Aprobado o programa anual de actividades para o ano 2022 da Academia Galega de Seguridade Pública (Agasp) polo Consello Reitor e de acordo co establecido no artigo 9.2.b) da Lei 1/2007, do 15 de xaneiro, da Agasp, convócase un curso de instrutor de tiro/técnico de armamento, de acordo coas bases e características seguintes:
1. Datos da actividade.
Denominación: instrutor de tiro e técnico de armamento.
Tipo: curso.
Edicións: 1.
Horas lectivas: 78.
Modalidade: 20 horas teóricas en liña, 40 horas prácticas na galería de tiro da Agasp e 18 horas lectivas impartindo docencia no plan de adestramento coa arma regulamentaria da Agasp baixo a supervisión do persoal instrutor da Agasp.
Obxectivos: controlar adecuadamente o estado, o uso e o mantemento das armas de dotación de cada cadro de persoal.
Establecer e desenvolver os programas de tiro de cada concello, segundo as necesidades do seu persoal.
Intervir na adquisición da munición para a realización das prácticas de tiro de cada concello.
Adquirir coñecementos sobre o manexo e funcionamento das armas orientados á instrución dos demais policías.
Contido:
a) En liña:
1. Normativa sobre armas. Regulamento de armas, concretamente armas prohibidas, clases de armas, licenzas e infraccións. Código penal, armas ilegais, principio de lexítima defensa. Lei de seguridade cidadá infraccións con armas de fogo.
2. Usos da arma de fogo, balística interna e externa. Diferentes calibres e balas, puntas de alta deformación semiblindadas e blindadas. Características.
3. Teoría das armas, semiautomáticas, de repetición e manuais, armas de avancarga e retrocarga. Especial referencia ás armas de caza.
4. Documentación e procedementos para a compra de armas e municións polos concellos.
5. Caixas de seguridade e medidas de seguridade mecánicas para armas.
6. Técnicas de comunicación non verbal e importancia da linguaxe xestual.
b) Parte presencial:
Datas:
En liña: do 22 de febreiro ao 22 de marzo de 2022.
Na galería da Agasp: os días 3, 9, 15, 21 e 28 de marzo de 2022. Horario das 10.00 ás 14.00 horas e das 16.00 ás 20.00 horas.
Prácticas reais nos plans de adestramento con arma regulamentaria: abril e outubro do ano 2022.
Formación individual:
Seguridade no uso de armas de fogo, en solitario e en grupo.
Uso dos elementos de puntaría.
Uso de revólver e pistola.
Empuñamentos, unha man e dúas mans.
Fundas, arma e cargadores.
Tiro en seco.
Uso do disparador, dobre acción e simple acción.
Cadencias de disparo, distancias de tiro, precisión, media distancia, curta distancia. Cambios de cargador.
Pistola e revólver.
Fogo cunha man, coas dúas e man débil.
Solución de interrupcións.
Disparo en movemento, cara adiante e atrás, esquerda e dereita e oblicuos. Disparo en pé, xeonllo en terra e tombado. Disparo desde vehículo.
Disparo en binomio e en grupo de intervención.
Disparo tras parapeto e desde xanela.
Aproximación ao obxectivo, papel de cada integrante da patrulla. Función do axente que dá seguridade.
c) Formación como formador:
Instruirase o alumno en diferentes técnicas formativas relacionadas coa formación específica de tiro, incluíndo armas, municións, fundas e demais equipamento individual e de dotación en grupo.
Instruirase o alumno en técnicas de corrección de erros máis habituais durante o disparo.
Instruirase sobre técnicas de aprendizaxe para policías noveis, técnicas avanzadas, utilización da tensión e a competitividade, etc.
Parte de docencia en prácticas.
Nos plans de tiro que se realicen na Agasp durante o ano 2022, instruiranse os policías que participen do plan de tiro, baixo a supervisión dos instrutores da Agasp.
2. Destinatarios/as.
Persoal dos corpos da policía local de Galicia.
Abrirase un período de selección previo ao curso, con probas para seleccionar os alumnos máis adecuados.
Prazas ofertadas:
10 prazas: 8 para membros de policías de máis de 20 funcionarios, 2 para o resto.
3. Solicitudes de participación.
Os concellos interesados en que os/as seus funcionarios/as obteñan esta habilitación, deben solicitalo ao Servizo de formación en Seguridade Pública a través do correo electrónico: formacion.agasp@xunta.gal, expoñendo as súas necesidades formativas nesta materia xunto co persoal que designan para a realización do curso.
Con carácter previo ao inicio deste curso, realizarase unha proba de nivel, e a Agasp fará a selección definitiva do alumnado.
4. Desenvolvemento da actividade.
1. O Servizo de Formación da Agasp comunicaralles ás persoas admitidas á proba para a admisión ao curso o lugar, a data e a hora de realización.
2. O curso realizarase nas datas expostas con anterioridade e pode sufrir variacións que serán comunicadas coa antelación suficiente ao alumando.
3. O curso realizarase respectando en todo momento as indicacións das autoridades sanitarias. O uso das máscaras é obrigatorio, así como o mantemento da distancia de seguridade.
4. É obrigatoria a asistencia con puntualidade a todas as sesións do curso, requírese a asistencia para obter á habilitación de instrutor/a de tiro ao 100 % de toda a acción formativa.
Durante a realización do curso levarase un control permanente da asistencia a través dos sistemas que se establezan para o efecto e poderán realizarse controis de asistencia extraordinarios.
5. O alumnado asistirá aos cursos co uniforme regulamentario. No caso de non facelo e non existir causa suficientemente xustificada, a Agasp poderá impedir a asistencia ao curso e non emitirá diploma nin certificado acreditativo ningún.
A Estrada, 8 de febreiro de 2022
Santiago Villanueva Álvarez
Director xeral da Academia Galega de Seguridade Pública