A Resolución do 14 de agosto de 2020, da Axencia Galega de Innovación, estableceu as bases reguladoras para a concesión, en réxime de concorrencia competitiva, das axudas para o programa Fábrica do futuro, fábrica intelixente e sustentable da industria 4.0 (cuarta convocatoria) orientado a proxectos de investigación industrial, desenvolvemento experimental e innovación centrados en tecnoloxías industriais innovadoras dentro da iniciativa Industrias 4.0-captación de investimentos, cofinanciadas polo Fondo Europeo de Desenvolvemento Rexional (Feder) no marco do programa operativo Feder Galicia 2014-2020 e se procede á súa convocatoria para o ano 2020 (código do procedemento IN854A).
A Resolución do 27 de novembro de 2020 pola que se modifica a Resolución do 14 de agosto de 2020 (DOG núm. 241, do 30 de novembro) ampliou a dotación orzamentaria consignada inicialmente coa finalidade de atender un maior número de solicitudes. Esta modificación implicou a apertura dun novo período de presentación de solicitudes e a redistribución de anualidades, transferindo os créditos da anualidade 2020 á anualidade 2022.
O artigo 4 das bases reguladoras establece os requisitos que deben cumprir as entidades beneficiarias para poder optar ás axudas.
Unha vez revisada a documentación inicial dos expedientes xunto coa documentación achegada tras os requirimentos oportunos, o órgano instrutor formulou proposta de resolución de inadmisión de dúas solicitudes que non cumprían coas exixencias contidas nas bases reguladoras, conforme o establecido no artigo 32.5 das bases reguladoras.
As solicitudes que resultaron admitidas foron obxecto do proceso de avaliación segundo os criterios de valoración establecidos no artigo 34 das bases reguladoras.
A Comisión de Selección prevista no artigo 33 das bases reguladoras reuniuse o día 17 de febreiro de 2021 e elaborou unha relación por orde decrecente de puntuación das solicitudes que cumpren as condicións administrativas e técnicas para adquirir a condición de beneficiario, con indicación da súa avaliación, o custo subvencionable e a subvención que corresponde ao proxecto e a cada unha das entidades.
Unha vez realizada a instrución do procedemento e á vista do informe emitido pola Comisión de Selección, e por proposta do órgano instrutor, de acordo co disposto nos artigos 32 e 37 das bases reguladoras,
RESOLVO:
1. Conceder as axudas, respectando a intensidade máxima prevista no artigo 9 das bases reguladoras, a todas as entidades seleccionadas que figuran no anexo I desta proposta, por orde decrecente de puntuación.
2. Publicar a relación de solicitudes que foron inadmitidas por non cumprir os requisitos da convocatoria e que figuran no anexo II.
3. Desestimar as solicitudes que unha vez avaliadas non acadaron 60 puntos de valoración que exixe o artigo 35.2 da convocatoria. Estas solicitudes relacionanse no anexo III.
As axudas propostas imputaranse ás aplicacións orzamentarias 06.A2.561A.770.0, 06.A2.561A.781.0 e 06.A2.561A.744.0, segundo a natureza da entidade beneficiaria, nas cales existe crédito adecuado e suficiente nos orzamentos da Comunidade Autónoma de Galicia para o ano 2021.
Estas axudas están cofinanciadas no marco do programa operativo Feder Galicia 2014-2020, eixe 1 «Potenciar a investigación o desenvolvemento tecnolóxico e a innovación», Prioridade de investimento 1.2 «O fomento do investimento empresarial en I+i, o desenvolvemento de vínculos e sinerxías entre as empresas, os centros de investigación e desenvolvemento e o sector do ensino superior, en particular mediante o fomento do investimento no desenvolvemento de produtos e servizos, a transferencia de tecnoloxía, a innovación social, a innovación ecolóxica, as aplicacións de servizo público, o estímulo da demanda, a interconexión en rede, as agrupacións e a innovación aberta a través dunha especialización intelixente e mediante o apoio á investigación tecnolóxica e aplicada, liñas piloto, accións de validación precoz dos produtos, capacidades de fabricación avanzada e primeira produción, en particular, en tecnoloxías facilitadoras esenciais e difusión de tecnoloxías polivalentes», Obxectivo específico: 1.2.1 «Impulso e promoción de actividades de I+i lideradas por empresas, apoio á creación e consolidación de empresas innovadoras e apoio á compra pública innovadora» e actuación CPSO 1.2.1.6 «Proxectos de investigación, desenvolvemento e innovación centrados en tecnoloxías industriais innovadoras no marco da atracción do investimento privado para a posta en valor da I+D+i en Galicia».
Contra esta resolución, que non esgota a vía administrativa, poderán os interesados interpoñer recurso de alzada perante o presidente da Axencia Galega de Innovación no prazo dun mes, que comezará a contar a partir do día seguinte ao da publicación desta resolución no Diario Oficial de Galicia.
Santiago de Compostela, 24 de febreiro de 2021
Patricia Argerey Vilar
Directora da Axencia Galega de Innovación