Antecedentes.
O 8 de xuño de 2022 publicouse o Real decreto 428/2022, do 7 de xuño, polo que se establecen as bases reguladoras para a concesión directa dunha axuda excepcional de adaptación para compensar as dificultades económicas derivadas do conflito bélico en Ucraína en determinados sectores agrarios.
O día 22 de xullo de 2022 publicouse no Diario Oficial de Galicia núm. 140 a Resolución do 15 de xullo de 2022 para a concesión directa, mediante resolución, das axudas excepcionais a determinadas explotacións gandeiras para compensar as dificultades económicas derivadas da invasión rusa de Ucraína.
O día 28 de xullo de 2022 aprobouse a listaxe preliminar de persoas físicas e xurídicas susceptibles de seren beneficiarias destas axudas de acordo co establecido no punto terceiro da Resolución do 15 de xullo de 2022 para a concesión directa, mediante resolución, das axudas excepcionais a determinadas explotacións gandeiras para compensar as dificultades económicas derivadas da invasión rusa de Ucraína. Ás persoas interesadas outorgóuselles un prazo de dez días hábiles para presentaren alegacións e documentación, contados a partir do día seguinte ao da súa publicación.
Consideracións legais e técnicas.
A tramitación das axudas previstas nesta resolución regúlase polo disposto no Real decreto 428/2022, do 7 de xuño, polo que se establecen as bases reguladoras para a concesión directa dunha axuda excepcional de adaptación para compensar as dificultades económicas derivadas do conflito bélico en Ucraína en determinados sectores agrarios, na Lei 9/2007, do 13 de xuño, de subvencións de Galicia, e no anexo I da Resolución do 15 de xullo de 2022 para a concesión directa, mediante resolución, das axudas excepcionais a determinadas explotacións gandeiras para compensar as dificultades económicas derivadas da invasión rusa de Ucraína e demais normativa de xeral aplicación.
O artigo 12 do anexo I da Resolución do 15 de xullo de 2022 establece que a persoa titular da Dirección do Fondo Galego de Garantía Agraria (Fogga) será competente para resolver estas axudas.
Consonte o artigo 12.2 do anexo da Resolución, as resolucións das axudas serán notificadas de acordo co establecido na Lei 39/2015, do 1 de outubro. De conformidade co establecido no artigo 45 da indicada lei, a notificación poderá realizarse mediante a publicación no Diario Oficial de Galicia, cunha ligazón á páxina web do Fogga.
Nesta notificación especificaranse a convocatoria, a persoa beneficiaria, a cantidade concedida e a finalidade da subvención outorgada, así como, se for o caso, as causas da desestimación, e expresaranse, ademais, os recursos que procedan contra a resolución, o órgano administrativo e xudicial ante o cal se deben presentar e o prazo para interpoñelos.
De conformidade co establecido, a persoa titular da Dirección do Fogga, unha vez analizadas todas as solicitudes, alegacións e documentacións presentadas e de acordo co anterior,
RESOLVE:
Primeiro. Dar publicidade á resolución da concesión das axudas do Fogga ao abeiro do Real decreto 428/2022, do 7 de xuño, polo que se establecen as bases reguladoras para a concesión directa dunha axuda excepcional de adaptación para compensar as dificultades económicas derivadas do conflito bélico en Ucraína en determinados sectores agrarios, e da Resolución do 15 de xullo de 2022 para a concesión directa, mediante resolución, das axudas excepcionais a determinadas explotacións gandeiras para compensar as dificultades económicas derivadas da invasión rusa de Ucraína, na seguinte ligazón da páxina web do Fogga:
https://fogga.xunta.gal/gl/pac/consultas_pac/beneficiario_de_axudas_pac/campana-2022
Segundo. Contra a presente resolución, que pon fin á vía administrativa, cabe interpor recurso potestativo de reposición ante a persoa titular da Dirección do Fogga, no prazo dun mes, contado a partir do día seguinte ao da súa notificación, de conformidade co establecido no artigo 124 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).
Santiago de Compostela, 29 de setembro de 2022
Silvestre José Balseiros Guinarte
Director do Fondo Galego de Garantía Agraria