Mediante a Orde do 15 de marzo de 2023, a Consellería do Medio Rural regulou a tramitación de alegacións ao Sistema de información xeográfica de parcelas agrícolas (Sixpac) da campaña 2023.

O artigo 18 da citada orde dispón que as solicitudes de modificación do Sixpac dos recintos situados na Comunidade Autónoma de Galicia se dirixirán á persoa titular da Dirección do Fogga, quen, conforme o que se indica no capítulo II do seu título I, ditará a resolución correspondente ás solicitudes da orde, que serán notificadas de acordo co establecido na Lei 39/2015, do 1 de outubro, do procedemento administrativo común das administracións públicas. De conformidade co establecido no artigo 45.1 da indicada lei, a notificación poderá realizarse mediante a publicación no Diario Oficial de Galicia cunha ligazón á páxina web do Fogga.

En relación coas alegacións ou solicitudes de modificación do Sixpac da campaña 2023, logo de informe da Subdirección Xeral de Xestión da PAC, esta dirección

RESOLVE:

Primeiro. Dar publicidade na web do Fogga das listaxes das resolucións das alegacións ao Sixpac da Orde do 15 de marzo de 2023 citada.

As persoas interesadas poden acceder á dita web na seguinte ligazón:

https://fogga.xunta.gal/

Segundo. Pór á disposición das persoas interesadas no Portal de axudas PAC as resolucións completas das solicitudes citadas no punto primeiro desta resolución.

O acceso ao dito portal poderá realizarse a través da seguinte ligazón:

https://fogga.xunta.gal/gl/pac/consultas_pac/portal_de_axudas_pac

Neste portal cada persoa interesada poderá acceder ao contido da súa resolución individualizada mediante certificado dixital ou DNI-e (DNI electrónico) ou emprego de Chave365. A información sobre a forma de alta de Chave365 está na ligazón que se indica a seguir:

https://sede.xunta.gal/tramites-e-servizos/chave365

Terceiro. Contra as citadas resolucións, que non poñen fin á vía administrativa, as persoas interesadas poderán interpor recurso de alzada ante o presidente do Fogga no prazo dun mes, contado desde o día seguinte ao desta publicación, consonte o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas. O prazo de interposición concluirá o mesmo día desta publicación no mes de vencemento, de conformidade co artigo 30.4 da Lei 39/2015, do 1 de outubro.

Santiago de Compostela, 28 de febreiro de 2024

O director do Fondo Galego de Garantía Agraria
P.S. (Resolución do 12.2.2024)
Juan José Cerviño Varela
Secretario do Fondo Galego de Garantía Agraria