De conformidade co previsto no artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, dáse publicidade da Resolución do 25 de abril de 2022 pola que se encomenda á Fundación Semana Verde de Galicia a posta á disposición dos espazos precisos e os traballos de apoio para a organización das probas selectivas correspondentes a diversas categorías de persoal estatutario.
1. Actividades:
Posta á disposición dos espazos precisos e os traballos de apoio para a realización das probas selectivas do Servizo Galego de Saúde para a cobertura de 680 prazas correspondentes ás seguintes categorías profesionais de persoal estatutario:
– Calefactor/a.
– Cociñeiro/a.
– Condutor/a.
– Costureiro/a.
– Electricista.
– Facultativo/a especialista da Área de Cirurxía Oral e Maxilofacial.
– Facultativo/a especialista da Área de Cirurxía Pediátrica.
– Facultativo/a especialista da Área de Cirurxía Plástica, Estética e Reparadora.
– Facultativo/a especialista da Área de Inmunoloxía.
– Facultativo/a especialista da Área de Oncoloxía Radioterápica.
– Fontaneiro/a.
– Lavandeiro/a.
– Logopeda.
– Mecánico/a.
– Pasador/a de ferro.
– Pinche (quendas de acceso libre, promoción interna, discapacidade xeral e discapacidade intelectual).
– Técnico/a en farmacia (quenda de discapacidade intelectual).
– Técnico/a superior de sistemas e tecnoloxías da información.
– Técnico/a de xestión de sistemas e tecnoloxías da información.
– Técnico/a especialista de sistemas e tecnoloxías da información.
– Telefonista.
– Terapeuta ocupacional.
– Traballador/a social.
A actividade encomendada inclúe a posta á disposición dos espazos para a realización das probas co mobiliario e equipamento necesarios (megafonía, pantallas LED, material de imprenta e sinalización), servizo de vixilancia e seguridade, sistemas antimóbil e detectores de metais, aparcadoiros, servizo de limpeza, conexión á internet, material hixiénico e anteparos.
– Natureza e alcance da xestión encomendada: a Lei 14/2013, do 26 de decembro, de racionalización do sector público autonómico, ten por obxecto a racionalización de todo o sector público autonómico e da actividade administrativa, así como a adopción de medidas dirixidas a unha maior eficiencia do gasto e á mellora da xestión do sector público autonómico.
O artigo 10 desta lei prevé os instrumentos e procedementos para facer efectivos os principios de cooperación, colaboración e asistencia, entre os cales se encontran as encomendas de xestión, reguladas especificamente no artigo 13, que remite á Lei 16/2010, do 17 de decembro, de organización e funcionamento da Administración xeral e do sector público autonómico de Galicia (Lofaxga).
O artigo 10 da Lofaxga prevé a posibilidade de encargar a realización de tarefas a entidades de dereito privado que reúnan a condición de medio propio da Administración ou entidade pública encomendante mediante resolución unilateral. A Fundación Semana Verde de Galicia é unha fundación do sector público autonómico de acordo co artigo 113 da Lofaxga, na medida en que o seu patrimonio fundacional, con carácter de permanencia, está formado en máis dun 50 % por bens e dereitos achegados ou cedidos pola Xunta de Galicia. De acordo co artigo 47 da Lofaxga, ten a consideración de medio propio e servizo técnico da Xunta de Galicia.
– Prazo de vixencia: o encargo terá unha duración comprendida entre a data da súa sinatura e o 22 de maio de 2022, tendo en conta as datas de realización das probas e o período de sete días previos e posteriores a elas, para o depósito e retirada de materiais.
Santiago de Compostela, 10 de maio de 2022
Julio García Comesaña
Presidente do Servizo Galego de Saúde
