De conformidade co previsto no artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e no artigo 8 da Lei 19/2013, do 9 de decembro, de transparencia, acceso á información pública e bo goberno, dáse publicidade da seguinte resolución de revogación de encomenda coas seguintes características:
I. Mediante a Resolución do 14 de xullo de 2022, do conselleiro de Sanidade e presidente do Servizo Galego de Saúde, encomendouse á Axencia Galega de Infraestruturas a xestión das actuacións para a redacción do proxecto e a execución das obras de construción do novo centro de saúde no concello de Muíños.
II. De conformidade coas condicións básicas de execución da dita encomenda, a Axencia Galega de Infraestruturas sería a encargada da dirección da redacción do proxecto, así como da súa supervisión e aprobación técnica e de realizar os actos e negocios xurídicos propios da preparación, selección de contratista, adxudicación e execución das obras.
III. Mediante escrito do 30 de outubro de 2024, a Axencia Galega de Infraestruturas solicita a desistencia da dita encomenda, xa que, debido á carga de traballo sobrevida na Área de Contratación da Axencia, hoxe en día non foi posible proceder á licitación da execución das obras.
IV. Por estas circunstancias sobrevidas, considérase a necesidade de que a xestión das actuacións para a execución das obras de construción, inicialmente encomendadas á Axencia Galega de Infraestrutura, sexan asumidas directamente polo Servizo Galego de Saúde.
V. Ademais, e dado que a AXI licitou os contratos de redacción do proxecto e dirección das obras do novo centro de saúde de Muíños, resulta oportuno iniciar a tramitación da cesión dos contratos de servizo asociados á obra.
Á vista destas circunstancias, a Resolución do 3 de decembro de 2024, do conselleiro de Sanidade e presidente do Servizo Galego de Saúde, revoga e deixa sen efecto a Resolución do 14 de xullo de 2022 pola que se encomendaba á Axencia Galega de Infraestruturas a xestión das actuacións para a redacción do proxecto e a execución das obras de construción do novo centro de saúde de Muíños.
Santiago de Compostela, 12 de decembro de 2024
Antonio Gómez Caamaño
Conselleiro de Sanidade