O Real decreto 558/2020, do 9 de xuño, polo que se modifican distintos reais decretos que establecen normativa básica de desenvolvemento de regulamentos da Unión Europea en materia de froitas e hortalizas e vitivinicultura, modifica o Real decreto 1363/2018, do 2 de novembro, para a aplicación das medidas do programa de apoio 2019-2023 ao sector vitivinícola español, o que fai necesario que se modifique a Orde do 26 de decembro de 2019 pola que se establecen as bases reguladoras das axudas aos plans de reestruturación e reconversión da viña en Galicia, e se convocan para o ano 2020 (código de procedemento MR446A).
O artigo 30 da Orde do 26 de decembro de 2019 pola que se establecen as bases reguladoras das axudas aos plans de reestruturación e reconversión da viña en Galicia establece que o financiamento das axudas procede do Fondo Europeo Agrícola de Garantía (Feaga) e que se efectuará con cargo á aplicación orzamentaria dos orzamentos da Comunidade Autónoma de Galicia 14.04.713C 772.1, cun importe de douscentos sesenta e cinco mil euros (265.000 €) para o ano 2020, de douscentos sesenta e cinco mil euros (265.000 €) para o ano 2021 e de cincocentos noventa e cinco mil euros (595.000 €) para o ano 2022. En total, un millón cento vinte e cinco mil euros (1.125.000 €). Tamén se recolle a posibilidade de incrementar a dotación orzamentaria segundo se establece no artigo 31 da Lei 9/2007, do 13 de xuño, de subvención de Galicia.
Co obxecto de poder amparar o maior número de solicitudes, e posto que a dotación inicial resulta insuficiente, tramítase o correspondente expediente de ampliación de crédito polo que cómpre, mediante esta orde, incrementar a dotación orzamentaria consignada inicialmente para a concesión das mencionadas subvencións dada a existencia de incorporación de crédito no mesmo programa.
En consecuencia, de conformidade co previsto no artigo 30.1.3 do Estatuto de autonomía de Galicia, en uso das facultades que me confire a Lei 9/2007, do 13 de xuño, de subvencións de Galicia, e das competencias que me confire a Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo 1. Modificación da Orde do 4 de abril de 2018 pola que se establecen as bases reguladoras das axudas aos plans de reestruturación e reconversión da viña en Galicia, e se convocan para o ano 2018
A Orde do 4 de abril de 2018 pola que se establecen as bases reguladoras das axudas aos plans de reestruturación e reconversión da viña en Galicia, e se convocan para o ano 2018, queda redactada como segue:
Un. Engádese un número 7 ao artigo 13, coa seguinte redacción:
No exercicio Feaga 2020 serán admisibles, en casos debidamente xustificados relacionados coa crise sanitaria provocada pola COVID-19, e referentes ás operacións en curso, a presentación de modificacións que non afecten nin a elixibilidade dalgunha parte da operación nin os seus obxectivos, e que non supoñan un incremento de orzamento inicialmente aprobado. Os beneficiarios comunicarán esta modificación á autoridade competente como moi tarde xunto coa solicitude de pagamento da operación. Non será necesaria a autorización previa á súa execución, aínda que si deberán ser avaliadas.
Así mesmo, os beneficiarios poderán presentar modificacións que alteren os obxectivos estratéxicos ou xerais con que foi aprobada a operación, a condición de que as accións individuais xa iniciadas sexan completadas. Estas modificacións requirirán a autorización da autoridade competente con carácter previo á súa execución mediante resolución favorable expresa.
Cando os beneficiarios non poidan executar todas as accións que formen parte da operación inicialmente solicitada, poderán solicitar o pagamento das accións completamente finalizadas, a condición de que comunicasen á autoridade competente esta modificación da súa operación.
Dous. Engádese a alínea f) ao número 4 do artigo 16, coa seguinte redacción:
f) As consecuencias da pandemia provocada polo virus SARS-CoV-2 e o estado de alarma no Reino de España declarado polo Real decreto 463/2020, do 14 de marzo.
Tres. Modifícanse os números 3 e 4, e engádese o número 7 e 8 do artigo 17, que quedan redactados como segue:
3. No caso de que o solicitante presente a solicitude do anticipo fóra do prazo correspondente, a axuda que lle corresponda por esa operación reducirase nun 20 %, agás causas de forza maior recollidas no artigo anterior.
Con todo, non se poderá atrasar o exercicio indicado na solicitude de axuda cando este sexa o segundo exercicio financeiro posterior ao que se solicitou a de axuda, agás causas de forza maior ou circunstancias excepcionais. Cando o atraso sexa debido a causas de forza maior ou circunstancias excepcionais non se aplicará a redución da axuda prevista neste punto.
4. No caso de que o solicitante presente a solicitude de pagamento fóra do prazo correspondente, a axuda que lle corresponda por esa operación reducirase nun 20 %, agás causas de forza maior recollidas no artigo anterior.
Con todo, non se poderá atrasar o exercicio indicado na solicitude de axuda cando este sexa o segundo exercicio financeiro posterior ao cal se solicitou a axuda, agás causas de forza maior ou circunstancias excepcionais. Cando o atraso sexa debido a causas de forza maior ou circunstancias excepcionais, non se aplicará a redución da axuda prevista neste punto.
7. Para o exercicio Feaga 2020 non se aplicarán as reducións da axuda a que fai referencia este artigo. A axuda pagarase sobre a base da superficie determinada polos controis sobre o terreo previos ao pagamento final.
8. As circunstancias excepcionais deberán motivarse e acreditarse de xeito documental.
Catro. Engádese un número 3 ao artigo 29, coa seguinte redacción:
3. Os beneficiarios de axudas cuxa execución e solicitude de pagamento estaba prevista no exercicio Feaga 2020 e que, debido á crise sanitaria e ao período de alarma establecido no Real decreto 463/2020, do 14 de marzo, polo COVID-19, precisen atrasar a execución e solicitude de pagamento ao exercicio 2021, deberán comunicar o cambio de exercicio financeiro de pagamento, para o seu coñecemento, debidamente xustificado, e como moi tarde antes da data límite do 31 de xullo.
Cinco. Engádese un número 6 ao artigo 30, coa seguinte redacción:
6. Non se pagará ningunha axuda correspondente a unha operación en que non se executou algunha acción sen ter autorizada previamente a modificación da operación, agás causas de forza maior ou circunstancias excepcionais tal e como indica o número 2 do artigo 54 do Regulamento delegado (UE) 2016/1149, da Comisión, do 15 de abril.
Artigo 2. Modificación da Orde do 28 de decembro de 2018 pola que se establecen as bases reguladoras das axudas aos plans de reestruturación e reconversión da viña en Galicia e se convocan para o ano 2019
A Orde do 28 de decembro de 2018, pola que se establecen as bases reguladoras das axudas aos plans de reestruturación e reconversión da viña en Galicia e se convocan para o ano 2019, queda redactada como segue:
Un. Engádese un número 8 ao artigo 13, coa seguinte redacción:
No exercicio Feaga 2020 serán admisibles, en casos debidamente xustificados relacionados coa crise sanitaria provocada pola COVID-19, e referentes ás operacións en curso, a presentación de modificacións que non afecten nin a elixibilidade dalgunha parte da operación nin os seus obxectivos, e que non supoñan un incremento de orzamento inicialmente aprobado. Os beneficiarios comunicarán esta modificación á autoridade competente como moi tarde xunto coa solicitude de pagamento da operación. Non será necesaria a autorización previa á súa execución, aínda que deberán ser avaliadas.
Así mesmo, os beneficiarios poderán presentar modificacións que alteren os obxectivos estratéxicos ou xerais con que foi aprobada a operación, a condición de que as accións individuais xa iniciadas sexan completadas. Estas modificacións requirirán a autorización da autoridade competente con carácter previo á súa execución mediante resolución favorable expresa.
Cando os beneficiarios non poidan executar todas as accións que formen parte da operación inicialmente solicitada, poderán solicitar o pagamento das accións completamente finalizadas, a condición de que comunicasen á autoridade competente esta modificación da súa operación.
Dous. Engádese a alínea f) ao número 4 do artigo 16, coa seguinte redacción:
f) As consecuencias da pandemia provocada polo virus SARS-CoV-2 e o estado de alarma no Reino de España declarado polo Real decreto 463/2020, do 14 de marzo.
Tres. Modifícanse os números 3 e 4, e engádese o número 7 e 8 do artigo 17, que queda redactado como segue:
3. No caso de que o solicitante presente a solicitude do anticipo fóra do prazo correspondente, a axuda que lle corresponda por esa operación reducirase nun 20 %, agás causas de forza maior recollidas no artigo anterior.
Con todo, non se poderá atrasar o exercicio indicado na solicitude de axuda cando este sexa o segundo exercicio financeiro posterior ao cal se solicitou a axuda, agás causas de forza maior ou circunstancias excepcionais. Cando o atraso sexa debido a causas de forza maior ou circunstancias excepcionais, non se aplicará a redución da axuda prevista neste punto.
4. No caso de que o solicitante presente a solicitude de pagamento fóra do prazo correspondente, a axuda que lle corresponda por esa operación reducirase nun 20 %, agás causas de forza maior recollidas no artigo anterior.
Con todo, non se poderá atrasar o exercicio indicado na solicitude de axuda cando este sexa o segundo exercicio financeiro posterior ao cal se solicitou a axuda, agás causas de forza maior ou circunstancias excepcionais. Cando o atraso sexa debido a causas de forza maior ou circunstancias excepcionais, non se aplicará a redución da axuda prevista neste punto.
7. Para o exercicio Feaga 2020 non se aplicarán as reducións da axuda a que fai referencia este artigo. A axuda pagarase sobre a base da superficie determinada polos controis sobre o terreo previos ao pagamento final.
8. As circunstancias excepcionais deberán motivarse e acreditarse de xeito documental.
Catro. Modifícase o artigo 28.1.a) e engádese un número 3, que queda redactado como segue:
Para os plans con operacións anuais, o prazo límite de execución e xustificación remata o 31 de xullo de 2020, incluído.
1. O prazo de execución e xustificación destas axudas será:
a) Para os plans con operacións anuais, o prazo límite de execución e xustificación remata o 31 de xullo de 2020, incluído.
b) Para os plans con operacións bianuais, o prazo de execución remata o 31 de maio de 2021, incluído. Establécese o período entre o 16 de outubro de 2020 e o 31 de maio de 2021 como prazo para solicitar o pagamento das operacións bianuais.
c) O prazo para solicitar un anticipo será dun mes desde a concesión da axuda.
2. Unha vez transcorrido o prazo establecido de xustificación sen se ter presentado a solicitude de pagamento, requirirase o beneficiario para que a presente no prazo improrrogable de dez días. A falta de presentación da solicitude no prazo establecido neste parágrafo comportará a perda do dereito ao cobramento total ou parcial da subvención, a exixencia do reintegro das cantidades percibidas e poderá supor a apertura dun expediente sancionador segundo se establece na Lei de subvencións de Galicia. A presentación da xustificación no prazo adicional establecido neste parágrafo non eximirá o beneficiario das sancións que, conforme a lei, correspondan.
3. Os beneficiarios de axudas cuxa execución e solicitude de pagamento estaba prevista no exercicio Feaga 2020 e que, debido á crise sanitaria e ao período de alarma establecido no Real decreto 463/2020, do 14 de marzo, polo COVID-19, precisen atrasar a execución e solicitude de pagamento ao exercicio 2021, deberán comunicar o cambio de exercicio financeiro de pagamento, para o seu coñecemento, debidamente xustificado, e como moi tarde antes da data límite do 31 de xullo.
Cinco. Engádese un número 5 ao artigo 29, coa seguinte redacción:
5. Non se pagará ningunha axuda correspondente a unha operación en que non se executou algunha acción sen ter autorizada previamente a modificación da operación, agás causas de forza maior ou circunstancias excepcionais tal e como indica o número 2 do artigo 54 do Regulamento delegado (UE) 2016/1149, da Comisión, do 15 de abril.
Artigo 3. Modificación da Orde do 26 de decembro de 2019 pola que se establecen as bases reguladoras das axudas aos plans de reestruturación e reconversión da viña en Galicia, e se convocan para o ano 2020 (código de procedemento MR446A)
A Orde do 26 de decembro de 2019 pola que se establecen as bases reguladoras das axudas aos plans de reestruturación e reconversión da viña en Galicia, e se convocan para o ano 2020, queda redactada como segue:
Un. Engádese a alínea f) ao número 4 do artigo 16, coa seguinte redacción:
f) As consecuencias da pandemia provocada polo virus SARS-CoV-2 e o estado de alarma no Reino de España declarado polo Real decreto 463/2020, do 14 de marzo.
Dous. Modifícanse os números 3 e 4, e engádese o número 7 do artigo 17, que queda redactado como segue:
3. No caso de que o solicitante presente a solicitude do anticipo fóra do prazo correspondente, a axuda que lle corresponda por esa operación reducirase nun 20 %, agás causas de forza maior recollidas no artigo anterior.
Con todo, non se poderá atrasar o exercicio indicado na solicitude de axuda cando este sexa o segundo exercicio financeiro posterior ao que se solicitou a axuda, agás causas de forza maior ou circunstancias excepcionais. Cando o atraso sexa debido a causas de forza maior ou circunstancias excepcionais, non se aplicará a redución da axuda prevista neste punto.
4. No caso de que o solicitante presente a solicitude de pagamento fóra do prazo correspondente, a axuda que lle corresponda por esa operación reducirase nun 20 %, agás causas de forza maior recollidas no artigo anterior.
Con todo, non se poderá atrasar o exercicio indicado na solicitude de axuda cando este sexa o segundo exercicio financeiro posterior ao cal se solicitou a axuda, agás causas de forza maior ou circunstancias excepcionais. Cando o atraso sexa debido a causas de forza maior ou circunstancias excepcionais, non se aplicará a redución da axuda prevista neste punto.
7. As circunstancias excepcionais deberán motivarse e acreditarse de xeito documental.
Tres. Engádese un número 5 ao artigo 28, coa seguinte redacción:
5. Non se pagará ningunha axuda correspondente a unha operación en que non se executou algunha acción sen ter autorizada previamente a modificación da operación, agás causas de forza maior ou circunstancias excepcionais tal e como indica o número 2 do artigo 54 do Regulamento delegado (UE) 2016/1149, da Comisión, do 15 de abril.
Catro. O artigo 29 queda redactado como segue:
As persoas viticultoras a que o investimento lles exixa pagamentos inmediatos poderán solicitar un anticipo máximo do 80 % da axuda aprobada cando constitúan unha garantía por un importe polo menos igual ao importe do anticipo.
Unha vez executada a operación relacionada co anticipo, achegará a correspondente declaración de gastos (anexo V).
No caso de operacións anuais, o prazo para achegar a declaración de gastos situarase no mesmo exercicio financeiro en que se pagou o anticipo e, no caso de operacións bienais, no mesmo exercicio financeiro en que se solicitou o pagamento final da operación, agás en caso de forza maior e outras circunstancias excepcionais conforme establece o número 4 do artigo 26 do Regulamento de execución (UE) 2016/1150, da Comisión, do 15 de abril.
Artigo 4. Ampliación da dotación orzamentaria da Orde do 26 de decembro de 2019 pola que se establecen as bases reguladoras das axudas aos plans de reestruturación e reconversión da viña en Galicia, e se convocan para o ano 2020 (código de procedemento MR446A)
Amplíase a dotación orzamentaria determinada na Orde do 26 de decembro de 2019 pola que se establecen as bases reguladoras das axudas aos plans de reestruturación e reconversión da viña en Galicia e se convocan para o ano 2020.
O incremento da dotación orzamentaria será de 85.000 € na anualidade de 2020, 1.835.000 € na anualidade de 2021 e 455.000 € na anualidade de 2022, consignados na aplicación orzamentaria 14.04.713C 772.1.
Unha vez efectuado este incremento, o importe da dotación orzamentaria da aplicación ascenderá a 3.500.000 €, repartidos en 350.000 €, na anualidade 2020; 2.100.000 €, na anualidade 2021, e 1.050.000 €, na anualidade 2022.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 17 de decembro de 2020
José González Vázquez
Conselleiro do Medio Rural