Visto o expediente para o outorgamento das autorizacións administrativas previa e de construción das instalacións eléctricas que se describen a seguir, tal e como se recollen no proxecto asinado en novembro de 2024 na Coruña polo enxeñeiro industrial Xosé López Seoane, colexiado núm. 2745 do ICOIIG, e visado polo citado Colexio Profesional o día 25.11.2024 co número 20243613.

Solicitante: Eléctrica de Castro Caldelas, S.L.; CIF: B15639727.

Enderezo: rúa Galera, 15, 15003 A Coruña.

Denominación: reforma LMT Derivación Paradela.

Situación: lugar de Castro Caldelas, concello de Castro Caldelas.

Orzamento: 18.288,79 €.

Características técnicas:

• LMT soterrada, a 20 kV, de 183,43 m de lonxitude, en condutor RHZ1-OL 4×(1×95) Al, con orixe no centro de transformación e seccionamento existente Conde Oleiros e final no paso A/S a realizar no apoio proxectado núm. 4CC00012, de celosía metálica, do tipo C-2000/16.

• LMT aérea, a 20 kV, de 46,86 m, en condutor LA-56 con orixe no mencionado apoio núm. 4CC00012 e final no apoio existente núm. 4CC00013.

Cumpridos os trámites ordenados na Lei 24/2013, do 26 de decembro, do sector eléctrico, e no capítulo II, título VII, do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, e na Resolución da Consellería de Economía e Industria, do 19 de febreiro de 2014, pola que se aproba o procedemento de autorización administrativa de construción (DOG núm. 54, do 19 de marzo), así como na Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro), este departamento territorial

RESOLVE:

Conceder as autorizacións administrativas previa e de construción ás devanditas instalacións, cuxas características se axustarán en todas as súas partes ao proxecto arriba sinalado e ás condicións técnicas e de seguridade establecidas nos regulamentos de aplicación.

Esta autorización outórgase sen prexuízo das concesións e autorizacións que sexan necesarias, de acordo con outras disposicións que resulten de aplicación e, en especial, as relativas á ordenación do territorio e ao ambiente.

O prazo de posta en marcha das instalacións que se autorizan será de seis meses, contado a partir da data da última autorización administrativa necesaria para a súa execución.

Contra a presente resolución, que non é definitiva na vía administrativa, cabe interpor recurso de alzada ante a conselleira de Economía e Industria no prazo dun mes, contado a partir do día seguinte ao da notificación ou publicación desta resolución, conforme o establecido no artigo 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Ourense, 26 de decembro de 2024

Alicia María López Míguez
Directora territorial de Ourense