O pasado día 2 de agosto, Manuel Vázquez Losada presentou a súa renuncia como vogal do pleno do Consello Regulador da Denominación de Orixe Monterrei. Posteriormente, en aplicación do artigo 53 da Lei 1/2024, do 11 de xaneiro, da calidade alimentaria, esta renuncia foi comunicada á Consellería do Medio Rural. Dado que este vogal tiña a vicepresidencia deste órgano, esta quedou vacante.

Para cubrir esta vacante o pleno deste consello regulador tivo unha sesión extraordinaria o día 8 de agosto, na que resultou elixida para o cargo da vicepresidencia do consello regulador a sociedade Viticultura Monterrey, S.L., representada por Ernesto Rodríguez Zarraquiños.

Conforme indica o artigo 23 do Decreto 4/2007, do 18 de xaneiro, polo que se regulan as denominacións xeográficas de calidade do sector alimentario e os seus consellos reguladores, unha vez elixida a persoa que terá a vicepresidencia, deberá facerse o seu nomeamento mediante unha orde da consellería competente.

Polo anterior,

DISPOÑO:

Artigo único. Nomeamento do vicepresidente do Consello Regulador da Denominación de Orixe Monterrei

Noméase vicepresidente do Consello Regulador da Denominación de Orixe Monterrei a Ernesto Rodríguez Zarraquiños, en representación da vogalía que ten Viticultura Monterrey, S.L.

Santiago de Compostela, 20 de setembro de 2024

María José Gómez Rodríguez
Conselleira do Medio Rural