Expediente: IN407A 2023/313-4.

Promotora: UFD Distribución Electricidad, S.A.

Denominación: novo CTI Limeres e substitución do apoio AF22F6C2//83-6-CT da LMT SJG804.

Concello: Cerdedo-Cotobade.

Feitos:

1. O 1.6.2023, a empresa UFD Distribución Electricidad, S.A. solicitou a autorización administrativa previa, a autorización administrativa de construción e a declaración, en concreto, de utilidade pública da instalación eléctrica denominada Novo CTI Limeres e substitución do apoio AF22F6C2//83-6-CT da LMT SJG804.

A solicitude inclúe o proxecto de execución asinado pola enxeñeira técnica industrial Herminia López Caamaño, colexiada 4598 do Colexio Oficial de Enxeñeiros Técnicos Industriais de Vigo, e no cal figura un orzamento total de 21.235,97 euros.

Examinado o proxecto de execución, conclúese que ten como finalidade as seguintes actuacións situadas no lugar de Limeres, no concello de Cerdedo-Cotobade (Pontevedra):

– Retirada do centro de transformación intemperie (CTI) Limeres (36AG87) de 25 kVA situado no apoio AF22F6C2//83-6CT que será substituído por un C 2000/12.

– No apoio proxectado instalarase un centro de transformación tipo 50/24/20 B2 intemperie que se conectará á liña de media tensión aérea SJG804, no tramo SJG8046965.

– Retensado de 49 metros da liña de media tensión aérea entre o apoio proxectado e o apoio AF28EORN//83-5.

2. Este departamento territorial solicitou o preceptivo informe ás distintas administracións, organismos ou, de ser o caso, empresas de servizos de interese xeral afectadas, isto é, o Concello de Cerdedo-Cotobade, o Servizo do Patrimonio Cultural e o Servizo de Patrimonio Natural. A empresa promotora manifestou a súa conformidade cos condicionados emitidos polo Concello de Cerdedo-Cotobade e polo Servizo do Patrimonio Cultural.

O Servizo de Patrimonio Natural non emitiu o condicionado técnico, entendéndose en consecuencia a súa conformidade coa autorización de construción da dita infraestrutura eléctrica, conforme o disposto no artigo 131 do Real decreto 1955/2000, do 1 de decembro, sen prexuízo da autorización que lle corresponda outorgar.

3. Como non foi posible efectuar a notificación á única persoa titular da parcela afectada pola declaración de utilidade pública solicitada pola empresa promotora, publicáronse os correspondentes anuncios no Diario Oficial de Galicia do 11.7.2023 e no taboleiro de edictos único do Boletín Oficial del Estado do 15.7.2023, co fin de realizar a notificación por comparecencia.

4. O proxecto someteuse ao trámite de información pública mediante a Resolución do 27.6.2023 publicada nos seguintes medios:

– DOG (Diario Oficial de Galicia): 20.7.2023.

– Xornal Faro de Vigo: 20.3.2024.

– Taboleiro de anuncios do Concello de Cerdedo-Cotobade, desde o 20.7.2023 ata o 7.9.2023, segundo o certificado emitido polo propio concello.

– Portal de transparencia e Goberno aberto da Consellería de Economía e Industria.

Durante este trámite non se recibiron alegacións.

Consideracións legais e técnicas:

1. O Departamento Territorial de Pontevedra é competente para resolver este expediente con fundamento no Decreto 140/2024, do 20 de maio, polo que se establece a estrutura orgánica da Consellería de Economía e Industria (DOG núm. 101, do 27 de maio), e no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).

2. A lexislación de aplicación ao presente expediente é:

– Lei 24/2013, do 26 de decembro, do sector eléctrico.

– Lei 39/2015, do 1 de outubro, do procedemento administrativo común das administracións públicas.

– Lei 40/2015, do 1 de outubro, de réxime xurídico do sector público.

– Lei 3/2007, do 9 de abril, de prevención e defensa contra os incendios forestais de Galicia.

– Lei do 16 de decembro de 1954, sobre expropiación forzosa.

– Lei 9/2021, do 25 de febreiro, de simplificación administrativa e de apoio á reactivación económica de Galicia.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Real decreto lei 23/2020, do 23 de xuño, polo que se aproban medidas en materia de enerxía e noutros ámbitos para a reactivación económica.

– Real decreto 223/2008, do 15 de febreiro, polo que se aproba o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

– Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

– Decreto do 26 de abril de 1957 polo que se aproba o Regulamento da Lei de expropiación forzosa.

3. As características técnicas da instalación son as que a seguir se describen:

– Substitución do centro de transformación intemperie (CTI) Limeres (36AG87) e do apoio AF22F6C2//83-6-CT da liña de media tensión aérea (LMTA) SJG804 en que está situado.

– Centro de transformación intemperie a 50 kVA, con relación de transformación 20 kV/400 V, sobre o apoio proxectado C-2000/12 en substitución do AF22F6C2//83-6-CT, situado na parcela con referencia catastral 36011A067000320000JX, en Limeres.

– Retensado do van comprendido entre o apoio proxectado C-2000/12 e o existente AF28EORN//83-5 (49 metros de condutor LA-30).

A instalación está situada en Limeres, Cerdedo, no municipio de Cerdedo-Cotobade (Pontevedra).

Conforme o indicado,

Resolvo:

1. Outorgar á empresa UFD Distribución Electricidad, S.A. as autorizacións administrativas previa e de construción da instalación de distribución de enerxía eléctrica denominada Novo CTI Limeres e substitución do apoio AF22F6C2//83-6-CT da LMT SJG804, expediente IN407A 2023/313-4, cuxas características se axustarán en todas as súas partes ás que figuran no proxecto de execución, ás condicións técnicas e de seguridade establecidas nos regulamentos de aplicación e ás condicións establecidas nos condicionados dos organismos que constan no expediente.

2. Declarar a utilidade pública, en concreto, da citada instalación eléctrica, o que leva implícito a necesidade de ocupación dos bens ou de adquisición dos dereitos afectados e implica a urxente ocupación para os efectos do artigo 52 da Lei de expropiación forzosa.

3. A empresa UFD Distribución Electricidad, S.A. asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade. En todo momento se deberán cumprir as normas e directrices vixentes que resulten de aplicación, en particular, canto establece o Real decreto 223/2008, do 15 de febreiro, polo que se aproba o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09, e o Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

4. O prazo para a posta en marcha das instalacións que se autorizan será de doce meses, contados a partir da data da última autorización administrativa necesaria para a execución. Unha vez constituídas estas instalacións, a empresa promotora deberá presentar a solicitude de autorización de explotación ante este departamento acompañada da seguinte documentación:

– As declaracións de conformidade relativas ao material ou equipamento, e as certificacións ou homologacións, se procede.

– Un certificado de dirección final de obra en que se garantirá o cumprimento das especificacións do proxecto e prescricións complementarias, se as houber, así como das regulamentacións e normas axeitadas para a montaxe da instalación e posta a punto.

– Planimetría as built da instalación eléctrica en formato shape.

5. O incumprimento das condicións e requisitos establecidos nesta resolución poderá dar lugar á súa revogación, logo da audiencia á promotora, de conformidade co disposto no artigo 53.10 da Lei 24/2013, do 26 de decembro.

6. Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.

Contra esta resolución, que non é definitiva en vía administrativa, poderase interpoñer recurso de alzada ante a conselleira de Economía e Industria da Xunta de Galicia, no prazo dun mes contado a partir do día seguinte ao da súa notificación ou publicación, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Pontevedra, 28 de outubro de 2024

Beatriz López del Olmo
Directora territorial de Pontevedra

Anexo

Relación de bens e dereitos afectados-Concello de Cerdedo-Cotobade

Nº	Lugar	Terreo	Referencia catastral	Titular	Apoio (m2)
1	Piñeiras	Rústico	36011A067000320000JX	Descoñecido/a	1,44