De conformidade co establecido no Decreto 206/2005, do 22 de xullo (DOG núm. 145, do 29 de xullo), de provisión de prazas de persoal estatutario do Servizo Galego de Saúde, e na Resolución do 11 de decembro de 2018 (DOG núm. 240, do 18 de decembro), da Dirección Xeral de Recursos Humanos, pola que se publica o pacto subscrito pola Administración sanitaria coas organizacións sindicais CIG, CESM-OMEGA, CC.OO., UGT e CSIF sobre a selección de persoal estatutario temporal licenciado sanitario de atención hospitalaria, e no uso das atribucións conferidas polo Decreto 134/2019, do 10 de outubro, polo que se regulan as áreas sanitarias e os distritos sanitarios do Sistema público de saúde de Galicia (DOG núm. 204, do 25 de outubro), o xerente da Área Sanitaria de Pontevedra e O Salnés

RESOLVE:

Primeiro. Modificar o tipo de vínculo da praza convocada na especialidade de facultativo especialista de área de Aparello Dixestivo, que consta no anexo do anuncio do DOG núm. 78, do 27 de abril de 2021, polo que se convocan para vinculación temporal diversas prazas de persoal licenciado sanitario na Área Sanitaria de Pontevedra e O Salnés, que queda como consta no anexo desta resolución.

Segundo. Modificar o tipo de vínculo da praza convocada na especialidade de facultativo especialista de área de Aparello Dixestivo, que consta no anexo da Resolución do 16 de abril de 2021, da Xerencia da Área Sanitaria de Pontevedra e O Salnés, pola que se publican as bases da convocatoria para vinculación temporal, por concurso de méritos, da cobertura de diversas prazas de persoal licenciado sanitario na categoría de facultativo especialista de área, que queda como consta no anexo desta resolución.

Terceiro. Abrir un novo prazo de quince (15) días hábiles, contados a partir do día seguinte ao da publicación desta resolución no Diario Oficial de Galicia, para presentar novas solicitudes de participación na praza convocada na especialidade de facultativo especialista de área de Aparello Dixestivo.

Cuarto. As solicitudes para participar nesta convocatoria, na especialidade de Aparello Dixestivo, que consta no anexo de esta resolución, presentaranse preferentemente no Rexistro de Entrada da Área Sanitaria de Pontevedra e O Salnés, sito na rúa Loureiro Crespo, 2, de Pontevedra, ou a través de calquera dos procedementos do artigo 16 da Lei 39/2015, do 1 de outubro, do procedemento administrativo común das administracións públicas.

Os aspirantes que xa presentasen a solicitude de participación na convocatoria non terán que volvela presentar.

Pontevedra, 6 de maio de 2021

José Ramón Gómez Fernández
Xerente da Área Sanitaria de Pontevedra e O Salnés

ANEXO

Especialidade	Grupo	Praza	Centro
Aparello Dixestivo	A1	1 Reserva de praza	Área Sanitaria de Pontevedra e O Salnés