Mediante a Resolución do 12 de marzo de 2001, da Dirección Xeral de Universidade (DOG núm. 68, do 5 de abril), publícase o convenio de colaboración do 30 de xaneiro de 2001 entre a Xunta de Galicia, a través da Consellería de Educación e Ordenación Universitaria e a Secretaría Xeral de Investigación e Desenvolvemento e as universidades de Santiago de Compostela, A Coruña e Vigo para a creación do consorcio Axencia para a Calidade do Sistema Universitario de Galicia (ACSUG), posteriormente modificado pola Resolución do 10 de decembro de 2008. Esta entidade nace coa vontade de servizo á sociedade, e finalidade primordial da promoción e a garantía da calidade do Sistema universitario de Galicia, así como a de impulsar a súa integración competitiva no contexto universitario nacional e internacional.

A ACSUG conta con personalidade xurídica propia, realiza as funcións que ten atribuídas con total independencia, e desenvolve os seus obxectivos co máximo rigor e con pleno respecto á autonomía universitaria e aos principios de obxectividade, transparencia, responsabilidade, eficacia e sometemento á lei e ao dereito.

O día 22 de decembro de 2017 o Consello de Dirección da ACSUG acordou aprobar a adaptación dos estatutos da axencia, e estes foron publicados como anexo do Decreto 6/2018, do 11 de xaneiro, da Consellería de Cultura, Educación e Ordenación Universitaria.

No artigo 23.2 prevé que a persoa titular da presidencia da CGIACA será nomeada pola persoa titular da consellería de adscrición do consorcio, de entre persoas de recoñecido prestixio no ámbito universitario de Galicia, por proposta do Consello Reitor. A Presidencia da CGIACA terá unha duración de catro anos prorrogables por períodos iguais de tempo.

O Consello reitor de ACSUG, na xuntanza que tivo lugar o día 22 de xullo de 2024, acordou por unanimidade de todos os membros asistentes, propoñer a Miguel Ángel Santos Rego como presidente da CGIACA por un novo período de catro anos.

Por todo iso,

DISPOÑO:

Artigo único

Nomear a Miguel Ángel Santos Rego como presidente da CGIACA por un novo período de catro anos.

Disposición derradeira

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 2 de agosto de 2024

Román Rodríguez González
Conselleiro de Educación, Ciencia,
Universidades e Formación Profesional