A disposición transitoria segunda do Decreto 81/2016, do 23 de xuño, polo que se crea no ámbito do Servizo Galego de Saúde a categoría estatutaria de persoal enfermeiro especialista (Diario Oficial de Galicia núm. 133, do 14 de xullo), estableceu un procedemento específico de acceso, mediante a convocatoria diferenciada, polo sistema de concurso, á categoría e prazas de enfermeiro/a especialista.
Pola Resolución do 21 de marzo de 2018, da Dirección Xeral de Recursos Humanos (Diario Oficial de Galicia núm. 63, do 2 de abril), co apoio das organizacións sindicais CIG, CESM-O`MEGA, CCOO, UGT, CSIF e SATSE aprobáronse as bases do procedemento do concurso específico para o ingreso na categoría estatutaria de persoal enfermeiro especialista.
En execución destas bases, con carácter transitorio e excepcional, mediante a Resolución do 4 de xuño de 2020, da Dirección Xeral de Recursos Humanos do Servizo Galego de Saúde (Diario Oficial de Galicia núm. 113, do 11 de xuño), realizouse a primeira convocatoria diferenciada para o acceso, polo sistema de concurso, á categoría e prazas de enfermeiro/a especialista na especialidade de enfermaría pediátrica, no seo da implantación da nova categoría de enfermeiro/a especialista e nos termos previstos no artigo 34 da Lei 55/2003, do 16 de decembro, do Estatuto marco do persoal estatutario dos servizos de saúde, e do artigo 25.3 do Decreto 206/2005, do 22 de xullo, de provisión de prazas de persoal estatutario do Servizo Galego de Saúde. A citada resolución establecía que o resto de prazas da especialidade de pediatría que poidan ser obxecto de procedemento específico de acceso serán ofertadas nun segundo proceso excepcional, que poñerá fin á vía transitoria nesta especialidade.
Mediante a Resolución do 23 de abril de 2018, da Dirección Xeral de Recursos Humanos (Diario Oficial de Galicia núm. 83, do 30 de abril), convocouse concurso específico para o ingreso na categoría estatutaria de persoal enfermeiro especialista nas especialidades de traballo e de saúde mental. Na Mesa Sectorial, na sesión que tivo lugar 1 de febreiro de 2022, acórdase a realización dun segundo concurso específico na Área Sanitaria de Vigo na especialidade de saúde mental.
De conformidade co establecido na disposición transitoria segunda do Decreto 81/2016, do 23 de xuño, en uso da competencia que lle atribúe o artigo 18 do Decreto 137/2019, do 10 de outubro, polo que se establece a estrutura orgánica do Servizo Galego de Saúde (Diario Oficial de Galicia nº 208, do 31 de outubro), e o artigo 7 da Orde do 22 de abril de 2020 (Diario Oficial de Galicia nº 82, do 29 de abril), sobre delegación de competencias en órganos centrais e periféricos da Consellería de Sanidade e do Servizo Galego de Saúde e na Axencia Galega para a Xestión do Coñecemento en Saúde, este centro directivo
RESOLVE:
Primeiro. Convocar o segundo concurso específico para o ingreso na categoría e praza de persoal enfermeiro especialista do Servizo Galego de Saúde, nas especialidades de enfermaría pediátrica e saúde mental.
A convocatoria está aberta ao persoal estatutario fixo pertencente á categoría de enfermeiro/a que, na data da entrada en vigor do Decreto 81/2016, ou nun momento anterior, desempeñase no Servizo Galego de Saúde as funcións propias da especialidade e acredite o título da especialidade de enfermaría pediátrica ou de saúde mental, segundo a especialidade en que se pretenda ingresar.
Non poderán formalizar a súa inscrición neste proceso as persoas que xa posúan arestora a condición de persoal estatutario fixo da categoría de persoal enfermeiro/a especialista do Servizo Galego de Saúde, na especialidade de enfermaría pediátrica ou de saúde mental, respectivamente.
Segundo. O número de prazas que se convoca no presente proceso, na categoría de persoal enfermeiro especialista nas especialidades de enfermaría pediátrica e de saúde mental, especifícase no seguinte cadro:
Especialidade |
Grupo |
Centro |
Nº prazas |
Titulación |
Enfermeiro/a especialista en enfermaría pediátrica |
A2 |
Área Sanitaria da Coruña e Cee |
8 |
Título universitario oficial de grao/diplomatura en Enfermaría e o título de enfermeiro/a especialista en enfermaría pediátrica |
Área Sanitaria de Ferrol |
3 |
|||
Área Sanitaria de Santiago de Compostela e Barbanza |
4 |
|||
Área Sanitaria de Lugo, A Mariña e Monforte de Lemos |
4 |
|||
Área Sanitaria de Ourense, Verín e O Barco de Valdeorras |
4 |
|||
Área Sanitaria de Pontevedra y O Salnés |
2 |
|||
Área Sanitaria de Vigo |
8 |
|||
Enfermeiro/a especialista en enfermaría de saúde mental |
A2 |
Área Sanitaria de Vigo |
1 |
Título universitario oficial de grao/diplomatura en Enfermaría e o título de enfermeiro/a especialista en saúde mental |
Terceiro. Serán de aplicación a este proceso as bases aprobadas mediante a Resolución da Dirección Xeral de Recursos Humanos do 21 de marzo de 2018 (Diario Oficial de Galicia núm. 63, do 2 de abril).
Contra esta resolución, que pon fin á vía administrativa, as persoas interesadas poderán interpoñer recurso contencioso-administrativo no prazo de dous meses, contados a partir do día seguinte ao da súa publicación no Diario Oficial de Galicia, nos termos da Lei 29/1998, do 13 de xullo. Potestativamente, e con carácter previo, poderán interpoñer recurso de reposición ante esta dirección xeral, no prazo dun mes contado a partir da mesma data, de conformidade co que establece a Lei 39/2015, do 1 de outubro, do procedemento administrativo común das administracións públicas.
Santiago de Compostela, 14 de febreiro de 2022
Ana María Comesaña Álvarez
Directora xeral de Recursos Humanos