A Valedora do Pobo, en colaboración coa Universidade de Santiago de Compostela, a Universidade da Coruña e a Universidade de Vigo, resolve convocar a quinta edición dos premios Valedora do Pobo aos mellores traballos de fin de grao (TFG) e traballos de fin de máster (TFM) en materia de igualdade e dereitos das mulleres, que se rexerá de acordo coas seguintes bases:

Primeira. Obxecto

Estas bases teñen como obxecto regular a concesión dos V premios Valedora do Pobo aos mellores traballos de fin de grao (TFG) e traballos de fin de máster (TFM) en materia de igualdade e dereitos das mulleres.

Segunda. Requisitos

Os traballos deberán destacar polo seu elevado valor en materia de igualdade e dereitos das mulleres.

Os dereitos sobre os traballos presentados non poderán estar cedidos a terceiros con carácter de exclusividade.

Os traballos deberan ter sido lidos, defendidos ou xulgados e aprobados, segundo proceda, ante calquera universidade galega durante o curso académico 2023/24.

Os traballos serán presentados en idioma galego ou castelán. No caso de que se presentasen en idioma distinto dos anteriores, deberá achegarse a tradución.

Terceira. Solicitudes

As solicitudes axustaranse aos modelos de instancia que figuran como anexos I e II, que estarán á disposición das persoas interesadas no enderezo electrónico do Valedor do Pobo (www.valedordopobo.gal), da Universidade de Santiago de Compostela (www.usc.es), da Universidade da Coruña (www.udc.es) e da Universidade de Vigo (www.uvigo.es), e no Rexistro do Valedor do Pobo (rúa do Hórreo n° 65, 15701 Santiago de Compostela, A Coruña), das 9.00 ás 14.00 horas e das 16.30 ás 19.00 horas, de luns a xoves; e das 9.00 ás 14.00 horas, os venres, e nos rexistros das universidades citadas.

Coas solicitudes presentarase a seguinte documentación:

Traballos de fin de grao (TFG) e traballos de fin de máster (TFM) en formato papel e en formato electrónico (CD ou pendrive en formato Word, Libreoffice ou LaTeX (anexo I).

As persoas interesadas poderán presentar a súa solicitude unicamente a un dos premios.

Cuarta. Lugar e prazo de presentación

Os traballos, dirixidos á valedora do Pobo, presentaranse no Rexistro do Valedor do Pobo ou nos rexistros da Universidade de Santiago de Compostela, da Universidade da Coruña ou da Universidade de Vigo, ou por calquera dos medios establecidos no artigo 16 da Lei 39/2015, do 1 de outubro, do procedemento administrativo común das administracións públicas.

No suposto de que non se presenten no rexistro das entidades convocantes deberá enviarse, dentro do prazo de presentación, unha comunicación por vía de correo electrónico (rexistro@valedordopobo.gal), na cal se detalle o medio utilizado de presentación segundo o modelo que consta no anexo II.

As solicitudes presentaranse a partir do día seguinte ao da publicación da resolución da convocatoria no Diario Oficial de Galicia e ata o 30 de novembro de 2024. As persoas interesadas poderán consultar as bases da convocatoria no DOG e nas paxinas web do Valedor do Pobo e das universidades galegas.

Se a solicitude non reúne os datos ou os documentos exixidos, a persoa interesada disporá de 10 días hábiles para corrixir a falta ou achegar os documentos preceptivos desde a recepción da notificación de emenda. No caso de que non o fixer, será considerada desistida da súa petición.

Sen prexuízo do anterior, poderase requirir a persoa solicitante para que achegue cantos datos, documentos complementarios e aclaracións resulten necesarios para a valoración do traballo presentado. De non facelo, será considerada desistida da súa petición.

As comunicacións realizaranse exclusivamente a través do enderezo de correo electrónico proporcionado polas persoas solicitantes.

Quinta. Xurado

1. O xurado estará composto polos seguintes membros:

Presidencia: Dolores Fernández Galiño, valedora do Pobo, ou persoa que a substitúa ou en quen delegue.

Vogais:

María Xosé Porteiro García, adxunta á valedora do Pobo, ou persoa que a substitúa ou en quen delegue.

María Castro Parga, responsable da Valedora do Pobo en materia de xénero, ou persoa que a substitúa.

Antonio López Díaz, reitor da Universidade de Santiago de Compostela, ou persoa en quen delegue, elixida pola súa traxectoria profesional e persoal en materia de igualdade.

Ricardo Cao Abad, reitor da Universidade da Coruña, ou persoa en quen delegue, elixida pola súa traxectoria profesional e persoal en materia de igualdade.

Manuel Reigosa Roger, reitor da Universidade de Vigo, ou persoa en quen delegue, elixida pola súa traxectoria profesional e persoal en materia de igualdade.

Secretaría: Fernando de Andrés Alonso, secretario xeral da Valedora do Pobo.

2. Unha vez constituído o xurado, publicarase a relación nominal dos seus compoñentes na páxina web do Valedor do Pobo.

3. De xeito orientativo, o procedemento que seguirá o xurado será:

a) Cada integrante do xurado dará a cada traballo, segundo o seu acreditado saber, unha puntuación de 0 a 2.

b) Pasarán a seguinte fase aqueles traballos que obtivesen a puntuación máxima de, polo menos, unha persoa membro do xurado da valedora e, polo menos, unha persoa membro do xurado en representación das universidades; e os traballos que obteñan a puntuación máxima ben dos tres membros do xurado procedentes das universidades ou ben da institución do Valedor do Pobo.

c) Dos traballos que pasen á segunda fase, cada membro do xurado, segundo o seu acreditado saber, propoñerá unha escolma daqueles traballos que considere que poden optar a cadanseu premio, expoñendo sucintamente as razóns da súa proposta.

d) Na derradeira fase, a deliberación e votación comezará polos traballos que obtivesen maiores apoios, sucintamente expostos entre os membros do xurado.

4. Para o non disposto nestas bases serán de aplicación as normas contidas no capítulo II, sección terceira, da Lei 40/2015, do 1 de outubro, de réxime xurídico do sector público.

Sexta. Resolución

Unha vez valorados os traballos de fin de grao (TFG) e traballos de fin de máster (TFM) presentados, o xurado emitirá a resolución no prazo máximo de seis meses contados a partir do día de finalización do prazo de presentación.

As decisións tomaranse por maioría e a Presidencia do xurado terá voto de calidade en caso de empate.

O xurado poderá outorgar premio ex aequo en caso de empate ao mellor traballo de fin de grao (TGF) ou ao mellor traballo de fin de máster (TFM). Neste caso, outorgaráselles o diploma acreditativo e dividirase a contía económica fixada entre as persoas premiadas en cada categoría.

No caso de non alcanzaren os apoios necesarios os traballos presentados, poderase declarar algún ou todos os premios desertos.

O ditame do xurado será inapelable e publicarase no Diario Oficial de Galicia e nas páxinas web das entidades convocantes.

Sétima. Aceptación das bases e autorización ás entidades convocantes dos premios para a publicación

A participación nesta convocatoria supón a aceptación expresa das presentes bases, así como a autorización á valedora do Pobo para a publicación, por calquera medio, dos traballos premiados. Para os efectos da súa publicación, poderase solicitar a adaptación do traballo ao habitual das publicacións institucionais.

Oitava. Dotación e tramitación dos premios

1. O xurado poderá conceder os seguintes premios:

– Premio ao mellor traballo de fin de grao (TFG): 1.000 € e diploma acreditativo.

– Premio ao mellor traballo de fin de máster (TFM): 1.000 € e diploma acreditativo.

2. Os premios aboaranse con cargo a aplicación orzamentaria 0102 111B 480 00 da institución do Valedor do Pobo para 2025, que queda condicionada á existencia de crédito nese exercicio.

3. O pagamento dos premios estará suxeito ás retencións e ao réxime fiscal que sexa de aplicación.

4. Unha vez notificado o premio, as persoas premiadas deberán presentar, no prazo de quince días, a seguinte documentación:

– Certificado académico que especifique o título do traballo, director/a deste, cualificación obtida e, de ser o caso, data de lectura e tribunal que o xulgou.

– Acreditación de estar ao día nas súas obrigas coa Facenda estatal e autonómica e coa Seguridade Social.

– Copia do certificado de conta bancaria da súa titularidade.

– Declaración responsable sobre o réxime fiscal das persoas premiadas.

Novena. Revogación dos premios

O incumprimento das condicións que se tiveron en conta para a concesión dos premios poderá dar lugar á súa revogación, así como ao reintegro das cantidades percibidas.

Décima. Datos de carácter persoal

As institucións convocantes publicarán na súa páxina web oficial as distintas fases de tramitación do procedemento de concesión dos premios, polo que a presentación da solicitude leva implícita a autorización para o tratamento necesario dos datos das persoas presentadas e da súa publicación na páxina web institucional.

En cumprimento do disposto na Lei orgánica 3/2018, do 5 de decembro, de protección de datos persoais e garantía dos dereitos dixitais, infórmase de que os datos persoais recollidos na solicitude de participación na convocatoria se incorporarán a un ficheiro para o seu tratamento, coa finalidade da xestión deste procedemento. Os/as solicitantes poderán exercer os dereitos de acceso, rectificación, cancelación e oposición previstos na lei mediante un escrito dirixido á valedora do Pobo.

Décimo primeira. Facultades da valedora do Pobo

Facúltase a valedora do Pobo para ditar as resolucións necesarias para o desenvolvemento adecuado desta convocatoria.

Santiago de Compostela, 18 de outubro de 2024

María Dolores Fernández Galiño
Valedora do Pobo en funcións

ANEXO I

Solicitude de participación na V edición dos premios Valedora do Pobo aos mellores traballos de fin de grao (TFG) e traballos de fin de máster (TFM)

en materia de igualdade e dereitos das mulleres

Nome:		Apelidos:
DNI:	Correo electrónico:		Teléfono:
Universidade en que se presentou o traballo:
Data en que se presentou:

EXPÓN que desexa participar na quinta edición dos premios Valedora do Pobo aos mellores traballos de fin de grao (TFG) e traballos de fin de máster (TFM) en materia de igualdade e dereitos das mulleres.

........................, ...... de ................. de 2024

(Sinatura)

Documentos que achega:

Traballo de fin de grao (TFG) en formato de papel e electrónico (CD ou pendrive en Word, Libreoffice ou LaTeX) titulado .............................................................................................................................

Traballo de fin de máster (TFM) en formato de papel e electrónico (CD ou pendrive en Word, Libreoffice ou LaTeX) titulado ................................................................................................................

Síntese descritiva do traballo:

ANEXO II

Modelo de comunicación de presentación da solicitude

A persoa autora do traballo de fin de grao/traballo de fin de máster co título .....................................................

MANIFESTA que presentou a solicitude de participación na quinta edición dos premios Valedora do Pobo aos mellores traballos de fin de grao (TFG) e traballos de fin de máster (TFM) en materia de igualdade e dereitos das mulleres con data do .................................. en1 .................................................................................................

(Sinatura)

1Indíquese o lugar de presentación de conformidade co disposto no artigo 16 da Lei 39/2015, do 1 de outubro, do procedemento administrativo común das administracións publicas.