Con data do 12 de decembro de 2023, por acordo da Xunta de Goberno Local, aprobouse o Instrumento de planificación plurianual, anos 2023-2026, para a redución da temporalidade do emprego no Concello de Ponteareas, do seguinte literal:

Instrumento de planificación plurianual dos anos 2023-2026
para a redución da temporalidade

1. Introdución.

A Constitución española, no seu artigo 103, establece que o obxectivo fundamental da Administración Pública é servir o interese xeral e que ese obxectivo se logre coa garantía de obxectividade e imparcialidade, e con sometemento ao principio de eficacia.

Nese sentido, o artigo 69 do Real decreto lexislativo 5/2015, do 30 de outubro, polo que se aproba o texto refundido da Lei do estatuto básico do empregado público (TREBEP), determina que a planificación dos recursos humanos sempre debe ter como obxectivo:

«contribuír á consecución da eficacia na prestación dos servizos e da eficiencia na utilización dos recursos económicos dispoñibles mediante a dimensión adecuada dos seus efectivos», que, entre outras medidas, supón dimensionar adecuadamente o cadro de persoal municipal.

A modernización e mellora da Administración pública é un obxectivo permanente necesario para dar cumprimento ao dito mandato, que non pode alcanzarse sen unha adecuada xestión do principal activo co que conta a Administración, como é o seu persoal, para o cal é necesario implementar políticas de dotación de efectivos de carácter permanente que cubran as necesidades dos distintos servizos e limiten a temporalidade á atención de necesidades conxunturais.

Isto resulta, ademais, do disposto pola Directiva 1999/70 CE do Consello, do 28 de xuño de 1999, relativa ao Acordo Marco da CES, a UNICE e o CEEP, sobre o contrato de duración determinada (en diante, o Acordo Marco), que destaca no seu preámbulo a preeminencia da contratación indefinida como «forma máis común de relación laboral», mellorando a calidade do traballo de duración determinada e evitando os abusos derivados da utilización de sucesivos contratos ou relacións laborais de duración determinada.

Para iso a cláusula 4ª do Acordo marco establece a equiparación das condicións de traballo entre persoal temporal e fixo con base no principio de non discriminación, salvo existencia de causas obxectivas que xustifiquen unha diferenza no réxime xurídico de ambas as clases de persoal e a cláusula 5ª do Acordo marco que prevé a adopción de medidas destinadas a evitar a utilización abusiva de contratos ou relacións laborais temporais.

Para reducir a temporalidade nas administracións públicas e como consecuencia dos acordos asinados entre o Goberno de España e as organizacións sindicais máis representativas no ámbito da Administración pública, consideráronse na Lei 3/2017, do 27 de xuño, de orzamentos xerais do Estado para o ano 2017, e na Lei 6/2018, do 3 de xullo, de orzamentos xerais do Estado, para o ano 2018, ambos procesos de estabilización e consolidación.

E, por último, a Lei 20/2021, do 28 de decembro, de medidas urxentes para a redución da temporalidade no emprego público deseñou un conxunto de medidas de reforma da figura do funcionario interino unha serie de procesos de estabilización, co obxectivo de que a taxa de cobertura temporal se sitúe por debaixo do oito por cento das prazas estruturais.

Unido a este obxectivo, a Lei 31/2022, do 23 de decembro, de orzamentos xerais do Estado para o ano 2023, dispuxo no seu artigo 20.Dous, punto 4, que se poderá autorizar, con carácter extraordinario, unha taxa específica para dar cumprimento do obxectivo previsto na Lei 20/2021, do 28 de decembro, de medidas urxentes para a redución da temporalidade no emprego público, de que a temporalidade no emprego público non supere o 8 por cento das prazas de natureza estrutural en cada un dos seus ámbitos, sempre que veña xustificado de acordo co instrumento de planificación plurianual con que deberá contar.

2. Antecedentes.

De conformidade co artigo 69.2.e) do TREBEP, onde se recolle a posibilidade de que as administracións públicas prevexan a incorporación de recursos humanos a través das súas ofertas de emprego público, de acordo co establecido no artigo 70 da mesma norma e co obxectivo de cumprir coa exixencia legal de que a taxa de temporalidade no Concello de Ponteareas se sitúe por debaixo do 8 % nas prazas estructurais é necesaria a redacción e aprobación do presente Instrumento de planificación plurianual para a redución da temporalidade para contar así cun instrumento adecuado para a correcta planificación dos seus recursos humanos para lograr o dito obxectivo.

Por Resolución da Alcaldía, con data do 10 de maio de 2022, apróbase a oferta extraordinaria de estabilización de emprego (DOG núm. 97, do 20 de maio) en execución da Lei 20/2021, do 28 de decembro, de medidas urxentes para a redución da temporalidade no emprego público, correxida por Resolución da Alcaldía, con data do 16 de xuño de 2016 (DOG núm. 150, do 8 de agosto de 2022).

En execución dos citados acordos procedeuse á aprobación das bases comúns que deben rexer os procesos de estabilización aprobados por Resolución da Alcaldía núm. 2022-2468, con data do 16 de decembro de 2022, así como a aprobación das bases específicas da oferta de emprego público extraordinaria de estabilización do Concello de Ponteareas que deberán rexer cada convocatoria.

Conforme os datos que constan no Departamento de Recursos Humanos do Concello de Ponteareas, e de acordo coas prazas estruturais ocupadas na actual plantilla orzamentaria, a taxa de temporalidade de prazas estruturais, entendida como o % de emprego temporal con respecto ao número total de postos ocupados, alcanza o 32,69 % no ámbito do persoal funcionario e o 71,53 % no ámbito do persoal laboral.

RPT: 203 postos ocupados

(52 funcionarios, 151 laborais)

78 fixos (35 funcionarios, 43 laborais)

125 temporais (17 funcionarios, 108 laborais)

Taxa temporalidade funcionarios: 32,69 %

Taxa temporalidade laborais: 71,53

Por outra banda, o número de persoas para xubilarse nos próximos anos en función da súa idade (hai que ter en conta que na actualidade, poden existir empregados que se xubilen aos 65 anos, ou aos 66 anos e 4 meses para o 2023, segundo o período cotizado que se teña), é a seguinte:

Idade	Persoal funcionario	Persoal laboral	Total
>= 65 anos	0	5	5
Entre 63 e 64 anos	5	11	16
Entre 60 e 62 anos	4	19	23
Entre 55 e 59 anos	4	34	38

Polo que é necesario ter previsto toda a substitución do persoal que se xubilará nos próximos anos.

3. Marco legal.

a) Lei 30/1984, do 2 de agosto, de medidas para a reforma da función pública.

b) Lei 7/1985, do 2 de abril, reguladora das bases do réxime local.

c) Lei 22/1993, do 29 de decembro, de medidas fiscais, de reforma do réxime xurídico da función pública e da protección por desemprego.

d) Lei 50/1998, do 30 de decembro, de medidas fiscais, administrativas e da orde social.

e) Lei 27/2013, do 27 de decembro, de racionalización e sustentabilidade da Administración local.

f) Real decreto lexislativo 5/2015, do 30 de outubro, polo que se aproba o texto refundido da Lei do Estatuto básico do empregado público.

g) Lei 20/2021, do 28 de decembro, de medidas urxentes para a redución da temporalidade no emprego público.

h) Lei 31/2022, do 23 de decembro, de orzamentos xerais do Estado para o ano 2023.

i) Real decreto lexislativo 2/2015, do 23 de outubro, polo que se aproba o texto refundido da Lei do Estatuto dos traballadores.

j) Real decreto lexislativo 781/1986, do 18 de abril, polo que se aproba o texto refundido das disposicións legais vixentes en materia de réxime local.

4. Alcance.

O presente Instrumento de planificación non suporá necesariamente un incremento do gasto. Por un lado, en tanto a estabilización de emprego temporal soamente incluirá aquelas prazas que fosen ocupadas na forma e requisitos previstos na Lei 20/2021, do 28 de decembro, de medidas urxentes para a redución da temporalidade no emprego público e continuaban ocupadas no momento no que se aprobou a oferta de emprego público que daba cumprimento ao citado texto legal, ou ben aquelas prazas de persoal interino que, sendo cubertas conforme a normativa vixente no momento de incorporación, non puideron ser incluídas pola OEP de estabilización, atendendo os criterios temporais da Lei 20/2021, do 28 de decembro, de medidas urxentes para a redución da temporalidade no emprego público.

Por outra parte, articúlase o procedemento que se dirixe á cobertura definitiva de prazas de natureza estrutural que están sendo ocupadas por empregados públicos temporais, o que non implica aumento real do gasto.

Ademais, o resto de medidas que se recollen van dirixidas a dar cumprimento ás disposicións legais vixentes sobre o emprego temporal e a deseñar unha estratexia de utilización dos nomeamentos temporais que non eleve a taxa de temporalidade por riba do 8 % e sexa compatible coa lexislación aplicable.

As medidas destinadas á substitución dos empregados públicos que van xubilarse nos próximos anos tampouco debe supoñer necesariamente incremento do gasto, xa que os empregados públicos que se xubilan soen ter unhas retribucións superiores aos que os substitúen, por efecto da antigüidade.

Por último, as medidas que se poidan acordar no futuro, destinadas a permitir a implantación ou ampliación de novos servizos, aínda que si comporten incremento de gasto, ten que entenderse que resultan imprescindibles, de acordo co disposto no artigo 126.2.b) do Real decreto lexislativo 781/1986, do 18 de abril, polo que se aproba o texto refundido das disposicións legais vixentes en materia de réxime local, tal e como vén sendo recollido polas distintas leis de orzamentos xerais do Estado (por exemplo, o artígo 20.tres, punto 4, letra f) da Lei 31/2022, do 23 de decembro, de orzamentos xerais do Estado).

5. Medidas.

5.1. Procesos de estabilización.

a) De conformidade co disposto na Lei 20/2021, do 28 de decembro, de medidas urxentes para a redución da temporalidade no emprego público, en desenvolvemento del pola Resolución da Alcaldía con data do 10 de maio de 2022, apróbase a oferta extraordinaria de estabilización de emprego (DOG núm. 97, de 20 de maio de 2022) no Concello de Ponteareas, que inclúe 93 prazas (33 funcionarios e 60 de persoal laboral), que articula os procesos de estabilización de emprego temporal e en execución desta as convocatorias aprobadas para a provisión de prazas que desenvolven esta, o Concello de Ponteareas procederá a resolver os citados procesos selectivos conforme as bases que foron aprobadas e publicadas.

Este procedemento extraordinario e único, por dispoñelo así a Lei 30/2021, do 28 de decembro, de medidas urxentes para a redución da temporalidade no emprego público, deberá ter finalizado antes do 31 de decembro do 2024 por imperativo legal, pero a vontade deste Concello é resolvelo no menor prazo posible, e a previsión é rematalo en xaneiro de 2024,

b) A taxa específica derivada da autorización do artigo 20.dous.4 da Lei 31/2022, do 23 de decembro, de orzamentos xeráis do Estado (LPXE) de 2023, supón de feito a autorización dun novo proceso de estabilización, aínda que non coas características do aprobado en 2022, pero que inclúe todas aquelas prazas que, non estando incluídas no proceso de estabilización anterior, estean ocupadas na actualidade de xeito interino, e, polo tanto, é fundamental estabilizar as ditas prazas, para alcanzar o obxectivo do tope do 8 % de temporalidade.

5.2. Ofertas de emprego público e outras medidas.

A) Ofertas de emprego.

Co obxectivo de reducir a taxa de temporalidade por debaixo do 8,00 % nas prazas estruturais e en aplicación do presente Instrumento de planificación, o Concello de Ponteareas, incluirá nas súas ofertas de emprego público, sempre que a lexislación o permita e no computen para os efectos da taxa de reposición, aquelas prazas que, estando incluídas na relación de postos de traballo, se atopen vacantes e estean ocupadas de forma temporal por terse estimado que era necesaria a súa cobertura.

Tamén se incluirán prazas vacantes cando existan nomeamentos temporais que denoten a existencia de necesidades estruturais, ben polo seu propio carácter ou ben pola reiteración na utilización de nomeamentos temporais para cubrir as ditas necesidades, diferenciando estas para efectos do cálculo da taxa de reposición, das que se computen como consecuencia da taxa de reposición de efectivos ordinaria.

O volume de prazas ofertadas deberá permitir a redución da taxa de temporalidade por debaixo do 8 % durante o período de vixencia deste plan de ordenación, debendo tenderse a unha porcentaxe de temporalidade o máis baixa posible.

As ofertas incluirán as prazas necesarias para facilitar a adecuada reposición dos empregados públicos que accedesen á xubilación e así mesmo, no caso de implantación ou redimensionamento dos servizos, incluirán as prazas necesarias para permitir o seu desempeño.

B) Procesos selectivos.

O Concello de Ponteareas convocará os procesos selectivos para a execución das ofertas públicas do Emprego no ano natural seguinte a aquel no que se aproben estas.

Só excepcionalmente se aprazará a convocatoria dos procesos selectivos cando non fose posible o anterior ou o aconsellen criterios de racionalidade e eficiencia para permitir o agrupamento de prazas que se van ofertar.

C) Nomeamentos temporais.

O Concello de Ponteareas limitará os nomeamentos temporais por interinidade a aqueles supostos nos que as razóns de urxencia e necesidade debidamente acreditadas fagan necesaria a utilización desta figura, ben para cubrir prazas vacantes ou ben para a substitución transitoria dos titulares.

Os nomeamentos por programas ou figuras equivalentes serán utilizados de forma excepcional, logo de xustificación da súa necesidade e deberá ponderarse sempre o obxectivo de que a taxa de temporalidade non supere o 8 % nas prazas de natureza estrutural, tendo en conta a duración prevista destes, estanse a satisfacer necesidades estruturais, as ofertas de emprego público aprobadas e os procedementos selectivos en marcha.

Con independencia do anterior, os nomeamentos realizados en execución de plans de Emprego ou de reforzo excepcional do cadro de persoal, axustaranse ás modalidades de nomeamento e/ou contratación legalmente previstas e terán en conta que o seu obxectivo é tamén a dinamización do emprego local, así como contribuír ao acceso ao emprego de colectivos con especiais dificultades de contratación, de forma que a súa utilización será limitada e cunha duración taxada (máximo un ano) e computará á hora de determinar a taxa de temporalidade aplicable cando se utilicen para satisfacer necesidades non conxunturais.

6. Custos económicos.

O Instrumento de planificación elaborado polo Concello de Ponteareas como instrumento necesario para dar cumprimento á obrigas legais en materia de consolidación e estabilización do emprego temporal, a eliminación na medida do posible da figura do indefinido non fixo e reducir a taxa de temporalidade a niveis adecuados, non debe supoñer un incremento orzamentario para o Concello, ao ofertarse prazas que xa veñen sendo obxecto de cobertura con figuras temporais, xa sexa por programa ou por cobertura de vacante.

7. Prazas que se van incluír na taxa específica.

Á vista do obxectivo de alcanzar a taxa do 8 %, proponse como medida deste plan plurianual a inclusión das seguintes prazas na taxa específica aprobar na OPE especial de 2023, que será diferente á OPE ordinaria, e que están ocupadas na actualidade por persoal interino en praza.

Persoal laboral:

Código	Denominación
02.01.02.09	Auxiliar de clínica
03.02.02.04	Condutor palista
03.02.06.08	Conserxe
03.02.06.09	Limpador/a
03.02.06.12	Limpador/a
03.02.06.15	Limpador/a
03.02.03.01	Oficial 1ª electricista
02.01.02.12	Oficios varios - axudante de cociña
02.02.03.18	Oficios varios - axudante de cociña
02.01.02.18	Oficios varios-camareira limpadora
02.02.01.05	Oficios varios - coidador vixiante
02.01.02.22	Oficios varios - conserxe
02.01.01.04	Auxiliar de axuda fogar

Persoal funcionario:

Código	Denominación	Grupo	Nivel cd
01.02.04.02	Oficial administrativa	C2	18
01.05.00.02	Oficial administrativa	C1	20
02.01.02.03	Oficial administrativo	C2	18
02.01.04.02	Oficial administrativo	C2	18
03.02.06.20	Oficios varios - operario	Ap	14
03.01.00.01	Técnico/a administración xeral	A1	26
03.02.02.02	Técnico/a ambiental	C1	20
02.01.00.04	Traballador/a social	A2	22
02.01.00.02	Traballador/a social	A2	22

Reservarase 1 praza para a quenda de discapacidade, que de non ocuparse, se convocará pola na quenda ordinaria.

8. OPE 2023.

Por Decreto 2023/0443, do 27 de febreiro, aprobouse a OPE parcial para o ano 2023 para o Concello de Ponteareas, quedando aínda pendentes 4 prazas para esgotar a taxa de reposición que corresponde para este ano, polo que dentro das medidas do presente plan, proponse o remate da OPE 2023, coa aprobación da OPE complementaria correspondente coa inclusión das catro prazas, reservando dentro destas, 1 praza para a quenda de discapacidade, que, de non ocuparse, se poderá convocar pola quenda ordinaria.

Contra este acordo, que pon fin á vía administrativa, poderase interpor alternativamente o recurso potestativo de reposición, ante o órgano que o ditou, no prazo dun mes contado desde o día seguinte ao da publicación deste anuncio, de conformidade cos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou recurso contencioso-administrativo, ante o Xulgado do Contencioso-Administrativo de Pontevedra, no prazo de dous meses contados desde o día seguinte ao da publicación deste anuncio, de conformidade co artigo 46 da Lei 29/1998, do 13 de xullo, da xurisdición contencioso-administrativa. Se se opta por interpor o recurso potestativo de reposición, non se poderá interpor recurso contencioso-administrativo ata que aquel sexa resolto expresamente ou se produza a súa desestimación por silencio. Todo iso sen prexuízo de que se poida interpor calquera outro recurso que se xulgue máis conveniente ao dereito.

Ponteareas, 13 de decembro de 2023

Mª Nava Castro Domínguez
Alcaldesa