Por Acordo do 20 de xaneiro de 2022, da Xefatura Territorial de Ourense, sometéronse a información pública as solicitudes de autorización administrativa previa e de construción, o proxecto de interese autonómico e o estudo de impacto ambiental do parque eólico Marcofán, situado nos concellos do Irixo, Boborás e Beariz, na provincia de Ourense (DOG núm. 18, do 27 de xaneiro).
O 14 de setembro de 2022 tivo entrada nesta xefatura territorial a solicitude presentada por Marcofán Eólica, S.L. relativa á declaración de utilidade pública do parque eólico Marcofán, coa correspondente relación concreta e individualizada dos bens e dereitos afectados, que se inclúe no anexo deste acordo, para dar cumprimento ao establecido no artigo 44.4 da Lei 8/2009, do 22 de decembro, pola que se regula o aproveitamento eólico en Galicia e se crea o canon eólico e o Fondo de Compensación Ambiental.
En cumprimento do disposto na Lei 24/2013, do 26 de decembro, do sector eléctrico; no Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica; e no artigo 44 da citada Lei 8/2009, do 22 de decembro, modificada pola Lei 5/2017, do 19 de outubro, de fomento da implantación de iniciativas empresariais en Galicia, e pola Lei 9/2021, do 25 de febreiro, de simplificación administrativa e de apoio á reactivación económica de Galicia, e demais normas vixentes de aplicación, sométese a información pública a solicitude da declaración de utilidade pública relacionada coas instalacións descritas no Acordo do 20 de xaneiro de 2022, da Xefatura Territorial de Ourense (DOG núm. 18, do 27 de xaneiro), que se citan a seguir:
Solicitante: Marcofán Eólica, S.L.; CIF: B32495202.
Denominación do proxecto: parque eólico Marcofán.
Concellos afectados: O Irixo, Boborás e Beariz (Ourense).
Potencia que se vai instalar: 39,2 MW.
Número de aeroxeradores: 7×5,6 MW de potencia nominal unitaria.
Produción neta anual estimada: 113.198 MWh/ano.
Subestación: colectora Paraño (obxecto doutro expediente).
Liña de evacuación: CSM PE Marcofán-arqueta receptora subestación colectora Paraño.
Prazo de execución: 9 meses.
Orzamento de execución material: 24.226.677 €.
Características técnicas recollidas no proxecto:
– 7 aeroxeradores modelo V162 de 5,6 MW do fabricante Vestas, cunha altura de buxa de 119 m, diámetro de rotor de 162 m, cos seus correspondentes centros de transformación, situados na propia nacelle dos aeroxeradores, con potencia unitaria de 7.000 kVA e relación de transformación de 0,720/30 kV.
– Rede eléctrica soterrada a 30 kV, de interconexión entre os centros de transformación dos aeroxeradores e o centro de seccionamento e medida (CSM) do parque eólico, composta por tres circuítos con condutores tipo Al RHZ1-OL 18/30 (36) kV de sección variable segundo o tramo, o circuíto 1 para a interconexión dos aeroxeradores AG1 e AG2, circuíto 2 para os AG3, AG4 e AG5, e o circuíto 3 para os AG6 e AG7.
– Centro de seccionamento e medida (CSM) do parque eólico, edificio prefabricado en envolvente de formigón monobloque, con celas de protección de entrada e saída de liña a 30 kV, con interruptor automático Inom 1200 A, cela de medida de tensión e cela de protección de transformador para SSAA, de 50 kVA RT 30/0,42 kV. Equipos de control do parque composto por PC e software tipo SCADA para a supervisión local e remota de instalacións e de equipo e medida e facturación.
– Liña de evacuación LSAT a 30 kV composta por tres circuítos eléctricos subterráneos, executados en gabia única e condutores RHZ1 18/30 kV 3×(1×240/400/630) Al, con orixe no CSM do PE Marcofán e fin en arqueta receptora na subestación colectora Paraño (obxecto doutro expediente).
O obxecto da información pública será a solicitude da declaración de utilidade pública para as citadas instalacións. A declaración de utilidade pública, de acordo co artigo 56.1 da Lei 24/2013, do 26 de decembro, do sector eléctrico, levará implícita en todo caso a necesidade de ocupación dos bens ou de adquisición dos dereitos afectados e implicará a urxente ocupación para os efectos do artigo 52 da Lei do 16 de decembro de 1954, de expropiación forzosa.
Documentación que se expón:
1. A relación concreta e individualizada dos propietarios de bens e de dereitos afectados (RBDA-xuño 2022).
O que se fai público, para o coñecemento xeral, así como en particular, dos propietarios dos predios que figuran na relación anexa a este acordo, e das persoas titulares de dereitos reais ou intereses económicos sobre os bens afectados que fosen omitidas, para que poidan examinar a documentación técnica anteriormente relacionada, e de ser o caso, presentar as alegacións ou observacións que consideren oportunas dentro do prazo de trinta (30) días, que se contará a partir do día seguinte ao da publicación deste acordo no Diario Oficial de Galicia.
Toda a documentación poderase examinar na Xefatura Territorial da Vicepresidencia Primeira e Consellería de Economía, Industria e Innovación en Ourense, rúa Curros Enríquez, nº 1, 32003 Ourense, nos concellos afectados, e na seguinte ligazón web da Consellería:
https://ceei.xunta.gal/transparencia/informacion-publica/en-tramitacion/instalacions-de-xeracion
Ourense, 19 de setembro de 2022
Alicia María López Míguez
Xefa territorial de Ourense
