En sesión que tivo lugar o 20 de febreiro de 2024, o tribunal nomeado pola Resolución do 4 de decembro de 2023 (DOG núm. 232, do 7 de decembro; corrección de erros no DOG núm. 237, do 15 de decembro) para cualificar o proceso selectivo extraordinario de estabilización derivado da Lei 20/2021, do 28 de decembro, pola quenda de acceso libre e mediante o sistema de concurso-oposición, para o ingreso na categoría 40 do grupo I de persoal laboral da Xunta de Galicia, titulado/a superior lingüista, convocado pola Resolución do 22 de decembro de 2022 (DOG núm. 245, do 27 de decembro),
ACORDOU:
Primeiro. De conformidade co disposto na base III.1.1.1 da convocatoria, superaron o primeiro exercicio da fase de oposición as persoas aspirantes que obtiveron un mínimo de quince (15) puntos.
Segundo. Unha vez efectuada a corrección, acadaron a puntuación mínima de quince (15) puntos vinte e tres (23) persoas. Fíxase en sesenta e catro (64) o número de respostas correctas que son necesarias para acadar a citada puntuación, corenta e oito (48) corresponden á primeira parte do exercicio e dezaseis (16) á segunda, o que equivale ao 40 % do total en cada unha delas.
Terceiro. Conforme o disposto na base III.1.2.8 da convocatoria, as puntuacións obtidas polas persoas aspirantes que se presentaron ao primeiro exercicio da fase de oposición serán publicadas no portal web corporativo funcionpublica.xunta.gal
Cuarto. Consonte a citada base III.1.2.8 da convocatoria, as persoas aspirantes poderán formular as alegacións que consideren oportunas no prazo de dez (10) días hábiles, que se contarán desde o día seguinte ao de publicación desta resolución no Diario Oficial de Galicia. As alegacións presentaranse a través da aplicación Fides (https://fides.xunta.gal).
Quinto. Tal e como recolle a base V.13 da convocatoria, contra esta resolución poderase interpoñer recurso de alzada ante o conselleiro de Facenda e Administración Pública nos termos previstos nos artigos 121 e 122 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 21 de febreiro de 2024
Oliva Amorín López
Presidenta do tribunal