Expediente: IN407A 2023/195-4.

Promotora: UFD Distribución Electricidad, S.A.

Denominación: ampliación de potencia CT Piñeiro-Nigrán 36AGB5 e RBTS.

Concello: Nigrán.

Feitos

1. O 23.3.2023, a empresa UFD Distribución Electricidad, S.A. solicitou a autorización administrativa previa e a autorización administrativa de construción para unha ampliación de potencia do centro de transformación Piñeiro-Nigrán (36AGB5), así como a declaración de utilidade pública da instalación eléctrica denominada ampliación de potencia CT Piñeiro-Nigrán 36AGB5 e RBTS.

Examinado o proxecto de execución, conclúese que ten como finalidade o aumento de potencia de 100 kVA a 160 kVA do centro de transformación intemperie Piñeiro-Nigrán (36AGB5), situado no apoio 9U2A3QL1//39-50-2-CTA, así como a instalación duns XS no apoio 9TUJIN90//39-50 e o soterramento da rede de baixa tensión. As actuacións están previstas no lugar do Sobral, na parroquia de Camos, no concello de Nigrán (Pontevedra).

2. Esta xefatura territorial solicitou o preceptivo informe ás distintas administracións, organismos ou, de ser o caso, empresas de servizos de interese xeral afectadas, isto é, o Concello de Nigrán e o Servizo do Patrimonio Cultural. A empresa manifestou a súa conformidade cos condicionados emitidos.

3. Como non foi posible efectuar a notificación ás persoas titulares das parcelas afectadas pola declaración de utilidade pública solicitada pola empresa promotora, publicáronse os correspondentes anuncios no Diario Oficial de Galicia do 5 de xuño de 2023 e no taboleiro de edictos único (TEU) do Boletín Oficial del Estado do 8 de xuño, co fin de realizar a notificación por comparecencia.

4. O proxecto someteuse ao trámite de información pública mediante Resolución do 5 de maio de 2023 publicada nos seguintes medios:

DOG (Diario Oficial de Galicia): 1.6.2023.

Xornal Faro de Vigo: 27.7.2023.

Taboleiro de anuncios do Concello de Nigrán, desde o 16.5.2023 ata o 5.7.2023, segundo certificado emitido polo propio Concello.

Portal de transparencia e goberno aberto da Consellería de Economía, Industria e Innovación.

Durante este trámite non se recibiron alegacións.

Consideracións legais e técnicas:

1. A Xefatura Territorial de Pontevedra é competente para resolver este expediente con fundamento no Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación (DOG núm. 126, do 4 de xullo) e no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).

2. A lexislación de aplicación ao presente expediente é:

– Lei 24/2013, do 26 de decembro, do sector eléctrico.

– Lei 39/2015, do 1 de outubro, do procedemento administrativo común das administracións públicas.

– Lei 40/2015, do 1 de outubro, de réxime xurídico do sector público.

– Lei 3/2007, do 9 de abril, de prevención e defensa contra os incendios forestais de Galicia.

– Lei do 16 de decembro de 1954, sobre expropiación forzosa.

– Lei 9/2021, do 25 de febreiro, de simplificación administrativa e de apoio á reactivación económica de Galicia.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Real decreto lei 23/2020, do 23 de xuño, polo que se aproban medidas en materia de enerxía e noutros ámbitos para a reactivación económica.

– Real decreto 223/2008, do 15 de febreiro, polo que se aproba o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

– Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

– Decreto do 26 de abril de 1957 polo que se aproba o Regulamento da Lei de expropiación forzosa.

3. A Instrución 2/2012, do 22 de maio, da Dirección Xeral de Industria, Enerxía e Minas, pola que se ditan as normas para a autorización da posta en servizo das instalacións eléctricas e para os procedementos de tramitación administrativa das instalacións de distribución de baixa tensión, dispón que na tramitación administrativa das instalacións de distribución de baixa tensión só será preciso o rexistro da instalación no rexistro correspondente da consellería competente en materia de industria.

4. Neste expediente someteuse a información pública a petición de declaración de utilidade pública, en concreto, e a urxente ocupación que leva implícita de acordo co título IX da Lei 24/2013, do 26 de decembro, do sector eléctrico, e co capítulo V do título VII do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

5. As características técnicas da instalación son as que a seguir se describen:

Á raíz da ampliación de potencia do centro de transformación Piñeiro-Nigrán de 100 kVA a 160 kVA, proxéctase a retirada de 42 metros da rede de baixa tensión (RBT) existente de condutor RZ 3×95 entre os apoios existentes 9U2A3QL1//39-50-2-CTA e HV-400/9 e a instalación de 506 metros de condutor XZ1 0,6/1 kV 4×(1*240) Al en tres actuacións. A primeira e a segunda actuacións son de 33 metros cada unha desde o centro de transformación Piñeiro-Nigrán ata o apoio existente HV-400/9, mediante un paso aerosubterráneo. A terceira é de 440 metros desde o centro de transformación Piñeiro-Nigrán á CGP dun solicitante.

A instalación está situada na parroquia de Camos, no municipio de Nigrán (Pontevedra).

Conforme ao indicado,

RESOLVO:

1. Outorgar á empresa UFD Distribución Electricidad, S.A. as autorizacións administrativas previa e de construción da instalación de distribución de enerxía eléctrica para a ampliación de potencia do centro de transformación Piñeiro-Nigrán (36AGB5) de 100 kVA a 160 kVA, expediente IN407A 2023/195-4, cuxas características se axustarán en todas as súas partes ás que figuran no proxecto de execución, ás condicións técnicas e de seguridade establecidas nos regulamentos de aplicación e ás condicións establecidas nos condicionados dos organismos que constan no expediente.

2. Declarar a utilidade pública, en concreto, da instalación eléctrica ampliación de potencia CT Piñeiro-Nigrán 36AGB5 e RBTS, expediente IN407A 2023/195-4, o que leva implícito a necesidade de ocupación dos bens ou de adquisición dos dereitos afectados e implica a urxente ocupación para os efectos do artigo 52 da Lei de expropiación forzosa.

3. A empresa UFD Distribución Electricidad, S.A. asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade. En todo momento se deberán cumprir as normas e directrices vixentes que resulten de aplicación, en particular, canto establece o Real decreto 223/2008, do 15 de febreiro, polo que se aproba o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09 e o Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

4. O prazo para a posta en marcha das instalacións que se autorizan será de doce meses, contados a partir da data da última autorización administrativa necesaria para a execución. Unha vez constituídas estas instalacións, a empresa promotora deberá presentar a solicitude de autorización de explotación ante esta xefatura territorial acompañada da seguinte documentación:

As declaracións de conformidade relativas ao material ou equipamento e as certificacións ou homologacións, se procede.

Un certificado dirección final de obra en que se garantirá o cumprimento das especificacións do proxecto e prescricións complementarias, se as houber, así como das regulamentacións e normas axeitadas para a montaxe da instalación e posta a punto.

Planimetría as built da instalación eléctrica en formato shape.

5. O incumprimento das condicións e requisitos establecidos nesta resolución poderá dar lugar á súa revogación, logo da audiencia á promotora, de conformidade co disposto no artigo 53.10 da Lei 24/2013, do 26 de decembro.

6. Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.

Contra a presente resolución, que non é definitiva en vía administrativa, poderase interpoñer recurso de alzada ante a conselleira de Economía, Industria e Innovación da Xunta de Galicia, no prazo dun mes contado a partir do día seguinte ao da súa notificación ou publicación, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Pontevedra, 13 de febreiro de 2024

Beatriz López del Olmo
Xefa territorial de Pontevedra