O Concello de Gondomar (Pontevedra) considerou conveniente organizar correctamente o seu emblema municipal para perpetualo coa simboloxía adecuada e conforme as normas da heráldica. Para iso, e de acordo coas facultades que lle confiren as disposicións legais vixentes, elevou o informe histórico-heráldico, coa correspondente proposta de representación gráfica da bandeira, para a súa aprobación definitiva.
A competencia exclusiva en materia de adopción, modificación ou rehabilitación dos emblemas heráldicos dos concellos e doutras entidades locais correspóndelle á Comunidade Autónoma galega, segundo o disposto polo artigo 27.2 do Estatuto de autonomía de Galicia.
O expediente tramitouse conforme as normas de procedemento establecidas na Lei 7/1985, do 2 de abril, reguladora das bases do réxime local; na Lei 5/1997, do 22 de xullo, de Administración local de Galicia; no Decreto 19/2010, do 11 de febreiro, polo que se aproba o Regulamento de símbolos das entidades locais de Galicia, e no Real decreto 2568/1986, do 10 de decembro, que aproba o Regulamento de organización, funcionamento e réxime xurídico das corporacións locais.
Na súa virtude, visto o informe emitido pola Comisión de Heráldica da Xunta de Galicia e por proposta da persoa titular da Vicepresidencia Segunda e Consellería de Presidencia, Xustiza e Deportes, e logo da deliberación do Consello da Xunta de Galicia na súa reunión do día cinco de abril de dous mil vinte e tres,
DISPOÑO:
Artigo único
Aprobar a bandeira do Concello de Gondomar (Pontevedra), da cal figura como anexo unha representación gráfica, organizada do seguinte xeito:
O pano azul e o canón de amarelo, coa súa coroña e rodas de branco, e encima os dous sabres de cabalaría de branco, gornecidos de amarelo e dispostos en aspa. Terzada de vermello, na hasta, cos trece besantes amarelos (Sarmiento), e de amarelo, no batente, coas cuñas azuis (Acuña).
Santiago de Compostela, cinco de abril de dous mil vinte e tres
Alfonso Rueda Valenzuela
Presidente
Diego Calvo Pouso
Vicepresidente segundo e conselleiro
de Presidencia, Xustiza e Deportes
ANEXO
