Aprobada inicialmente a modificación puntual número 7 do Plan xeral de ordenación municipal do Concello da Guarda, mediante o Acordo do Pleno do 27 de maio de 2022, de conformidade co artigo 60 da Lei 2/2016, do 10 de febreiro, do solo de Galicia, e dado que o documento estivo á disposición no portal de transparencia da sede electrónica deste concello, pero o expediente completo foi publicado con posterioridade ao inicio de tal período, considérase necesaria a ampliación do prazo da información pública, polo que se somete a información pública polo prazo de dous meses contados desde o día seguinte ao da última publicación deste anuncio no Diario Oficial de Galicia e no Faro de Vigo.

Durante o dito prazo poderá ser examinado por calquera interesado nas dependencias municipais, para que se formulen as alegacións que se xulguen pertinentes ou obteren copias. Así mesmo, estará á disposición no portal de transparencia da sede electrónica deste concello (http://aguarda.sedelectronica.gal).

Queda suspendido, no ámbito da modificación puntual (definido no plano rotulado «Ámbito de suspensión de licenzas» incorporado ao expediente), o procedemento de outorgamento de licenzas de parcelación de terreos, edificación e demolición, así como a suspensión da tramitación de figuras de planeamento e xestión (plan especial, proxecto de equidistribución, proxecto de urbanización) e, polo tanto, suspéndese a tramitación urbanística do ámbito do PERI número 5. Esta suspensión terá unha duración máxima de dous anos contados desde a aprobación inicial e, en calquera caso, extinguirase coa aprobación definitiva da modificación puntual.

A Guarda, 13 de outubro de 2022

Antonio Lomba Baz
Alcalde