A Xunta de Goberno Local do Concello de Santiago de Compostela, na sesión que tivo lugar o día 29 de xaneiro de 2024, adoptou o seguinte acordo:
Primeiro. Aprobar inicialmente a modificación puntual do Catálogo do Plan especial de protección e rehabilitación da cidade histórica (PE-1) na unidade edificatoria 511224 (rúa do Franco, 56), segundo o documento formulado polos servizos técnicos municipais de planeamento en decembro de 2023.
Segundo. En aplicación do procedemento regulado nos artigos 75.1.a) da Lei 2/2016, do solo de Galicia (LSG) e 186.1.a) do seu regulamento de desenvolvemento (RLSG), a modificación inicialmente aprobada someterase a información pública durante o prazo de dous meses, mediante anuncios que para o efecto se publicarán no Diario Oficial de Galicia (DOG) e nun xornal dos de maior difusión na provincia.
Así mesmo, notificarase persoalmente ás persoas titulares catastrais do inmoble afectado (referencia catastral 7276825NH3477E0001WX).
Durante o trámite de información pública solicitarase o informe da Dirección Xeral do Patrimonio Cultural de Galicia.
A documentación sometida a información pública incluirá todos os documentos integrantes do expediente tramitado, incluídos o informe emitido polo órgano ambiental e o resumo executivo.
Suspensión de licenzas e actos suxeitos a comunicación previa.
O acordo de aprobación inicial determina automaticamente, por aplicación do que dispoñen os artigos 47.2 da LSG e 86 do RLSG, a suspensión do procedemento de outorgamento de licenzas de edificación, parcelación e derruba que poidan devir incompatibles ou contrarias ás novas determinacións da modificación inicialmente aprobada. O ámbito da suspensión inclúe a totalidade da parcela catastral 7276825NH3477E0001WX.
A suspensión afecta tamén os actos suxeitos a comunicación previa que supoñan a implantación dun uso ou actividade distinta das de lecer-restauración, grupo I (artigo 112 do PXOM) no ámbito do local en que se atopa a pintura.
A suspensión terá unha duración máxima de dous anos, contados desde a aprobación inicial, polo que se extinguirá o día 29.1.2026, ou, de ser o caso, coa aprobación definitiva e entrada en vigor da modificación.
As persoas interesadas poderán consultar o expediente e alegar por escrito durante o prazo de dous (2) meses. Este prazo iniciarase o día seguinte ao da última publicación deste anuncio.
A documentación pode consultarse no Servizo de Planeamento e Xestión Urbanística do Concello de Santiago (Pazo de Raxoi, 2º andar), de luns a venres, das 9.00 ás 14.00 horas; e na páxina web do Concello http://transparencia.santiagodecompostela.gal/Modificacion-puntual-do-Catalogo-do-PE-1-na-unidade-edifictatoria-511224.-Rua-do-Franco-56/gl
As alegacións poden presentarse na sede electrónica do Concello de Santiago de Compostela na epígrafe «Catálogo de trámites» a través do trámite «Presentación de documentación e alegacións» e da opción «Achega libre». Deberase introducir o dato 2023/50024A no campo «Referencia» e incorporar o documento das alegacións.
Tamén se poden presentar as alegacións por calquera dos outros medios relacionados no artigo 16 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 22 de febreiro de 2024
A alcaldesa
P.D. (DEC/2023/8135, do 17 de xuño de 2023)
Iago Lestegás Tizón
Concelleiro delegado de Urbanismo, Vivenda e Cidade Histórica