DOG 134 do 15/07/2021 - RESOLUCIÓN do 21 de xuño de 2021 pola que se amplía o prazo de xustificación das subvencións concedidas ao abeiro da Orde do 2 de xullo de 2020 pola que se establecen as bases reguladoras, se convoca o procedemento para a concesión de subvencións destinadas a proxectos de investigación sanitaria translacional, programa Translaciona COVID-19. Reforzo da investigación sanitaria de Galicia, e se dá publicidade da encomenda de xestión de carácter técnico á Axencia Galega para a Xestión do Coñecemento en Saúde para a tramitación e xestión das citadas axudas (código de procedemento SA304C).

III. Outras disposicións

Consellería de Sanidade

RESOLUCIÓN do 21 de xuño de 2021 pola que se amplía o prazo de xustificación das subvencións concedidas ao abeiro da Orde do 2 de xullo de 2020 pola que se establecen as bases reguladoras, se convoca o procedemento para a concesión de subvencións destinadas a proxectos de investigación sanitaria translacional, programa Translaciona COVID-19. Reforzo da investigación sanitaria de Galicia, e se dá publicidade da encomenda de xestión de carácter técnico á Axencia Galega para a Xestión do Coñecemento en Saúde para a tramitación e xestión das citadas axudas (código de procedemento SA304C).

A Consellería de Sanidade publicou no Diario Oficial de Galicia núm. 135, do 8 de xullo de 2020, a Orde do 2 de xullo de 2020 pola que se aproban as bases reguladoras para a concesión, en réxime de concorrencia competitiva, das subvencións destinadas a proxectos de investigación sanitaria translacional, programa Translaciona COVID-19 e se convocan para o ano 2020 (código de procedemento SA304C).

O artigo 18 da referida Orde do 2 de xullo de 2020 establece que o prazo de execución dos proxectos e de xustificación da subvención rematará o 31 de outubro de 2021.

O artigo 45.3 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, establece a posibilidade de que o órgano concedente das subvencións outorgue, salvo precepto en contra contido nas bases reguladoras, unha ampliación do prazo establecido para presentar a xustificación, que non excederá a metade deste e sempre que con iso non se prexudiquen dereitos de terceiros.

O artigo 32 da Lei 39/2015, do 1 de outubro, do procedemento administrativo común das administracións públicas, indica que a ampliación se poderá acordar de oficio ou por instancia de parte antes do vencemento do prazo de que se trate e se as circunstancias así o aconsellan.

En consecuencia, tendo en conta que a data de xustificación é o día 31 de outubro de 2021 e que o escenario producido durante o estado de alarma pola pandemia da COVID-19 e os protocolos aplicados nas institucións sanitarias, interromperon ou directamente imposibilitaron a adecuada execución dos proxectos de investigación dos beneficiarios, polas razóns antes expostas,

RESOLVO:

Modificar a data límite de xustificación establecida no artigo 18 da Orde do 2 de xullo de 2020 pola que se aproban as bases reguladoras para a concesión, en réxime de concorrencia competitiva, das subvencións destinadas a proxectos de investigación sanitaria translacional e se convocan para o ano 2020 (SA304C), ampliando o prazo para executar os proxectos de investigación subvencionados e presentar a documentación xustificativa ata o 31 de decembro de 2021.

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 21 de xuño de 2021

Julio García Comesaña
Conselleiro de Sanidade