Visto o expediente para outorgamento de autorización administrativa previa e autorización administrativa de construción para a instalación eléctrica que a seguir se describe:
Solicitante: Electra Alto Miño Distribuidora de Energía, S.L.
Domicilio social: polígono industrial Chan da Ponte, parcela 19, 36450 Salvaterra de Miño.
Denominación: centro de repartición e seccionamento LMT xeral Salvaterra-Ponteareas.
Situación: Salvaterra de Miño.
Características técnicas: centro de repartición e seccionamento (CRS) en caseta prefabricada, con catro celas compactas Sf6, situado xunto ao apoio 13 da LMT Salvaterra-Ponteareas. Instalación de catro liñas, con condutor RHZ1, de conexión coa rede existente: 1 de entrada - 30 metros, orixe paso aéreo subterráneo (PAS) no apoio 13 da LMTA Salvaterra-Ponteareas; final CRS proxectado e 3 de saída - 125, 30 e 40 metros, con orixe no CRS proxectado e final en PAS no apoio 14 da LMT Salvaterra-Ponteareas, PAS no apoio 13 derivación Alxén e centro de transformación existente Casal-B respectivamente. A instalación está situada en Outeiro, San Lorenzo, Salvaterra de Miño.
Cumpridos os trámites ordenados na Lei 24/2013, do 26 de decembro, do sector eléctrico, e no capítulo II do título VII do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, e na Lei 5/2017, do 19 de outubro, de fomento da implantación de iniciativas empresariais en Galicia, DOG núm. 203, do 25 de outubro de 2017, esta xefatura territorial resolve:
Conceder autorización administrativa previa e autorización administrativa de construción para a dita instalación, cuxas características se axustarán en todas a súas partes ás que figuran no proxecto de execución e ás condicións técnicas e de seguridade establecidas nos regulamentos de aplicación, e nos condicionados establecidos polos ministerios, organismos ou corporacións que constan no expediente.
Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.
Contra a presente resolución, que non é definitiva en vía administrativa, cabe interpoñer recurso de alzada ante o vicepresidente segundo e conselleiro de Economía, Empresa e Innovación no prazo dun (1) mes, contado a partir do día seguinte ao da notificación ou publicación desta resolución, conforme o establecido no artigo 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.
Pontevedra, 9 de novembro de 2020
O xefe territorial de Pontevedra
P.A. (Decreto 135/2017, artigos 62.3 e 63.1)
Ana María Rodríguez Senra
Xefa do Servizo de Coordinación Administrativa e Xestión Económica
Disposición transitoria segunda do Decreto 130/2020, do 17 de setembro.