DOG 192 do 4/10/2024 - RESOLUCIÓN do 27 de setembro de 2024, da Dirección Xeral de Recursos Humanos, pola que se autoriza e se publica o acordo adoptado pola Comisión Central de Seguimento do Pacto sobre selección de persoal estatutario temporal do Sistema público de saúde de Galicia.

III. Outras disposicións

Servizo Galego de Saúde

RESOLUCIÓN do 27 de setembro de 2024, da Dirección Xeral de Recursos Humanos, pola que se autoriza e se publica o acordo adoptado pola Comisión Central de Seguimento do Pacto sobre selección de persoal estatutario temporal do Sistema público de saúde de Galicia.

De conformidade coas competencias previstas nas normas I.6.1 do Pacto sobre selección de persoal estatutario temporal, asinado o 13 de xuño de 2016, no seo da Comisión Central de Seguimento do devandito pacto, na reunión mantida o 27 de setembro de 2024, adoptouse o acordo que se recolle nesta resolución.

Santiago de Compostela, 27 de setembro de 2024

María del Mar Pousa Cobas
Directora xeral de Recursos Humanos

ACORDO:

Modificación da data de valoración de requisitos e méritos para a actualización das listas de persoal licenciado sanitario de atención hospitalaria do ano 2024:

De modo excepcional –con motivo da finalización no mes de setembro de 2024 do colectivo de residentes que, polo atraso xerado durante a pandemia do coronavirus SARS-CoV-2, iniciou no mesmo mes do ano 2020 a formación nas especialidades de catro anos–, na actualización de todas as listas de licenciados/as sanitarios/as de atención hospitalaria que se leve a cabo ao longo do ano 2025 teranse en conta todas as inscricións rexistradas ata o 31 de outubro de 2024 e valoraranse todos os méritos causados ata o 15 de outubro de 2024.