A Orde do 28 de xullo de 2023 (DOG núm. 154, do 14 de agosto) estableceu as bases reguladoras e a convocatoria para o ano 2023 das axudas, en réxime de concorrencia non competitiva, ás persoas armadoras de buques pesqueiros con porto base en Galicia, para compensar o incremento do prezo do gasóleo, como consecuencia da guerra de Ucraína.

A dita orde establece no seu artigo 3 que o crédito inicial poderá ser ampliado en función das dispoñibilidades orzamentarias sen que iso dea lugar á apertura dun novo prazo de presentación de solicitudes.

Tendo en conta o elevado número de solicitudes presentadas, o crédito orzamentario non resulta suficiente para atender axeitadamente ás que cumpren cos requisitos, é por iso polo que procede ampliar o crédito orzamentario para a concesión destas axudas.

Por todo o anterior, e no uso das facultades que me foron conferidas,

DISPOÑO:

Artigo único

Primeiro. Amplíase o importe da contía máxima das axudas que se van conceder ao abeiro da Orde do 28 de xullo de 2023 en:

3.747.572,80 euros, con cargo á aplicación 15.02.723B.770.2 (código de proxecto 2023.00186) dos orzamentos xerais da Comunidade Autónoma de Galicia para o ano 2023, polo que o importe total da convocatoria de 2023 ascende a 7.374.140,80 euros.

Segundo. A publicación desta orde non supón a apertura dun novo prazo de presentación de solicitudes.

Disposición derradeira única

Esta orde producirá efectos a partir do día seguinte ao da súa publicación no Diario Oficial de Galicia.

Santiago de Compostela, 12 de decembro de 2023

Alfonso Villares Bermúdez
Conselleiro do Mar