teñan concedida a tarxeta poidan facer uso dela.

Polo exposto, e ao abeiro das competencias que me foron conferidas,

RESOLVO:

1. Ampliar o prazo de utilización da tarxeta do Bono turístico #QuedamosenGalicia ata o 31 de maio de 2021 (incluído), data en que o programa quedará extinguido.

2. Ampliar o prazo de presentación de solicitudes para a concesión da tarxeta ata o 10 de decembro de 2020 (incluído).

3. Ampliar o prazo de presentación das solicitudes de adhesión das empresas turísticas ata o 31 de maio de 2021, data da finalización do programa.

Santiago de Compostela, 20 de novembro de 2020

Mª Nava Castro Domínguez
Directora da Axencia Turismo de Galicia