O 12 de xullo de 2023 publicouse no Diario Oficial de Galicia a Resolución do 29 de xuño de 2023 pola que se establecen as bases reguladoras para a concesión, en réxime de concorrencia competitiva, das axudas para a mellora da capacidade de innovación das empresas en Galicia, a través do financiamento das actividades integradas en plans de deseño para a innovación e a sustentabilidade e plans de innovación en procesos e organización (Deseñapeme e Innovapeme), cuxa actividade se enmarca nas prioridades estratéxicas da RIS3, e se procede á súa convocatoria para o ano 2023 (código de procedemento IN848D).
A resolución unifica os programas Deseñapeme e Innovapeme que vén convocando a Axencia Galega de Innovación desde o ano 2017, convocándose a terceira convocatoria do programa Deseñapeme e a sexta de Innovapeme. Isto favorece a visión estratéxica da innovación tecnolóxica e non tecnolóxica no conxunto da funcións da empresa, e supón unha simplificación administrativa que redunda no beneficio dos beneficiarios, pero vén a engadir máis complexidade ao proceso de análise das solicitudes presentadas e de xestión do procedemento, o que está a atrasar a resolución da convocatoria.
Tendo en conta o anterior, considérase necesario ampliar o prazo de xustificación para o ano 2023, para garantir que as entidades que resulten beneficiarias destas axudas poidan executar e presentar en prazo a documentación xustificativa correspondente aos gastos da anualidade 2023.
En consecuencia, no exercicio das facultades conferidas polo artigo 17.3 do Decreto 50/2012, do 12 de xaneiro, polo que se crea a Axencia Galega de Innovación,
RESOLVO:
Artigo único. Modificación do artigo 28.1 da Resolución do 29 de xuño de 2023 pola que se establecen as bases reguladoras para a concesión, en réxime de concorrencia competitiva, das axudas para a mellora da capacidade de innovación das empresas en Galicia, a través do financiamento das actividades integradas en plans de deseño para a innovación e a sustentabilidade e plans de innovación en procesos e organización (Deseñapeme e Innovapeme), cuxa actividade se enmarca nas prioridades estratéxicas da RIS3, e se procede á súa convocatoria para o ano 2023
O artigo 28.1 queda redactado do seguinte xeito:
«Artigo 28. Xustificación da subvención
1. Cada plan deberá xustificarse individualmente e os prazos de xustificación serán os seguintes:
Períodos de emisión das facturas (realización de gastos) e realización de pagamentos dos gastos executados:
– Primeira anualidade: desde a data de presentación da solicitude ata o 31 de decembro de 2023. Presentación da documentación xustificativa, ata o 15 de xaneiro de 2024.
– Segunda anualidade: desde o 1 de xaneiro de 2024 ata o 30 de setembro de 2024. Presentación da documentación xustificativa, ata o 15 de outubro de 2024.
En todo caso, só se considerará gasto realizado o que fose efectivamente pagado durante o período de execución, sempre que se respecten os prazos de pagamento previstos na normativa sectorial que lle sexa de aplicación ou, na súa falta, nos establecidos na Lei 3/2004, do 29 de decembro, pola que se establecen medidas de loita contra a morosidade nas operacións comerciais, en aplicación da Lei 18/2022, do 28 de setembro, de crecemento e creación de empresas».
Disposición derradeira única. Entrada en vigor
Esta resolución entrará en vigor o mesmo día da súa publicación no Diario Oficial de Galicia.
Santiago de Compostela, 15 de novembro de 2023
Patricia Argerey Vilar
Directora da Axencia Galega de Innovación