Augas de Galicia é unha entidade pública empresarial do sector público da Comunidade Autónoma de Galicia que ten, no ámbito da xestión da demarcación hidrográfica Galicia Costa, as competencias que o ordenamento xurídico vixente en materia de augas atribúe aos organismos de bacía.
O artigo 15.3 da Lei 9/2010, do 4 de novembro, de augas de Galicia, dispón que lle corresponden á Dirección de Augas de Galicia, entre outras funcións, outorgar as concesións e as autorizacións relativas ao aproveitamento e ao uso da auga e do dominio público hidráulico en xeral (artigo 15.3 a), e acordar a sanción das infraccións que estean cualificadas como leves (artigo 15.3 j).
O artigo 15 do Estatuto da entidade pública empresarial Augas de Galicia, aprobado polo Decreto 32/2012, do 12 de xaneiro, recolle esta mesma previsión legal.
O incremento do volume de tramitación de procedementos derivados de solicitudes e incidencias relativas ao uso e ao aproveitamento do dominio público hidráulico nas súas diversas modalidades, producido ao longo dos últimos anos, amosa a necesidade de adoptar medidas dirixidas a acadar unha maior axilidade na tramitación que, pola súa natureza e entidade, debe efectuarse coa maior celeridade. Para tales efectos, cómpre acudir, baixo o principio de desconcentración, á delegación de certas competencias nas persoas titulares dos servizos territoriais das zonas hidrográficas da demarcación hidrográfica Galicia Costa.
A delegación de competencias permite a axilización administrativa necesaria e redunda en beneficio tanto da Administración coma dos administrados, dentro do máis rigoroso respecto ás garantías xurídicas que a tutela dos intereses públicos exixe.
En consecuencia, de conformidade co establecido na Lei 9/2010, do 4 de novembro, de augas de Galicia, e no artigo 6 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia,
DISPOÑO:
Primeiro. Obxecto da delegación
1. Deléganse nas persoas titulares dos servizos territoriais das zonas hidrográficas da demarcación hidrográfica Galicia Costa as seguintes competencias:
a) En materia de concesións e autorizacións relativas ao aproveitamento e uso da auga e do dominio público hidráulico, a resolución dos procedementos en que se declare a desistencia, ao abeiro do disposto no artigo 68 da Lei 39/2015, do 1 de outubro, do procedemento administrativo común das administracións públicas.
Exclúense desta delegación os procedementos de autorizacións de verteduras que sexan competencia de Augas de Galicia.
b) En materia de autorizacións para curtas e plantacións en zona de servidume de leitos, a resolución dos procedementos que se tramiten.
c) En materia de autorizacións para usos privativos de augas por disposición legal, a resolución dos procedementos que se tramiten.
d) En materia sancionadora, a resolución dos procedementos en que se declare o seu remate con arquivamento de actuacións cando a instrución conclúa a inexistencia de infracción ou responsabilidade e non se faga uso da facultade prevista no artigo 89.1 da Lei 39/2015, do 1 de outubro, do procedemento administrativo común das administracións públicas.
Exclúense desta delegación os procedementos sancionadores relativos a verteduras que sexan competencia de Augas de Galicia.
Segundo. Criterios complementarios
Na aplicación da delegación teranse en conta os seguintes criterios:
1. As resolucións administrativas que se adopten facendo uso da delegación contida nesta resolución farán constar expresamente esta circunstancia e consideraranse ditadas polo órgano delegante.
2. En calquera momento, a persoa titular da Dirección de Augas de Galicia poderá avocar o exercicio das competencias que se delegan.
Terceiro. Eficacia da delegación
Esta resolución producirá efectos a partir do día seguinte ao da súa publicación no Diario Oficial de Galicia.
Santiago de Compostela, 10 de abril de 2023
Teresa María Gutiérrez López
Directora de Augas de Galicia