A Consellería de Medio Ambiente, Territorio e Vivenda publicou, no Diario Oficial de Galicia número 238, do 14 de decembro de 2021, a Orde do 13 de decembro de 2021 pola que se establecen as bases reguladoras para a concesión de axudas a pemes, autónomos, asociacións e fundacións de Galicia para o financiamento de actuacións destinadas á preparación para a reutilización e reciclaxe de residuos téxtiles recollidos separadamente, cofinanciadas polo fondo europeo relativo ao Mecanismo de recuperación e resiliencia da UE no marco do Plan de recuperación, transformación e resiliencia, financiado pola Unión Europea-NextGenerationEU, e se procede á súa convocatoria en réxime de concorrencia competitiva por anticipado de gasto para o ano 2022 (código de procedemento MT975L).

O artigo 6 da devandita orde do 13 de decembro de 2021 establece que o prazo de presentación das solicitudes será desde o día seguinte ao da publicación da convocatoria ata o 31 de xaneiro de 2022, ambos incluídos.

O artigo 32 da Lei 39/2015, do 1 de outubro, do procedemento administrativo común das administracións públicas permite á Administración, de oficio ou ben a petición dos interesados, a ampliación dos prazos establecidos sempre que non se exceda a metade súa, e as circunstancias o aconsellan e con iso non se prexudican dereitos de terceiros.

En consecuencia, e tendo en conta que o número de solicitudes recibidas ata actualidade ao abeiro desta orde, permiten prever que non se vai acadar a contía máxima das axudas previstas e que, polo tanto, a dita ampliación non prexudica os dereitos de terceiros, concorren os requisitos para a ampliación de prazos a que se refire o artigo 32.1 da Lei 39/2015, do 1 de outubro, do procedemento administrativo común das administracións públicas, acordase a ampliación que de seguido se sinala.

Na súa virtude, facendo uso das facultades que me confire o artigo 34 da Lei 1/1983, do 22 de febreiro, reguladora da Xunta e da súa Presidencia, e demais disposicións de xeral aplicación,

DISPOÑO:

Artigo 1

Modificase, en relación co prazo de solicitude, a data límite do artigo 6, punto 4 da Orde do 13 de decembro de 2021 pola que se establecen as bases reguladoras para a concesión de axudas a pemes, autónomos, asociacións e fundacións de Galicia para o financiamento de actuacións destinadas á preparación para a reutilización e reciclaxe de residuos téxtiles recollidos separadamente, cofinanciadas polo fondo europeo relativo ao Mecanismo de recuperación e resiliencia da UE no marco do Plan de recuperación, transformación e resiliencia, financiado pola Unión Europea-NextGenerationEU, e se procede á súa convocatoria en réxime de concorrencia competitiva por anticipado de gasto para o ano 2022 (código de procedemento MT975L), ampliándose o prazo de presentación de solicitudes do 31 de xaneiro de 2022 ata o 22 de febreiro de 2022.

Disposición derradeira

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 27 de xaneiro de 2022

Ángeles Vázquez Mejuto
Conselleira de Medio Ambiente, Territorio e Vivenda