Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáse publicidade do acordo acadado polo Xurado Provincial de Clasificación de Montes Veciñais en Man Común de Pontevedra na sesión que tivo lugar o 26 de xuño de 2024, respecto á revisión do esbozo e elaboración da cartografía actualizada do monte veciñal denominado Ribadelouro, da Comunidade de Montes Veciñais en Man Común de Ribadelouro, no concello de Tui (expediente RE22052).

O 22.2.2024 o Servizo de Montes deste departamento territorial emite o seguinte informe:

Feitos:

Primeiro. O 28.9.2022, con número 2022/2382504 de Rexistro Electrónico da Xunta de Galicia, a Comunidade de Montes Veciñais en Man Común (en diante, CMVMC) de Ribadelouro (concello de Tui) solicita a revisión do esbozo do monte veciñal en man común (en diante, MVMC) Ribadelouro (ID 3183). A dita solicitude deu lugar á apertura do expediente RE22052. Constan no expediente logo dunha achega de documentación:

– Informe técnico da revisión do monte veciñal Ribadelouro (Tui), asinada pola enxeñeira forestal colexiada número 1300 do COETF de Galicia e modificada en setembro de 2023.

– Certificado do secretario, coa conformidade do presidente da CMVMC de Ribadelouro, do 12.9.2022, da aprobación na asemblea xeral do 11.9.2022.

– Cartografía en formato dixital DATUM ETRS-89 FUSO 29.

Realízase a revisión de todo o perímetro lindeiro con propietarios particulares e axústase á base cartográfica da Dirección Xeral do Catastro. O MVMC de Ribadelouro fórmase por varios cotos redondos; no coto de máis tamaño co linde coa CMVMC de Rebordáns e no coto redondo de Telleira co linde coa CMVMC de Pontellas (concello de Porriño) teñen executado deslindamentos consonte o artigo 53 da Lei 7/2012, do 28 de xuño, de montes de Galicia (expedientes DC22096 e DC22095, respectivamente).

Segundo. O obxecto da revisión do esbozo é parte do perímetro do MVMC Ribadelouro, con Resolución de clasificación do 19.11.1981 e unha superficie inicial de 315 ha.

Segundo os datos do Sistema rexistral forestal, regulado no artigo 126 da Lei 7/2012, de montes de Galicia:

– Non consta contrato de xestión coa Consellería do Medio Rural.

– A CMVMC de Ribadelouro dispón dun documento de ordenación forestal inscrito no Rexistro de Montes Ordenados de Galicia co número 360021 e vixente ata 2031.

– O esbozo presentado do MVMC de Ribadelouro respecta as liñas de deslindamento en trámite: deslindamento coa CMVMC de Rebordáns e no coto redondo de Telleira os deslindamentos coa CMVMC de Pontellas e a CMVMC de Budiño (ambas no concello do Porriño).

– Constan actos de disposición de expropiacións que modifican o perímetro e superficie do MVMC.

Terceiro. O perímetro da revisión do esbozo proposto total é de 11,94 km e unha superficie de 297,54 ha. Non se modifican os límites da resolución de clasificación do MVMC de Ribadelouro.

Cuarto. O 30.11.2022, o Xurado Provincial de MVMC de Pontevedra acordou solicitarlle ao Servizo de Montes unha proposta coa revisión e elaboración da cartografía actualizada do monte veciñal clasificado a favor da CMVMC de Ribadelouro, expediente RE22052, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.

Consideracións legais e técnicas:

Primeira. A Lei 7/2012, do 28 de xuño, de montes de Galicia (en adiante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.

Segunda. A revisión do esbozo parcial do MVMC Ribadelouro proposta polo Servizo de Montes é a presentada pola CMVMC de Ribadelouro.

Vista a proposta de revisión presentada polo Servizo de Montes sobre a adaptación do esbozo do monte veciñal denominado Ribadelouro, e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,

ACORDA:

Aprobar a revisión do esbozo parcial do monte veciñal denominado Ribadelouro, clasificado a prol da CMVMC de Ribadelouro (Tui), segundo a proposta do Servizo de Montes e a planimetría elaborada por este.

Pontevedra, 9 de agosto de 2024

Antonio Crespo Iglesias
Presidente do Xurado Provincial
de Clasificación de Montes Veciñais
en Man Común de Pontevedra