O 14 de maio de 2022 a directora xeral de Desenvolvemento Rural ditou resolución de modificación do Acordo de concentración parcelaria da zona de Saiar (Caldas de Reis, Pontevedra), que se transcribe a seguir:
«O Acordo da zona de concentración parcelaria de Saiar (Caldas de Reis, Pontevedra) foi aprobado pola dirección xeral competente na materia con data do 8 de marzo de 2005 e foi notificado e publicado na forma legalmente prevista. Na actualidade encóntrase pendente de declaración de firmeza.
Con posterioridade a estes actos, o Concello de Caldas de Reis solicitou a cesión da titularidade dos predios 2111-3 e 2344 do Fondo de Terras da zona, para o establecemento de depuradoras de augas residuais para o servizo dos núcleos de Soutelo e Cardín, respectivamente.
Vista a proposta da xunta local da zona; a Lei de reforma e desenvolvemento agrario, do 12 de xaneiro de 1973; a disposición transitoria primeira da Lei 4/2015, do 17 de xuño, de mellora da estrutura territorial agraria de Galicia, a Lei 10/1985, do 14 de agosto, de concentración parcelaria para Galicia, modificada pola Lei 12/2001, do 10 de setembro; a Lei 39/2015, do 1 de outubro, do procedemento administrativo común das administracións públicas, e demais disposicións vixentes de aplicación ao caso.
Dado o destino para o cal se solicitan os referidos predios, e respecto do que se entende que é perfectamente subsumible nos supostos recollidos no artigo 32 da antedita lei galega, esta dirección xeral
RESOLVE:
1. Modificar o Acordo de concentración parcelaria da zona de Saiar (Caldas de Reis, Pontevedra) e adxudicarlle ao Concello de Caldas de Reis a titularidade dos predios número 2111-3 e 2344, que causan baixa no Fondo de Terras da zona, para ser destinados aos fins que se determinan na parte expositiva.
Transcorridos cinco anos desde a cesión das propiedades sen que os predios fosen destinadas aos fins para os cales son adxudicadas, a titularidade dos referidos predios reverterá sobre o Fondo de Terras da zona, o patrimonio da Comunidade Autónoma, a entidade xestora do Banco de Terras de Galicia ou outra entidade que corresponda, segundo o caso.
2. Ordenar que se dea a oportuna publicidade da presente resolución, sen prexuízo da súa notificación ao Concello de Caldas de Reis».
Contra esta resolución, que non é definitiva na vía administrativa, poderase interpor recurso de alzada ante a persoa titular da Consellería do Medio Rural no prazo dun mes, que se contará desde o día seguinte ao da publicación desta resolución.
Pontevedra, 24 de maio de 2022
Antonio Crespo Iglesias
Xefe territorial de Pontevedra