De conformidade co previsto no artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, dáse publicidade da Resolución da Consellería de Sanidade, do 14 de xullo de 2022, pola que se lle encomenda á Axencia Galega de Infraestruturas a xestión das actuacións para a redacción do proxecto e a execución das obras de construción do novo centro de saúde de Boborás (Ourense).

As actividades que vai realizar a Axencia Galega de Infraestruturas son:

1. A dirección da redacción do proxecto con base no Plan funcional redactado polo Servizo Galego de Saúde, así como a supervisión e aprobación técnica do proxecto.

2. Realizar os actos e negocios xurídicos propios da preparación, selección de contratista, adxudicación e execución dos contratos que sexan precisos para o cumprimento do obxecto da encomenda, e concretamente os de redacción de proxecto, obra, dirección da obra, dirección de execución material e coordinación de seguridade e saúde.

3. Asumir a función de responsable do contrato, para o cal o órgano de contratación designará unha persoa física ou xurídica vinculada a esta axencia, a quen lle corresponderá supervisar a súa execución e adoptar as decisións e ditar as instrucións necesarias co fin de asegurar a correcta realización da prestación pactada, dentro do ámbito de facultades que o órgano de contratación lle atribúa.

4. Convocar o Servizo Galego de Saúde para que designe unha persoa representante, que asistirá ao acto de recepción das obras en que se levará a cabo a súa entrega.

5. Calquera competencia que lle corresponda en virtude da normativa de aplicación.

A Axencia, no desenvolvemento da actividade encomendada, seguirá as directrices e instrucións da Consellería de Sanidade e do Servizo Galego de Saúde, aos cales lles corresponden os poderes de verificación e control da encomenda.

Canto á natureza e alcance da xestión encomendada, a encomenda ten natureza de encarga a medio propio, de acordo co disposto nos artigos 47 e seguintes da Lei 16/2010, do 17 de decembro, e no artigo 13 da Lei 14/2013, do 26 de decembro, de racionalización do sector público autonómico. Tal condición de medio propio vén recollida no artigo 5 do Decreto 112/2015, do 31 de xullo, polo que se crea a Axencia Galega para a Xestión do Coñecemento en Saúde e se aproban os seus estatutos.

O prazo de vixencia será desde o día seguinte á súa sinatura ata a data de finalización do prazo de garantía deste.

Santiago de Compostela, 21 de xullo de 2022

Julio García Comesaña
Conselleiro de Sanidade