O artigo 57.4 da Lei 7/2012, do 28 de xuño, de montes de Galicia, establece que as adquisicións de terreos obtidas polas comunidades con anterioridade á entrada en vigor desta lei se comunicarán ao xurado provincial, que integrará a superficie adquirida ao monte veciñal con plenos efectos xurídicos, modificando o perímetro e a extensión do monte.
En relación con isto, na sesión celebrada polo xurado provincial o día 11.1.2021, figura o seguinte acordo:
Monte de Pedrafita (expediente 36/75), pertencente aos veciños da parroquia de Pedrafita, no termo municipal de Guitiriz.
O 5.3.2020 ten entrada un escrito da comunidade propietaria, en que solicitan a integración no monte veciñal de catro predios adquiridos mediante compravendas, formalizadas en escrituras públicas nos anos 2002 e 2003. Achegan copia das escrituras públicas e planos de situación dos predios.
Con data do 2.12.2020, o Servizo de Montes elabora unha memoria (2020_16) de ampliación do monte de Pedrafita na cal se especifican as parcelas catastrais obxecto de integración (27022A36400078, 27022A36400083, 27022A36400116 e 27022A36400119), que suman unha superficie de 3.600 m2, polo que despois desta ampliación o monte quedaría con 350,3 hectáreas, de acordo coa nova cartografía.
En vista do anterior, o xurado, por unanimidade, acorda clasificar como veciñais en man común os terreos adquiridos pola comunidade, e proceder á actualización correspondente no expediente, de conformidade coa memoria técnica elaborada polo Servizo de Montes.
Contra este acordo, desde o día seguinte ao da súa publicación no Diario Oficial de Galicia, poderá interpoñerse recurso potestativo de reposición ante o Xurado Provincial de Clasificación de Montes Veciñais en Man Común de Lugo no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Lugo no prazo de dous meses, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e co artigo 46 da Lei 29/1998, do 13 de xullo, da xurisdición contencioso-administrativa.
Lugo, 20 de xaneiro de 2021
Mª Olga Iglesias Fontal
Presidenta do Xurado Provincial de Clasificación de
Montes Veciñais en Man Común de Lugo