Unha vez examinado o expediente de declaración de interese galego e inscrición no Rexistro de Fundacións de Interese Galego da Fundación Diego González Rivas, dítase a presente resolución baseada nos feitos e fundamentos de dereito que se expoñen a seguir:

Feitos:

Primeiro. O 1 de marzo de 2023, Gabriel Alberto Baltar Giraud, en representación do Padroado da fundación, presentou solicitude de clasificación, declaración de interese galego e inscrición no Rexistro de Fundacións de Interese Galego.

Segundo. A Fundación Diego González Rivas constituírona Diego González Rivas, Juan Carlos Rodríguez Cebrián e as entidades mercantís, Gallega de Distribuidores de Alimentación, S.A., representada por Roberto Tojeiro Rodríguez; Irta Invest, S.L., representada por José Antonio Souto Meizoso; Jevaso, S.L. Unipersonal, representada por Jesús Vázquez Sobrino; Recambios Regueira, S.L., representada por Ramón Carlos Regueira Otero; e Os Peteiros Investments, S.L., representada por Marta González Deus, mediante escritura pública outorgada o 27 de xaneiro de 2023, ante o notario da Coruña Isidoro Antonio Calvo Vidal, co número de protocolo 52.

Terceiro. Segundo consta no artigo 6 dos seus estatutos, a fundación ten por obxecto a mellora dos diagnósticos en enfermidades como o cancro e outras enfermidades graves pola promoción e o coidado da saúde dos pacientes, evitando a dor e aumentando a esperanza de vida.

Cuarto. Na escritura de constitución da fundación constan os aspectos relativos á identidade dos fundadores, á súa capacidade para constituíla, á súa vontade de facelo como de interese galego conforme os preceptos da Lei 12/2006, do 1 de decembro, de fundacións de interese galego, á dotación, aos estatutos e á composición do padroado inicial.

Quinto. Nos estatutos da fundación consta a súa denominación, o seu enderezo, o seu obxecto e a finalidade, as regras para a aplicación das rendas aos fins fundacionais e para a determinación dos/das beneficiarios/as, a composición e as normas de funcionamento do Padroado, as causas de disolución e o destino dos bens e dereitos resultantes da súa liquidación.

Sexto. O Padroado inicial da fundación está formado por Diego González Rivas, como presidente; José Antonio Souto Meizoso, Jesús Vázquez Sobrino, Juan Carlos Rodríguez Cebrián e Ramón Carlos Regueira Otero, como vogais; e a entidade Baltar Abogados y Asesores Tributarios, S.L.P., representada por Samuel del Río Pena, como secretario sen dereito a voto.

Sétimo. A comisión integrada polos secretarios xerais técnicos de todas as consellerías elevou ao vicepresidente segundo e conselleiro de Presidencia, Xustiza e Deportes a proposta de clasificación como de interese sanitario da Fundación Diego González Rivas, dado o seu obxecto e a finalidade, polo que, cumpríndose os requisitos exixidos na Lei 12/2006, do 1 de decembro, de fundacións de interese galego, e segundo establecen os artigos 47.2 da citada lei, 51 do Regulamento de fundacións de interese galego, aprobado polo Decreto 14/2009, do 21 de xaneiro, e 7 do Regulamento do Rexistro de Fundacións de Interese Galego, aprobado polo Decreto 15/2009, do 21 de xaneiro, o protectorado será exercido polo departamento da Xunta que teña atribuídas as competencias correspondentes aos fins fundacionais.

Oitavo. De conformidade coa citada proposta, por orde da Vicepresidencia Segunda e Consellería de Presidencia, Xustiza e Deportes, do 24 de maio de 2023 (DOG núm. 105, do 5 de xuño), clasificouse de interese sanitario a Fundación Diego González Rivas e adscribiuse á Consellería de Sanidade para os efectos do exercicio das funcións de protectorado.

Fundamentos de dereito:

Primeiro. O artigo 34 da Constitución española recoñece o dereito de fundación para fins de interese xeral, consonte a lei, e o artigo 27.26 do Estatuto de autonomía para Galicia establece que é competencia exclusiva da Comunidade Autónoma de Galicia o réxime das fundacións de interese galego.

Segundo. De acordo co disposto no artigo 7.2 do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego, en relación co Decreto 136/2019, do 10 de outubro, polo que se establece a estrutura orgánica da Consellería de Sanidade, corresponde á dita consellería a declaración de interese galego mediante resolución publicada no Diario Oficial de Galicia e a inscrición no Rexistro de Fundacións de Interese Galego da Fundación Diego González Rivas, así como o exercicio das funcións de protectorado e as demais que correspondan á Xunta de Galicia, de conformidade co indicado no dito regulamento.

En vista do que antecede e tendo en consideración o establecido na normativa vixente en materia de fundacións de interese galego e as demais normas de xeral e pertinente aplicación, en uso das competencias atribuídas polo Decreto 136/2019, do 10 de outubro, polo que se establece a estrutura orgánica da Consellería de Sanidade,

RESOLVO:

Primeiro. Declarar de interese galego a Fundación Diego González Rivas.

Segundo. Ordenar a súa inscrición no Rexistro de Fundacións de Interese Galego, sección da Consellería de Sanidade.

Terceiro. Esta fundación queda sometida ao disposto na Lei 12/2006, do 1 de decembro, de fundacións de interese galego; no Regulamento de fundacións de interese galego, aprobado polo Decreto 14/2009, do 21 de xaneiro; no Regulamento do Rexistro de Fundacións de Interese Galego, aprobado polo Decreto 15/2009, do 21 de xaneiro, e na demais normativa de aplicación; e, especialmente, ás obrigas de dar publicidade suficiente dos seus obxectivos e actividades, da ausencia de ánimo de lucro na prestación dos seus servizos, así como á de presentación anual da documentación contable e do plan de actuación ante o protectorado, que será exercido pola Consellería de Sanidade.

Contra esta resolución, que non pon fin á vía administrativa, poderá interpoñerse recurso de alzada ante o conselleiro de Sanidade, no prazo dun mes contado desde o día seguinte ao da súa publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 14 de xuño de 2023

Alberto Fuentes Losada
Secretario xeral técnico da Consellería de Sanidade