En sesión que tivo lugar o 10 de outubro de 2022, o tribunal nomeado pola Resolución do 7 de xullo de 2022 (DOG núm. 142, do 27 de xullo) para cualificar o proceso selectivo de acceso libre e de estabilización para o ingreso no corpo de axudantes de carácter facultativo de Administración especial da Administración xeral da Comunidade Autónoma de Galicia, subgrupo C1, escala de axentes do Servizo de Gardacostas de Galicia, convocado pola Resolución do 16 de decembro de 2021 (DOG núm. 241, do 17 de decembro), con corrección de erros no DOG núm. 28, do 10 de febreiro, e no DOG núm. 33, do 17 de febreiro, acordou modificar a Resolución do 22 de setembro de 2022, de conformidade co disposto na base II.1.1.1 da convocatoria, establecendo que o primeiro exercicio terá lugar o día 15 de outubro de 2022, no salón de actos e na aula 9 da Facultade de Dereito en Santiago de Compostela, en chamamento único que se iniciará ás 15.30 horas.

As persoas aspirantes deberán ir provistas de NIF, NIE, pasaporte, permiso de condución ou outro documento fidedigno acreditativo que a xuízo do tribunal acredite a súa identidade, así como lapis do número 2 e goma de borrar.

Así mesmo, e de acordo coa base II.1.1.1, as persoas aspirantes non poderán facer uso de manuais ou textos legais ou de consulta para realizar esta proba. Non se permitirá o acceso ao recinto onde se realice o exercicio con teléfonos móbiles, axendas electrónicas, reloxos intelixentes ou calquera outro material ou instrumento de que se poidan valer as persoas aspirante para auxiliarse na realización do exercicio. Non se habilitará ningún servizo de recollida de móbiles.

Santiago de Compostela, 10 de outubro de 2022

Pedro Gandarillas Iglesias
Presidente do tribunal