Con data do 19 de xaneiro de 2023 publicouse no Diario Oficial de Galicia a Orde do 21 de decembro de 2022 pola que se establecen as bases reguladoras xerais e a convocatoria para o ano 2023 para a concesión, en réxime de concorrencia competitiva, de axudas a proxectos colectivos, financiados polo Fondo Europeo Marítimo e de Pesca (FEMP), para a conservación e restauración da biodiversidade e dos ecosistemas mariños no marco de actividades marisqueiras sustentables, tramitada como anticipado de gasto (código de procedemento PE209B).

Estes proxectos deben desenvolverse na Comunidade Autónoma de Galicia e ter por obxecto recuperar hábitats mariños e costeiros en favor de poboacións de especies de interese marisqueiro ou que contribúan a unha mellor xestión ou conservación dos recursos biolóxicos mariños. As actuacións subvencionables son as que se centran en hábitats costeiros de importancia para a reprodución de organismos mariños, as actividades destinadas a redución da contaminación física e química, medidas de conservación positivas cuxo obxectivo sexa protexer e conservar a flora e fauna, incluída a repoboación ou reintrodución de especies autóctonas, e actuacións destinadas a previr, controlar ou eliminar especies exóticas invasoras que poñan en perigo a conservación destes hábitats e especies.

Estas axudas concédense con cargo á aplicación orzamentaria 15.03.723A.770.1, código de proxecto 2016 00293, dotada con fondos do FEMP (Prioridade 1. Fomentar unha pesca sostible, OE1.b), medida 1.2.1).

O artigo 30.2.b) do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, permite que as convocatorias poidan prever a posibilidade de ampliar o crédito cando o aumento veña derivado, entre outros, da existencia de remanentes doutras convocatorias con cargo a crédito doutro programa do mesmo servizo.

Consonte o anterior, o punto 4 do artigo 3 da Orde do 21 de decembro de 2022 establece que os importes consignados na convocatoria, así como as aplicacións a que se imputen, poderán ser ampliados en función das dispoñibilidades orzamentarias sen que iso dea lugar á apertura de novo prazo de presentación de solicitudes, respectando sempre o disposto no artigo 31 da Lei 9/2007, do 13 de xuño, de subvencións de Galicia, e no artigo 30 do Decreto 11/2009, do 8 de xaneiro, polo que se aproba o regulamento da citada lei.

O punto 3 do mesmo artigo 3 establece que o importe máximo das subvencións que se concederán en 2023 serán 750.000,00 €. Porén, este crédito non foi suficiente para atender todas as solicitudes cuxo obxecto é susceptible de subvención, polo que se considera oportuno incrementar o citado crédito co obxecto de contribuír ao logro do obxectivo específico de protección e recuperación da biodiversidade e dos ecosistemas acuáticos, dentro do programa operativo FEMP 2014-2020.

Por todo o antedito, facendo uso das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia,

DISPOÑO:

Artigo único. Incremento de crédito

Increméntase en trinta mil euros (30.000,00 €) o crédito destinado ao financiamento das axudas previstas na Orde do 21 de decembro de 2022 pola que se establecen as bases reguladoras xerais e a convocatoria para o ano 2023 para a concesión, en réxime de concorrencia competitiva, de axudas a proxectos colectivos, financiados polo Fondo Europeo Marítimo e de Pesca (FEMP), para a conservación e restauración da biodiversidade e dos ecosistemas mariños no marco de actividades marisqueiras sustentables, tramitada como anticipado de gasto.

O citado incremento consignarase, ao igual que o crédito previsto na convocatoria, na aplicación orzamentaria 15.03.723A.770.1, código de proxecto 2016 00293.

Polo tanto, o importe máximo das subvencións que se concederán con cargo a esta convocatoria no 2023 pasa a ser de setecentos oitenta mil euros (780.000,00 €) nunha única anualidade, a 2023.

En todo caso, a concesión das axudas estará limitada ás dispoñibilidades orzamentarias.

As porcentaxes de cofinanciamento das axudas continuará sendo do 75 % con fondos FEMP e o 25 % pola Comunidade Autónoma.

A publicación desta orde non supón apertura dun novo prazo de presentación de solicitudes.

Disposición derradeira única. Entrada en vigor

Esta orde producirá efectos a partir do día seguinte da súa publicación no Diario Oficial de Galicia.

Santiago de Compostela, 28 de xuño de 2023

Alfonso Villares Bermúdez
Conselleiro do Mar