De acordo co disposto no artigo 9 do Regulamento de selección de persoal da Administración da Comunidade Autónoma de Galicia, aprobado polo Decreto 95/1991, do 20 de marzo, con anterioridade á convocatoria dos procesos de selección que deriven da oferta de emprego público, e con validez para todos eles, a consellería competente en materia de función pública determinará, mediante un único sorteo público, realizado logo de anuncio no Diario Oficial de Galicia, a orde de actuación das persoas aspirantes en todas as probas selectivas de ingreso que teñan lugar durante o ano. O resultado deste sorteo deberá recollerse en cada convocatoria.
De conformidade co devandito artigo, co obxecto de determinar a orde de actuación das persoas aspirantes nos procesos de selección que deriven da oferta de emprego público correspondente ao ano 2024, esta consellería
RESOLVE:
Realizar en acto público o sorteo referido no parágrafo anterior o día 31 de xaneiro de 2024, ás 10.00 horas, no salón de actos número 2 (pequeno) da Vicepresidencia Segunda e Consellería de Presidencia, Xustiza e Deportes, Edificio Administrativo San Caetano, Santiago de Compostela.
Santiago de Compostela, 18 de xaneiro de 2024
O conselleiro de Facenda e Administración Pública
P.D. (Orde do 8.1.2020; DOG núm. 16, do 24 de xaneiro)
José María Barreiro Díaz
Director xeral da Función Pública