A Orde do 27 de outubro de 2010 (DOG nº 212, do 4 de novembro) pola que se desenvolve o procedemento para o nomeamento e prórroga de persoal emérito no ámbito sanitario, sobre a base do Decreto 36/2010, do 11 de marzo (DOG nº 56, do 24 de marzo), establece no seu artigo 2.2 que as xerencias iniciarán o procedemento, se é o caso, no momento que se determine mediante a Resolución da Xerencia do Servizo Galego de Saúde publicada no Diario Oficial de Galicia. A resolución deberá especificar en cada caso o número de persoas que poderán ser nomeadas persoal emérito, tendo en conta as limitacións establecidas no artigo 10 do Decreto 36/2010, do 11 de marzo.

En desenvolvemento da devandita previsión, a Xerencia do Servizo Galego de Saúde

RESOLVE:

Primeiro. Iniciar o procedemento para o nomeamento de persoal emérito.

Segundo. O número de persoas que poderán ser nomeadas persoal emérito ao abeiro desta resolución serán 4.

Terceiro. As xerencias das áreas sanitarias promotoras de nomeamento de persoal emérito dun/dunha profesional xubilado/a na citada área sanitaria deberán iniciar o procedemento e remitir as candidaturas á Xerencia do Servizo Galego de Saúde no prazo máximo dun mes desde a data de entrada en vigor desta resolución.

Co fin de equilibrar os nomeamentos de eméritos en todas as Áreas Sanitarias, cada Xerencia poderá propoñer dous candidatos/as, avaliando para a proposta que realicen tanto o currículum como o proxecto que debe estar aliñado coas estratexias do Sergas.

Así como tamén terán en conta a implicación co organismo, as habilidades e boas actitudes do/da profesional implicado/a nos equipos de traballo, e emitirán un informe ao respecto.

A Comisión de Avaliación terá en conta para a proposta que se realice tanto o currículo do/da profesional como o proxecto e deberá motivar a proposta de candidatos/as que realice.

As corporacións e institucións públicas relacionadas co ámbito sanitario poderán presentar solicitudes de nomeamento de persoal emérito no prazo de 10 días, contados desde a entrada en vigor desta resolución, ante a Xerencia da Área Sanitaria que corresponda ao posto desempeñado pola persoa que se vai promover, cos mesmos requisitos.

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 14 de setembro de 2023

María Estrella López-Pardo Pardo
Xerente do Servizo Galego de Saúde