Para os efectos previstos na disposición transitoria décimo terceira da Lei 7/2012, do 28 de xuño, de montes de Galicia, dáse publicidade do acordo acadado polo Xurado Provincial de Clasificación de Montes Veciñais en Man Común de Pontevedra, na sesión que tivo lugar o 26 de xuño de 2024, respecto á revisión do esbozo e elaboración da cartografía actualizada do monte veciñal denominado Cotres, da Comunidade de Montes Veciñais en Man Común de Arcos, no concello de Ponteareas (expediente RE22057).
O 16.5.2024 o Servizo de Montes deste departamento territorial emite o seguinte informe:
Feitos:
Primeiro. O 30.9.2022, con número de rexistro de entrada 2022/2408575, a Comunidade de Montes Veciñais en Man Común (en diante, CMVMC) de Arcos (Ponteareas) solicita a revisión parcial do esbozo do monte veciñal en man común (en diante, MVMC) Picaraña e Serra, Pena dos Namorados e Cotres (ID3020). Solicítase a revisión da parcela denominada Cotres. A dita solicitude deu lugar á apertura do expediente RE22057. Constan no expediente:
– Informe técnico da revisión do esbozo do monte veciñal en man común de Arcos, no concello de Ponteareas, de marzo do 2022, asinada o 13.10.2022 pola enxeñeira forestal número 482 do COETF de Galicia.
– Certificado do secretario, coa conformidade do presidente da CMVMC de Arcos, do 19.7.2022, da aprobación na asemblea xeral do 15.7.2022.
– Cartografía en formato dixital ETRS89 DATUM 29 EPSG 25829.
Respecto á revisión do MVMC de Cotres, a memoria técnica indica:
– Levouse a cabo unha revisión da documentación existente: ortofotos dos distintos anos dispoñibles no Instituto Xeográfico Nacional, cartografía do Instituto de Estudos de Territorio, o parcelario de rústica de 1950, a base catastral do Ministerio de Facenda, avinzas, sentenzas e deslindamentos parciais en que participou a Comunidade de Montes Veciñais de Arcos nos últimos anos. Os labores de traballo de campo implicaron o levantamento topográfico dalgunhas zonas de interese.
– O linde coa CMVMC de Santiago de Oliveira foi modificado pola Sentenza xudicial número 178/2017 do procedemento ordinario 103/2017, do Xulgado de Primeira Instancia e Instrución número 3 de Ponteareas.
– O linde coa CMVMC de Celeiros ratificouse mediante un deslindamento administrativo (artigo 53 da Lei de montes de Galicia), presentado no ano 2017 ante o Servizo de Montes. O dito deslindamento non foi trasladado ao Xurado de MVMC de Pontevedra debido á non coherencia co resto do esbozo e solicitouse unha proposta de revisión do dito esbozo (disposición transitoria décimo terceira da Lei de montes de Galicia).
– O linde cos propietarios particulares determinouse consonte o informe técnico e levantamento topográfico da liña de deslinde do MVMC de Arcos con propietarios particulares, redactado pola enxeñeira técnica forestal colexiada número 482 do COETF de Galicia e asinado en setembro de 2016. Con base neste informe e no acordo con todos os propietarios particulares implicados, promovéronse os correspondentes actos de conciliación de deslindamento no Xulgado de Primeira Instancia de Ponteareas.
Segundo. O obxecto da revisión do esbozo é o perímetro da parcela 3 Cotres, incluída na Resolución de clasificación do 4.12.1980 e cunha superficie inicial de 12,00 ha. Segundo os datos do Sistema rexistral forestal, regulado no artigo 126 da Lei 7/2012, de montes de Galicia:
– Non consta contrato de xestión coa Consellería do Medio Rural.
– A CMVMC de Arcos dispón dun documento simple de xestión inscrito no Rexistro de Montes Ordenados de Galicia co número 360141 e vixente ata 2022.
– Non constan sentenzas xudiciais nin actos de disposición que modifiquen o perímetro e a superficie do MVMC.
Terceiro. A superficie e o perímetro da revisión do esbozo proposto da parcela 3 Cotres é de 44,38 ha e de 6,84 km e non se modifican os límites establecidos na resolución de clasificación do Xurado de MVMC de Pontevedra do 4.12.1980.
Cuarto. O 1.3.2023, o Xurado de MVMC de Pontevedra acorda solicitarlle ao Servizo de Montes unha proposta coa revisión e elaboración da cartografía actualizada do MVMC de Cotres, clasificado a favor da CMVMC de Arcos (Ponteareas), expediente RE22057, coa finalidade de dar cumprimento ao establecido na disposición transitoria décimo terceira da Lei 7/2012, do 28 de xuño, de montes de Galicia.
Consideracións legais e técnicas:
Primeira. A Lei 7/2012, do 28 de xuño, de montes de Galicia (en adiante, LMG), na súa disposición transitoria décimo terceira, establece o procedemento de revisión de esbozos de montes veciñais en man común.
Segunda. A revisión do esbozo do MVMC Cotres, da CMVMC de Arcos, proposta polo Servizo de Montes, é a presentada pola comunidade e queda definida conforme os datos reflectidos no feito terceiro e na memoria técnica indicada no feito primeiro.
Vista a proposta de revisión presentada polo Servizo de Montes sobre a adaptación do esbozo do monte veciñal denominado Cotres, e de conformidade co previsto na disposición transitoria décimo terceira da Lei 7/2012, do 28 de xuño, de montes de Galicia, este xurado, por unanimidade dos seus membros,
ACORDA:
Aprobar a revisión do esbozo do monte veciñal denominado Cotres, clasificado a prol da CMVMC de Arcos (Ponteareas), segundo a proposta do Servizo de Montes e a planimetría elaborada por este.
Pontevedra, 9 de agosto de 2024
Antonio Crespo Iglesias
Presidente do Xurado Provincial
de Clasificación de Montes Veciñais
en Man Común de Pontevedra