Ao abeiro do establecido no Decreto lexislativo 1/2015, do 12 de febreiro, polo que se aproba o texto refundido das disposicións legais da Comunidade Autónoma de Galicia en materia de política industrial, publícase como anexo desta resolución o Acordo do Consello da Xunta de Galicia do 21 de outubro de 2024 polo que se aproba o proxecto industrial estratéxico Triskelion para a produción de metanol verde en Mugardos (A Coruña), promovido por Forestal del Atlántico, S.A.
Santiago de Compostela, 4 de decembro de 2024
Nicolás Vázquez Iglesias
Secretario xeral de Industria e Desenvolvemento Enerxético
ANEXO
Acordo do Consello da Xunta de Galicia do 21 de outubro de 2024 polo que se aproba o proxecto industrial estratéxico Triskelion para a produción de metanol verde en Mugardos (A Coruña), promovido por Forestal del Atlántico, S.A., ao abeiro do establecido no Decreto lexislativo 1/2015, do 12 de febreiro, polo que se aproba o texto refundido das disposicións legais da Comunidade Autónoma de Galicia en materia de política industrial
Feitos:
1. Mediante Acordo do 27.10.2022, o proxecto de planta de produción de metanol verde foi declarado polo Consello da Xunta de Galicia como proxecto industrial estratéxico (PIE). A dita declaración ten os efectos establecidos no artigo 79.4 do texto refundido das disposicións legais da Comunidade Autónoma de Galicia en materia de política industrial, aprobado polo Decreto lexislativo 1/2015, do 12 de febreiro.
2. De conformidade co artigo 80.1 do citado Decreto lexislativo 1/2015, do 12 de febreiro, logo da declaración do proxecto industrial estratéxico, con data do 30.11.2022 desde a Subdirección Xeral de Proxectos da Secretaría Xeral de Industria requiríuselle á promotora a presentación de toda a documentación exixida pola normativa aplicable, en virtude das exixencias legais derivadas da instalación e das infraestruturas proxectadas e, en particular, para efectos do previsto no artigo 27 da Lei 9/2021, do 25 de febreiro, de simplificación administrativa e de apoio á reactivación económica de Galicia.
O 1.6.2023 e o 6.6.2023 recíbese documentación da promotora.
3. De acordo co artigo 80.3 do citado texto refundido, publicouse no Diario Oficial de Galicia (DOG número 117, do 21 de xuño de 2023) o Anuncio do 6 de xuño de 2023, da Secretaría Xeral de Industria, polo que se somete a información pública a solicitude de modificación substancial da autorización ambiental integrada (AAI), o estudo de impacto ambiental (EIA) e o proxecto denominado Triskelion, planta de produción de metanol verde, declarado proxecto industrial estratéxico (PIE) mediante o Acordo do Consello da Xunta de Galicia do 27 de outubro de 2022, que se implantará no concello de Mugardos (A Coruña).
O citado anuncio e toda a documentación técnica antes sinalada estiveron dispoñibles no Portal de transparencia da Consellería de Economía, Industria e Innovación para a súa consulta pública durante o tempo legalmente establecido.
Certificados de información pública:
– Subdirección Xeral de Proxectos da Secretaría Xeral de Industria: 16.10.2023.
– Concello de Mugardos: 14.8.2023.
Non se presentaron alegacións durante o trámite de información pública.
4. De acordo co artigo 80.4, simultaneamente ao trámite de información pública, o órgano responsable da tramitación efectuou a petición de todos os informes ás administracións e órganos sectoriais afectados, tanto os exixidos pola normativa reguladora da autorización sectorial como os exixidos para os efectos da tramitación ambiental.
De acordo co indicado pola Subdirección Xeral de Avaliación Ambiental, durante o procedemento foron consultados os seguintes organismos:
1. Augas de Galicia:
Solicitude de informes a Augas de Galicia do 23.6.2023 e do 12.9.2023.
Informes de Augas de Galicia do 17.7.2023 e do 22.9.2023.
2. Dirección Xeral (DX) de Emerxencias e Interior:
Solicitude de informe da DX de Emerxencias e Interior do 23.6.2023.
Informe da Dirección Xeral de Emerxencias e Interior do 6.7.2023.
3. DX de Patrimonio Cultural:
Solicitude de informe da DX do Patrimonio Cultural do 23.6.2023.
Informe remitido pola Dirección Xeral de Patrimonio Cultural o 14.7.2023.
4. DX de Patrimonio Natural:
Solicitude de informe da DX de Patrimonio Natural do 23.6.2023.
Informe remitido pola Dirección Xeral de Patrimonio Natural o 27.6.2023.
5. DX de Saúde Pública:
Solicitude de informe da Dirección Xeral de Saúde Pública do 23.6.2023.
Informe remitido pola Dirección Xeral de Saúde Pública o 12.7.2023.
6. Instituto de Estudos do Territorio:
Solicitude de informe do Instituto de Estudos do Territorio do 23.6.2023.
Informe remitido polo Instituto de Estudos do Territorio o 14.7.2023.
7. Dirección Xeral de Ordenación do Territorio e Urbanismo (DXOTU):
Solicitude de informe á DXOTU do 23.6.2023.
Informe remitido pola DXOTU do 30.6.2023.
8. Subdirección Xeral de Meteoroloxía e Cambio Climático (SXMCC):
Solicitude de informe á SXMCC do 23.6.2023 e do 12.9.2023.
Informe remitido pola SXMCC do 12.7.2023 e do 26.9.2023.
9. S.X. de Avaliación Ambiental:
Solicitude de informe á S.X.A.A. do 23.6.2023.
Informes remitidos pola S.X.A.A. do 7.7.2023 e do 22.9.2023.
10. Xefatura Territorial (XT) de Industria:
Solicitude de informe á XT do 23.6.2023.
Informe remitido polo Servicio de Industria o 6.7.2023.
11. Dirección Xeral de Planificación Enerxética e Recursos Naturais (DXPERN):
Solicitude de informe á DXPERN do 23.6.2023.
Informe remitido pola DXPERN o 11.7.2023.
12. Servizo Periférico de Costas, Dirección Xeral da Costa e do Mar (DXCM):
Solicitude de informe á DXCM do 23.6.2023.
Reiteración da solicitude do 10.8.2023.
Sen resposta.
13. Axencia Galega de Infraestruturas (AXI):
Solicitude de informe á AXI do 23.6.2023.
Informe remitido pola AXI o 29.6.2023.
14. Concello de Mugardos (CM):
Solicitude de informe ao CM do 3.7.2023.
Reiteración da solicitude do 9.8.2023.
Informe remitido polo CM o 16.10.2023.
15. Autoridade Portuaria de Ferrol-San Cibrao (APF):
Solicitude de informe á APF do 3.7.2023.
Informe remitido pola APF o 14.7.2023.
16. Consellería do Mar (C. Mar):
Solicitude de informe á C. Mar do 3.7.2023.
Informe remitido pola C. Mar o 20.7.2023.
17. Federación Ecoloxista de Galicia (FEG):
Solicitude de informe á FEG do 3.7.2023.
Sen resposta.
18. Sociedade Galega de Historia Natural (SGHN):
Solicitude de informe á SGHN do 3.7.2023.
Sen resposta.
19. Sociedade Galega de Ornitoloxía (SGO):
Solicitude de informe á SGO do 3.7.2023.
Sen resposta.
Os citados informes, xunto con copia do expediente completo e informe do órgano substantivo do 27.10.2023, foron remitidos o 30.10.2023 á Dirección Xeral de Calidade Ambiental, Sostibilidade e Cambio Climático para continuar co trámite ambiental.
O 17.11.2023 a Dirección Xeral de Calidade Ambiental requiriu solicitarlle novo informe a Augas de Galicia.
O 21.11.2023 Augas de Galicia solicita que se lle requira á promotora nova documentación.
O 26.12.2023 a promotora presenta a dita documentación.
O 26.1.2024 Augas de Galicia remite informes da Área de Verteduras e da Área de Calidade das Augas, que foron remitidos á DX de Calidade Ambiental na mesma data.
5. Mediante a Resolución do 29.1.2024 a Dirección Xeral de Calidade Ambiental, Sostibilidade e Cambio Climático formulou a declaración de impacto ambiental do proxecto Triskelion, en que concluíu que é ambientalmente viable (DOG do 13 de febreiro).
6. Por medio da Resolución do 13.2.2024 a Dirección Xeral de Calidade Ambiental, Sostibilidade e Cambio Climático modificou, por modificación substancial, a autorización ambiental integrada número 2006/0349_NAA/IPPC_168, outorgada a Forestal del Atlántico, S.A. para incluír o proxecto denominado Triskelion, planta de produción de metanol verde, que se localizará nas súas instalacións do concello de Mugardos (A Coruña).
7. Mediante a Resolución do 14.5.2024 a Dirección Xeral de Planificación Enerxética e Minas autorizou o desmantelamento da planta de coxeración existente e a modificación resultante que Forestal del Atlántico, S.A. promove no concello de Mugardos (A Coruña). Por medio da Resolución do 15.10.2024 a Dirección Xeral de Planificación Enerxética e Minas outorgou a autorización administrativa de construción da súa modificación.
8. Para continuar co procedemento de aprobación do proxecto previsto no artigo 80 do texto refundido das disposicións legais da Comunidade Autónoma de Galicia en materia de política industrial, o 14.5.2024 a promotora achegou a documentación definitiva para a dita aprobación, a cal se indica a seguir:
• Memoria de integración do proxecto Triskelion.
• Proxecto de cambio de combustible e modificación de potencia da planta de coxeración de Forestal del Atlántico, S.A.
• Proxecto de execución e autorización da nova ERM e abastecemento de gas para as instalacións de Forestal del Atlántico, S.A.
• Proxecto de execución de planta de fabricación de metanol verde.
Descrición do proxecto:
O proxecto Triskelion consiste na instalación dunha planta integrada de xeración e almacenamento de metanol verde a partir de hidróxeno verde obtido por electrólise da auga, usando enerxía renovable (con garantías de orixe verde), e CO2 captado da coxeración existente.
Está previsto que o proxecto Triskelion se execute en tres fases:
– Fase I: substitución da actual coxeración de gasóleo/fuel óleo por unha máis eficiente da mesma potencia, que utilizará gas natural como combustible, e inclúe a construción das infraestruturas asociadas (gasoduto de subministración) e a modificación da piscina de refrixeración.
– Fase II: implantación da planta de captación de CO2, planta de hidróxeno de 66 MW de potencia nominal, planta de licuefacción de O2 e planta de síntese e destilación de metanol, para a produción de ata 40.000 t/a (120 t/día) de metanol verde e 59.643 t/a de osíxeno.
– Fase III: ampliación da planta de hidróxeno verde ata uns 77 MW de potencia nominal, co obxecto de obter unha produción de 52.000 t/a (156 t/día) de metanol verde e 75.963 t/a de osíxeno.
Os proxectos correspondentes á fase I do proxecto Triskelion son os seguintes:
– Proxecto de cambio de combustible e modificación de potencia da planta de coxeración de Forestal do Atlántico, S.A. (este proxecto xa foi autorizado mediante a Resolución do 14.5.2024 da Dirección Xeral de Planificación Enerxética e Minas).
–Proxecto de execución e autorización de nova ERM e abastecemento de gas para as instalacións de Forestal do Atlántico, S.A. (este proxecto non necesita autorización administrativa, segundo consta non informe da Dirección Xeral de Planificación Enerxética e Recursos Naturais do 11.7.2023).
Fases II e III: proxecto de execución de planta de fabricación de metanol verde.
Sobre este proxecto emitiu informe o Servizo de Industria do Departamento Territorial da Coruña o 24.7.2024 e o Servizo de Enerxía e Minas, o 4.10.2024.
Localización xeográfica:
O proxecto Triskelion situarase na ría de Ferrol, dentro das actuais instalacións de Forestal, no municipio de Mugardos (A Coruña). Ocuparase a parcela 1926005NJ6112S0001TU, na cal se encontra o resto das instalacións de Forestal, así como a parcela existente de referencia catastral 1926001NJ6112S0001KU, de propiedade da Autoridade Portuaria de Ferrol-San Cibrao, para as cales Forestal dispón de concesión de ocupación. Actualmente está en tramitación por parte da Autoridade Portuaria Ferrol-San Cibrao a solicitude da promotora para a modificación substancial da concesión, coa finalidade de modificar o obxecto concesional, a autorización das obras en dominio público portuario e a prórroga do prazo de concesión. A Secretaría Xeral de Industria e Desenvolvemento Enerxético emitiu informe favorable sobre esta solicitude o 23.9.2024.
Orzamento: o orzamento total do proxecto ascende a 200.514.031,81 €.
9. De acordo co previsto no artigo 80.5 do texto refundido das disposicións legais da Comunidade Autónoma de Galicia en materia de política industrial, o 28.6.2024 solicitóuselle informe á Xunta Consultiva en Materia de Ordenación do Territorio e Urbanismo.
10. O 12.7.2024 recibiuse na Secretaría Xeral de Industria e Desenvolvemento Enerxético o certificado do acordo adoptado polo Pleno da Xunta Consultiva en Materia de Ordenación do Territorio e Urbanismo en data 10.7.2024, no cal se acordou emitir informe favorable sobre o proxecto industrial estratéxico (PIE) Triskelion, así como o sobre proxecto técnico dilixenciado.
Consideracións legais e técnicas:
1. Réxime xurídico aplicable.
O réxime xurídico aplicable ao suposto de referencia vén constituído polo capítulo III do título III do Decreto lexislativo 1/2015, do 12 de febreiro, polo que se aproba o texto refundido das disposicións legais da Comunidade Autónoma de Galicia en materia de política industrial (DOG número 128, do 9 de xullo).
O procedemento de aprobación dos proxectos estratéxicos está regulado no artigo 80 da dita norma, no cal se establece:
«1. Logo da declaración polo Consello da Xunta do proxecto industrial estratéxico, a consellería competente por razón da materia requiriralle á empresa interesada a presentación de toda a documentación exixida pola normativa aplicable, en virtude das exixencias legais derivadas da instalación e das infraestruturas proxectadas e, en particular, para os efectos do previsto no artigo 27 da Lei 9/2021, do 8 de xaneiro:
a) No caso de existiren modificacións sobre o proxecto de implantación ou de ampliación da instalación industrial tido en conta para a declaración, presentarase o proxecto que as inclúa. Estas modificacións non serán substanciais, no sentido de que non poderán afectar as razóns que determinaron a súa declaración como proxecto industrial estratéxico.
b) A documentación que acredite o cumprimento dos requisitos establecidos na normativa reguladora dos actos de control integrados no procedemento, se é o caso.
c) A memoria descritiva detallada das características técnicas das infraestruturas, dotacións ou instalacións obxecto do proxecto.
d) As medidas necesarias e suficientes para garantir a adecuada conexión do ámbito cos sistemas xerais exteriores existentes e, de ser o caso, a ampliación ou o reforzo dos devanditos sistemas, que resolvan os enlaces coas estradas ou vías actuais e coas redes de servizos de abastecemento de auga e saneamento, subministración de enerxía eléctrica, telecomunicacións, gas e outros.
e) De resultar preciso, o documento ambiental necesario para a avaliación ambiental do proxecto, segundo o establecido na Lei 21/2013, do 9 de decembro, de avaliación ambiental, ou norma básica estatal que a substitúa.
f) A relación detallada dos bens e dereitos afectados, describíndoos na forma que determina o artigo 17 da Lei do 16 de decembro de 1954 sobre expropiación forzosa, no caso de se solicitar a declaración de utilidade pública ou interese social, en concreto, da instalación.
3. O órgano responsable da tramitación, unha vez recibida a documentación completa exixida no punto 2, someterá a información pública durante o prazo de trinta días hábiles o proxecto de execución e, así mesmo, o estudo de impacto ambiental no caso de avaliación ambiental ordinaria, mediante a súa publicación no Diario Oficial de Galicia e, de ser o caso, no Portal de transparencia e Goberno aberto.
No caso de se solicitar a declaración de utilidade pública ou interese social, realizarase de forma simultánea o trámite de información pública mediante a publicación nun dos xornais de maior circulación de cada unha das provincias afectadas.
4. Simultaneamente ao trámite de información pública, o órgano responsable da tramitación efectuará a petición de todos os informes ás administracións e aos órganos sectoriais afectados, tanto os exixidos pola normativa reguladora da autorización sectorial como os exixidos para os efectos da tramitación ambiental.
En particular, no caso de que sexa preceptivo, de acordo co establecido na normativa de prevención e control integrados da contaminación, o informe urbanístico do concello ou concellos afectados, este informe terá en conta a declaración de prevalencia sobre o planeamento urbanístico vixente establecida na letra c) do artigo 79.4.
Concretamente, cando o proxecto afecte terreos que, de conformidade coa lexislación urbanística, deban ser clasificados como solo rústico de especial protección, exixirase o informe favorable do organismo que teña a competencia sectorial por razón do valor obxecto de protección.
5. A persoa titular da consellería competente por razón da materia, logo do informe da Xunta Consultiva en Materia de Ordenación do Territorio e Urbanismo, elevará o expediente ao Consello da Xunta, que decidirá se procede a aprobación do proxecto industrial estratéxico».
2. Motivación da proposta presentada.
Consta neste expediente toda a documentación exixida polo artigo 80.1 do texto refundido das disposicións legais da Comunidade Autónoma de Galicia en materia de política industrial, remitida pola entidade promotora Forestal del Atlántico, S.A. para a aprobación dun proxecto industrial estratéxico.
Mediante a Resolución do 29.1.2024, a Dirección Xeral de Calidade Ambiental, Sostibilidade e Cambio Climático formulou a declaración de impacto ambiental do proxecto Triskelion, en que concluíu que é ambientalmente viable (DOG do 13 de febreiro).
Por medio da Resolución do 13.2.2024, a Dirección Xeral de Calidade Ambiental, Sostibilidade e Cambio Climático variou, por modificación substancial, a autorización ambiental integrada número 2006/0349_NAA/IPPC_168 outorgada a Forestal del Atlántico, S.A. para incluír o proxecto denominado Triskelion, planta de produción de metanol verde, que se localizará nas súas instalacións do concello de Mugardos.
A continuación recóllese a información exixida nas letras a) e b) do artigo 42.2 da Lei 21/2013, do 9 de decembro, de avaliación ambiental, respecto da declaración de impacto ambiental (DIA) das instalacións do proxecto Triskelion, formulada pola Dirección Xeral de Calidade Ambiental, Sostibilidade e Cambio Climático o 29.1.2024:
a) A Dirección Xeral de Calidade Ambiental, Sostibilidade e Cambio Climático resolveu: «Formular a declaración de impacto ambiental do proxecto Triskelion, planta de produción de metanol, promovido por Forestal del Atlántico, S.A., e concluíu que o proxecto é ambientalmente viable sempre que se cumpra, ademais do recollido no estudo de impacto ambiental e na restante documentación avaliada, o condicionado que figura ao longo deste documento, tendo en conta que no caso de que exista contradición entre eles, prevalecerá o disposto nesta DIA».
b) Nos números 4 e 5 da DIA recóllense as condicións que complementan, matizan ou subliñan as incluídas na documentación avaliada, distribuídas nos seguintes ámbitos:
4. Condicións ambientais.
4.1. Condicións particulares.
4.2. Condicións xerais.
4.1. Protección da atmosfera, poboación e saúde.
4.2. Protección das augas e leitos fluviais.
4.3. Xestión de residuos.
4.4. Protección do patrimonio natural.
4.5. Protección do patrimonio cultural.
4.6. Integración paisaxística e restauración.
4.7. Protección ante accidentes graves ou catástrofes.
4.8. Sobre a eficiencia enerxética
4.9. Outras condicións.
5. Programa de vixilancia e seguimento ambiental.
Consta neste expediente informe favorable da Subdirección Xeral de Proxectos en que se indica que se cumpriu co procedemento legalmente establecido nos números 1 ao 4 do artigo 80 do texto refundido das disposicións legais da Comunidade Autónoma de Galicia en materia de política industrial, aprobado polo Decreto lexislativo 1/2015, do 12 de febreiro.
Consta neste expediente certificado do acordo adoptado polo Pleno da Xunta Consultiva en Materia de Ordenación do Territorio e Urbanismo o 10.7.2024, no cal se acordou emitir informe favorable sobre o proxecto industrial estratéxico (PIE) Triskelion, de acordo co previsto no artigo 80.5 do texto refundido das disposicións legais da Comunidade Autónoma de Galicia en materia de política industrial.
Á vista do anterior, conclúese que a tramitación do expediente como proxecto industrial estratéxico se realizou conforme o establecido nos artigos 78, 79 e 80 do texto refundido das disposicións legais da Comunidade Autónoma de Galicia en materia de política industrial, aprobado polo Decreto lexislativo 1/2015, do 12 de febreiro.
De acordo con todo o sinalado anteriormente,
PROPONSE:
A adopción do seguinte ACORDO por parte do Consello da Xunta de Galicia:
1. Aprobar, ao abeiro do establecido no texto refundido das disposicións legais da Comunidade Autónoma de Galicia en materia de política industrial, o proxecto industrial estratéxico Triskelion para a produción de metanol verde en Mugardos (A Coruña), promovido por Forestal del Atlántico, S.A.
2. A aprobación do proxecto industrial estratéxico terá os efectos regulados no artigo 81 do texto refundido das disposicións legais da Comunidade Autónoma de Galicia en materia de política industrial.
De conformidade co previsto nos artigos 79.4 c) e 81.2 do Decreto lexislativo 1/2015, do 12 de febreiro, as determinacións contidas nos proxectos industriais estratéxicos terán forza vinculante para as administracións públicas e os particulares e prevalecerán sobre as determinacións do planeamento urbanístico vixente. Así mesmo, de conformidade co previsto no artigo 79.4.d), os proxectos declarados estratéxicos non están suxeitos aos títulos habilitantes urbanísticos de competencia municipal.
Esta aprobación axustarase ao cumprimento das seguintes condicións:
1. De acordo co establecido no artigo 88 do Decreto lexislativo 1/2015, unha vez aprobado o proxecto industrial estratéxico, e ata a súa posta en marcha, a persoa promotora do proxecto deberá remitirlle con carácter semestral á consellería competente en materia de industria un informe do estado do proxecto, no cal deberá indicar o estado de execución das obras ou actuacións necesarias para a dita posta en marcha, así como a previsión da súa finalización. Este informe deberá ser remitido igualmente, de forma extraordinaria, para o caso de que durante as actuacións xurdan incidencias salientables que fagan variar de modo significativo a data prevista das obras e actuacións e, polo tanto, a de inicio da actividade industrial obxecto do proxecto industrial estratéxico.
2. A promotora deberá cumprir coas condicións establecidas nas resolucións do 14.5.2024 e do 15.10.2024, da Dirección Xeral de Planificación Enerxética e Minas, polas que se autorizou o desmantelamento da planta de coxeración existente e a modificación resultante que Forestal del Atlántico, S.A. promove no concello de Mugardos e a súa modificación.
3. A promotora deberá presentar ante o Departamento Territorial da Consellería de Economía e Industria da Coruña, segundo se establece no seu informe do 6.7.2023 en relación co proxecto, para dar cumprimento ao establecido no capítulo V, Documentos, do Decreto 37/2019, do 21 de marzo, polo que se determinan os órganos competentes e outras medidas para o control de risco inherentes aos accidentes graves nos cales interveñan substancias perigosas, a documentación requirida nos prazos establecidos na epígrafe de conclusións do citado informe, incluída no número 4.7 da declaración de impacto ambiental.
4. A promotora deberá dar cumprimento a todas as condicións establecidas na declaración de impacto ambiental do proxecto, do 29.1.2024, e na Resolución do 13.2.2024, da Dirección Xeral de Calidade Ambiental, Sostibilidade e Cambio Climático, pola que se modifica a autorización ambiental integrada NUM.2006/0349_NAA/IPPC_168.
5. Forestal del Atlántico dispón de permiso de acceso e conexión para a fase I. Previamente ao inicio da construción das fases II e III deberá dar cumprimento ao previsto no Real decreto 1183/2020, do 29 de decembro, de acceso e conexión ás redes de transporte e distribución de enerxía eléctrica.
6. O prazo de execución será o indicado no proxecto aprobado e comezará a contar desde o momento en que se dispoña de todos os permisos necesarios para iniciar a execución, sen prexuízo do establecido na lexislación ambiental para a caducidade da declaración de impacto ambiental. Para estes efectos, deberá terse en conta o previsto no artigo 12 do Real decreto 815/2013, do 18 de outubro, polo que se aproba o Regulamento de emisións industriais e de desenvolvemento da Lei 16/2002, do 1 de xullo, de prevención e control integrados da contaminación.
7. Esta autorización outórgase sen prexuízo de terceiros e independentemente das autorizacións ou doutros condicionados técnicos de organismos ou empresas de servizo público ou interese xeral afectados, necesarios para a realización das obras das instalacións autorizadas.
8. De acordo co establecido no artigo 87 do Decreto lexislativo 1/2015, unha vez aprobado o proxecto industrial estratéxico polo Consello da Xunta, a persoa titular da consellería competente en materia de industria dará traslado do seu contido ao concello afectado, para o exercicio das competencias que procedan.
9. Esta resolución publicarase no Diario Oficial de Galicia.
Contra este acordo, que pon fin á vía administrativa, poderase interpor recurso potestativo de reposición no prazo dun mes, contado desde o día seguinte ao da súa notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben directamente recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses, contados desde o día seguinte ao da notificación deste acordo, de conformidade co establecido nos artigos 10, 14 e 46.1 da Lei 29/1998, do 13 de xullo, reguladora da xurisdición contencioso-administrativa, sen prexuízo de que as persoas interesadas poidan interpor calquera outro recurso que consideren pertinente.